كەگەن اۋدانىنداعى رەفەرەندۋم ۋچاسكەلەرى مۇمكىندىگى شەكتەۋلى ازاماتتاردىڭ دا تاڭداۋ جاساۋىنا قولايلى ەتىپ جاساقتالعان. كورۋ جانە ەستۋ قابىلەتى ناشار ازاماتتار ءۇشىن جاڭا كونستيتۋتسيا جوباسىنىڭ اۋديو جانە برايل قارپى تۇرىندە جازىلعان نۇسقالارى بار. بۇل ەلىمىزدەگى بارلىق سايلاۋ ۋچاسكەسىندە بولادى. دەنساۋلىعىنا بايلانىستى كەلە المايتىنىن سايلاۋشىلارعا رەفەرەندۋم كەزىندە كوميسسيا مۇشەلەرى ولاردىڭ ۇيىنە ارنايى بارادى. مۇمكىندىگى شەكتەۋلى جاندار ەلدەگى ساياسي وزگەرىستەرگە ءۇن قوسىپ، قوعامدىق جۇمىستارعا بەلسەنە ارالاسىپ كەلەدى. سوندىقتان دا ساياسي ناۋقان كەزىندە ولاردىڭ داۋىس بەرۋى ءۇشىن بار مۇمكىندىكتى جاساۋىمىز قاجەت. عيمارات الدىنداعى پاندۋستار تالاپقا ساي، ءارى كورۋ قابىلەتى ناشار ادامدار ءۇشىن ەدەنگە جولباعدار ورناتىلعان. بۇگىنگى رەفەرەندۋمدا مۇمكىندىگى شەكتەۋلى جاندار ءوز تاڭداۋىن جاساۋدا،- دەيدى الماتى وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى باسشىسىنىڭ ورىنباسارى بايقونىس ەرجان ءدىلدانۇلى.

رەسپۋبليكالىق رەفەرەندۋم كەزىندە بارلىق ۋچاسكەدە مۇگەدەكتىگى بار ادامدارعا ارنالعان ارنايى بۇرىشتار بولادى. بۇل بۇرىشقا ارنايى كومپيۋتەر، ۇلعايتقىش قۇرالدار، قۇلاققاپتار جانە وزگە دە قۇرىلعىلار قويىلادى.

سونداي-اق، اۋداندا ينۆاتاكسي قىزمەتى ۇيىمداستىرىلعان.
وسى ورايدا، ۇيدەن ارناۋلى الەۋمەتتىك قىزمەت الۋشى ناعيما تالاسباەۆانىڭ پىكىرىن بىلگەن ەدىك.

– بۇگىن ۇيگە كەلگەن سايلاۋ جاشىگى، مەن ءۇشىن ەرەكشە اسەر قالدىردى. ۇيدە داۋىس بەرەتىن ادام رەتىندە مەنىڭ داۋسىمنىڭ قانشالىقتى ماڭىزدى ەكەنىن بايقاتتى. ءاربىر ازاماتتىڭ پىكىرى مەملەكەت ءۇشىن قۇندى، ال مەنىڭ ويىم مەن تاڭداۋىم دا ەلدىڭ بولاشاعىنا اسەر ەتەدى. جاڭا كونستيتۋتسيا ءاربىر ادامنىڭ قۇقىعىن قورعاۋعا باعىتتالعانىن كورسەتەدى. سوندىقتان ءوز پىكىرىمدى اشىق ايتۋ جانە داۋىس بەرۋ -مەنىڭ بورىشىم عانا ەمەس، سونىمەن بىرگە قۋانىشتى پارىزىم. ەل دامۋى- ءاربىرىمىزدىڭ بەلسەندىلىگىمىزگە بايلانىستى دەيدى،- ناعيما تالاسباەۆا.

Abai.kz