گرانت بەرۋ پروتسەسى تولىقتاي ەلەكتروندىق فورماتتا.

قازاقستاندا ايەلدەر كاسىپكەرلىگىن دامىتۋ جانە حالىقتىڭ الەۋمەتتىك وسال توپتارىن قولداۋ ماقساتىندا گرانتتار بەرۋ مەن كاسىپكەرلىككە وقىتۋ باعدارلامالارى جۇزەگە اسىرىلىپ كەلەدى.

ەڭبەك جانە حالىقتى الەۋمەتتىك قورعاۋ مينيسترلىگىنىڭ رەداكتسيامىزعا بەرگەن مالىمەتىنشە، كاسىپكەرلىك باستامالاردى قولداۋ ءۇشىن 400 ايلىق ەسەپتىك كورسەتكىشكە (اەك) دەيىن گرانتتار بەرىلەدى. 2026 جىلى بۇل سوما 1 730 000 تەڭگەنى قۇرايدى. گرانتتار كاسىپكەرلىك باستاماعا جاردەمدەسۋ جونىندەگى شارالاردى ۇيىمداستىرۋ جانە قارجىلاندىرۋ قاعيدالارىنا سايكەس بەرىلەدى.

قاعيدالارعا سايكەس، گرانتتاردى جۇمىسسىز ازاماتتار نەمەسە مەملەكەتتىك تىركەۋدەن وتكەنىنە ءۇش جىلدان اسپاعان جەكە كاسىپكەرلەر الا الادى. سونىمەن قاتار، بۇل قولداۋ شاراسى حالىقتىڭ الەۋمەتتىك وسال توپتارىنا ارنالعان.

گرانت الۋشىلار قاتارىنا:

• اتاۋلى الەۋمەتتىك كومەك الۋشىلار;
• كوپبالالى وتباسىلار;
• اسىراۋشىسىنان ايىرىلعان ازاماتتار;
• قونىس اۋدارۋشىلار مەن قانداستار;
• ەڭبەككە قارسى كورسەتىلىمى جوق مۇگەدەكتىگى بار ادامدار;
• مۇگەدەكتىگى بار بالا تاربيەلەپ وتىرعان اتا-انالار جاتادى.

گرانت بەرۋ پروتسەسى تولىقتاي ەلەكتروندىق فورماتقا كوشىرىلگەن. وتىنىمدەر Business.enbek.kz پورتالى ارقىلى قابىلدانادى.

ءوتىنىش بەرگەن كەزدە ۇمىتكەردىڭ الەۋمەتتىك توپقا جاتاتىنى جانە «باستاۋ بيزنەس» جوباسى بويىنشا كاسىپكەرلىك نەگىزدەرىن وقىعانىن راستايتىن سەرتيفيكاتى بار-جوعى اۆتوماتتى تۇردە تەكسەرىلەدى. بۇل سەرتيفيكاتتىڭ جارامدىلىق مەرزىمى ءۇش جىلدان اسپاۋى ءتيىس.

مينيسترلىك دەرەگىنشە، 2025 جىلى رەسپۋبليكا بويىنشا الەۋمەتتىك وسال توپتارعا 9,2 مىڭ گرانت بەرىلگەن. ونىڭ 5,9 مىڭى نەمەسە 63,4 پايىزى ايەلدەرگە تيەسىلى.

سونىمەن قاتار، ازاماتتار «باستاۋ بيزنەس» جوباسى اياسىندا كاسىپكەرلىك نەگىزدەرىن تەگىن وقي الادى. وقۋ skills.enbek.kz پورتالىندا ونلاين فورماتتا وتەدى جانە ۇزاقتىعى 14 كۇننەن اسپايدى.

باعدارلاما جۇمىسسىز جانە ناتيجەسىز ءوزىن-ءوزى جۇمىسپەن قامتىعان ازاماتتاردى كاسىپكەرلىككە تارتۋعا، سونداي-اق جاڭا باستاعان كاسىپكەرلەردىڭ ەكونوميكالىق مۇمكىندىكتەرىن كەڭەيتۋگە باعىتتالعان. وقۋ بارىسىندا قاتىسۋشىلار بيزنەس جۇرگىزۋ، ەكونوميكا، مەنەدجمەنت جانە ماركەتينگ نەگىزدەرى بويىنشا ءبىلىم الادى.

2025 جىلى اتالعان باعدارلاما بويىنشا 29,3 مىڭ ادام وقۋدان ءوتتى. ونىڭ ىشىندە 17,8 مىڭ ايەل نەمەسە 60,9 پايىزى كۋرستى ءساتتى اياقتاعان.

Abai.kz