الماتىدا قول ۇستاسا تىزبەك قۇرىپ، ءيتتى قۇتقارعان ادامداردىڭ بىرلىگىن ەسكە سالاتىن ارت-نىسان ورناتىلۋدا. قولادان سوعىلعان ەسكەرتكىش وقيعا بولعان سايران سۋ قويماسىنىڭ جاعالاۋىنا قويىلدى. ارت‑نىسان 22 ناۋرىزدا رەسمي تۇردە اشىلدى.  جوبا «ForteBank» اق باستاماسىمەن جۇزەگە استى.

2016 جىلدىڭ جاز مەزگىلىندە سايران وزەنىنە ءتۇسىپ كەتكەن يت جاعاعا شىعا الماي قالعان. سول ساتتە بەيتانىس ادامدار جۇمىلا، شاراسىز جانۋاردى قۇتقارۋعا كىرىسەدى. ولار قول ۇستاسا تىزبەك قۇرىپ، ءبىرى وزەن ارناسىنا تومەن ءتۇسىپ ءيتتى شىعارىپ الدى. وقيعا كۋاگەرلەرىنىڭ ءبىرى تەلەفونعا ءتۇسىرىپ، ۆيدەو كۇللى الەمگە تاراپ، ميلليونداعان قارالىم جينادى. ءار ەلدەن پىكىر بىلدىرگەن وقىرماندار قانداي جاعداي بولسا دا، كومەككە ۇمتىلۋ ادامدىق قاسيەتتىڭ بيىگى ەكەنىن اتاپ ءوتتى.

جاعالاۋداعى قولا ەسكەرتكىش ءدال سول ءساتتى اينا قاتەسىز قايتالاپ تۇر. سوڭعى ءمۇسىننىڭ سوزىلعان قولى قورشاۋدان اسادى، ءار ادام وعان قولىن قويىپ، بىرلىك تىزبەگىنىڭ ءبىر بولىگى بولا الادى.

«ويلانباستان كومەككە ۇمتىلعان مەيىرىمدى جانداردىڭ وقيعاسى بىر‑بىرىمىزگە دەمەۋ بولىپ، قولداۋ تانىتۋ پارىز ەكەنىن ەسكە سالادى.قاراپايىم، بىراق ماڭىزى زور ارەكەتتىڭ سيمۆولىن بەينەلەيتىن ءمۇسىن قالامىزدا بوي كوتەرگەنىنە قۋانىشتىمىز. ەندى ءار جۇرگىنشى قول سوزىپ، بىرلىك تىزبەگىن جالعاستىرا الادى. ءبىز ءۇشىن بۇل – جاي جوبا ەمەس، ىنتىماق پەن ادامي قۇندىلىقتى ەسكە سالاتىن بەلگى. ويتكەنى ءبىز، Forte قىزمەتكەرلەرى، «جۇمىلا كوتەرگەن جۇك جەڭىل» بولاتىنىنا سەنەمىز»، – دەپ اتاپ ءوتتى «ForteBank» اق وكىلى.

ارت‑نىساننىڭ اۆتورى – ەربوسىن مەلدىبەكوۆ. ول – قازاقستان مەن ورتالىق ازياداعى ەڭ تانىمال سۋرەتشىلەردىڭ ءبىرى. قىلوالام شەبەرى تاريحي قۇجاتتاردى، بەينەلەردى، پەيزاج بەن مۇسىندەر، كەيىپكەرلەردى جان-جاقتى زەرتتەپ، جاڭاشا پايىممەن جەتكىزەدى. سۋرەتشىنىڭ تۋىندىلارى Museum of Contemporary Art /انتۆەرپەندەگى زاماناۋي ونەر مۇراجايىندا، گونكونگتاعى Burger Collection جانە M+ Museum, سونداي‑اق سينگاپۋر ۇلتتىق مۇراجايى جانە باسقا دا حالىقارالىق كوللەكتسيالاردىڭ قۇرامىنا قويىلعان.

دەرەككوزى: qaz365.kz

Abai.kz