اشىق حات

اشىق حات

قازاق مەملەكەتى 1991 جىلى قۇرىلعان جوق. 1991 جىلى قازاق ۇلتى ەركىندىك پەن ازاتتىق جولىندا جان پيدا ەتكەن باتىر بابالار كۇرەسىنىڭ ناتيجەسىندە   تاۋەلسىزدىككە قول جەتكىزدى. قازاق حالقىنىڭ تاريحى كونە تۇركىلەردىڭ ءبىر بۇتاعى رەتىندە مىڭداعان جىلدارعا جالعاسقاندىعىمەن، قازاقتىڭ ءوز الدىنا ازات، تۇڭعىش مەملەكەتتىلىگىنىڭ نەگىزى ءحىV عاسىردا قالاندى. ول مەملەكەتتىڭ ىرگەسىن 1456 جىلى شۋ وزەنىنىڭ بويىندا كەرەي مەن جانىبەك باتىرلار سالىپ، قازاق حاندىعىنىڭ العاشقى حانى رەتىندە كەرەيدى اق كيىزگە كوتەرىپ، حان سايلاعان. حاندىق بيلىك دەگەنىمىز قازاق ۇلتىن بىرىكتەرگەن العاشقى ساياسي مەملەكەتتىك قۇرىلىم.

قازاق مەملەكەتتىلىگىنىڭ تاۋەلسىزدىگىنە 17 جىل 10 اي 24 كۇن تولعاندا بۇكىل قازاق ۇلتىن، ونىڭ مەملەكەتىك تاريحىن مانسۇقتاعان ءھام جوققا شىعارعان قادام جاسالدى. بۇل كۇنى «قازاق ەلى» تاريحي- مەموريالدىق كەشەنى اشىلدى. كەشەننىڭ قاق ورتاسىندا، ءوزىنىڭ تۇعىرلى ورنىندا تۇرۋعا ءتيىستى كەرەي مەن جانىبەك حانداردىڭ جانە وزگە دە قازاق باتىرلارىنىڭ قولادان جاسالعان مۇسىندەرى استانا قالاسىنىڭ شەتىندەگى يەن دالاعا، قاراۋسىز، سازبالشىقتىڭ ىشىنە كۇل-قوقىسقا تاستالعان.

ۇلى بابالارىمىزدىڭ ەسكەرتكىشى بيۋدجەتتەن وسى جوباعا ارنايى  بولىنگەن 100 ملن. تەڭگەگە قازاق ساۋلەتشىسى سەمبىعالي سماعۇلوۆتىڭ ءتول تۋىندىسى رەتىندە قىتاي حالىق رەسپۋبليكاسىندا تاپسىرىسپەن جاسالىنعان. ءارى بۇل ەسكەرتكىش قازاقستان رەسپۋبليكاسىنىڭ پرەزيدەنتى ن.ءا.نازارباەۆتىڭ تىكەلەي قولداۋى مەن قاداعالاۋىنىڭ ارقاسىندا ومىرگە كەلدى. الايدا، ەلباسىنىڭ تاپسىرماسى ورىندالماي، تاريحي تۇلعالاردىڭ مۇسىندەرى ايانىشتى كۇيگە تۇسكەنى وكىنىشتى. 

ەسكەرتكىشتىڭ ءوزىنىڭ لايىقتى ورنىندا، ياعني «قازاق ەلى» تاريحي-مەموريالدىق كەشەنىنىڭ باستى مۇسىندەرى رەتىندە تۇرماۋى قازاق ەلىنىڭ ۇلتتىق ار-نامىسىنا تيگەن اۋىر سوققى بولىپ وتىر.

سول سەبەپتى، ەلباسى جانە ۇكىمەت باسشىسى، پارلامەنت دەپۋتاتتارى مەن استانا قالاسىنىڭ اكىمى تاريحي ادىلەتتىلىكتى قالپىنا كەلتىرۋگە مىندەتتى ءھام بۇل ءىس ولاردىڭ ۇلت الدىنداعى ازاماتتىق بورىشى دەپ ەسەپتەيمىز.

وسى ورايدا ۇلت اتىنان بىزدەر، قازاق جاستارى، 2009 جىلدىڭ 16 جەلتوقسانى، تاۋەلسىزدىك مەرەكەسىنە دەيىن ءباھادۇر بابالارىمىز كەرەي مەن جانىبەكتىڭ  جانە قازاق باتىرلارىنىڭ ەسكەرتكىشتەرى «قازاق ەلى» تاريحي-مەموريالدىق كەشەنىنە قويىلۋىن تالاپ ەتەمىز!

«الاش تۋى استىندا،
كۇن سونگەنشە سونبەيمىز.
ەندى الاشتى ەشكىمنىڭ،
قورلىعىنا بەرمەيمىز!» – دەيتىن ءاربىر قازاق ازاماتىن وسى اشىق حاتقا قول قويىپ، قولداۋ كورسەتۋگە شاقىرامىز! بۇل ءبىزدىڭ ۇلت الدىنداعى ازاماتتىق پارىزىمىز.
اشىق حاتقا قول قويۋ ءۇشىن سايتتىڭ پىكىر قالدىراتىن تۇسىندا اتى-جونىڭىزبەن ەلەكتروندىق پوشتاڭىزدىڭ ادرەسىن جازىپ قالدىرۋىڭىزدى وتىنەمىز.

قۇرمەتپەن،
Abai.kz اقپاراتتىق پورتالى