مۇحاممەدسايد باعاشاروۆتىڭ ەسىمىمەن، رولدەرىمەن جاقسى تانىسپىن. الدىڭعى جىلدارى ول تۇسكەن «اق پەن قارا»، «الپىستان اسىپ بارامىن»، «تاماشا» تەلەحيكايالارىنان ايتۋلى بەينەلەرىن تاماشالاعانمىن. ال شىن ومىردە بەتپە-بەت ەڭ العاش كەزدەسكەنىم بيىلعى جىلدىڭ جاز مەزگىلى ەدى. كۋرستاسىم ەرنار مۇحامبەتپەن سۇحبات قۇرۋعا كەلگەنىمدە تەاتر الدىندا ەرناردىڭ قاسىندا مۇحاممەداسيدتتىڭ تۇرعانىن كوردىم. ەرنار ەكەۋمىز سۇحباتقا كەتتىك، ال مۇحاممەدسايد باعاشاروۆ اۋلادا ۆەلوسيپەد تەبۋگە اتتاندى.

مۇحاممەدسايدتتىڭ شىعارماشىلىعى تۋرالى بۇنىڭ الدىندا ەكى ماقالا جازدىم. ال بۇگىنگى جازبامنىڭ جولى ەرەكشە. مەن بۇگىن مۇحاممەدسايدتتىڭ ءبىر ەرەكشە رولىنە توقتالعىم كەلەدى. ول مادينا وماروۆانىڭ «شانەل №5» دەرەكتى دراماسىنداعى يۋري ۋزيپەنكو بەينەسى. يۋري ۋزيپەنكو-ومىردە بولعان ادام. الجير لاگەرى باستىعىنىڭ ورىنباسارى لاۋازىمىن اتقارعان جان. م.باعاشاروۆ كەيىپتەۋىندەگى يۋ.ۋزيپەنكو-قاتىگەز، ايەلدەرگە زورلىق-زومبىلىق كورسەتكەن، قىزمەتىن ورىنسىز پايدالاناتىن جاعىمسىز كەيىپكەر. اكتەر مۇحاممەدسايد ۋزيپەنكونى-قانىنا جەكسۇرىندىق سىڭگەن وزگە ۇلت وكىلى ەتىپ كەيىپتەيدى. الەمنىڭ ءبىرىنشى ۇستازى اريستوتەل: «درامادا ارەكەت بولۋ كەرەك، ەگەر ارەكەت بولماسا كەيىپكەردىڭ مىنەزى اشىلمايدى»، - دەيتىن قاناتتى ءسوزى بار.

مۇحاممەدسايد ايەلدەردى اڭدۋ، ولارعا قول كوتەرۋ، دورەكەلىك تانىتۋ ارقىلى ۋزيپەنكونىڭ بولمىسىن اشا الدى. مۇحاممەدسايد-يۋريدان كورەرمەن اكتەردى ەمەس، كەيىپكەردىڭ ءوزىن كورىپ وتىرعانداي سەزىنەدى. مىنە، اكتەرلىك شەبەرلىك دەگەن وسى. مۇحاممەدسايدتىڭ اتالمىش رولىنەن ك.ستانيسلاۆسكي: «سەنەمىن» جۇيەسىن نەمەسە ك.ستانيسلاۆسكيدىڭ «كەيىپكەرجاندىلىق» ياعني، كەيىپكەرمەن ءومىر ءسۇرۋىن كورەمىز. مۇحاممەدسايدتىڭ يۋري ۋزيپەنكوسىن كورگەن كەزدە كسرو حالىق ءارتيسى، ابىز اكتەر ءاسانالى ءاشىموۆتىڭ: «ماسقارا، تەاتر اناسى ءسابيرا مايقانوۆا «دون جۋاننىڭ دۋمانىنداعى» جەزوكشەلەر ءۇيىنىڭ باسشىسىن قالاي قۇلپىرتادى، ءا؟!» - دەگەن ەستەلىگى ەسىمە تۇسەدى. شىنىمەندە، مۇحاممەدسايدتىڭ ۋزيپەنكو بەينەسىن كورە وتىرىپ، جەككورىپ كەتەتىنىڭ دە جاسىرىن ەمەس. بۇل جوعارىدا ايتىلعان «سەنەمىن» جۇيەسىنە ادەمى ۇيلەسىپ تۇر.  كسرو حالىق ءارتيسى س.مايقانوۆا: «اكتەر بولۋ — بۇل ءرولدى سىرلاماي، بوياماي، شىنايى ومىردەي ويناۋ»، - دەيدى. مۇحاممەدسايد قاي ءرولدى ويناسا دا، شىنايى ومىردەي سەندىرىپ، ناندىرىپ وينايدى. وينامايدى، ءومىر سۇرەدى.

اكتەردىڭ ءار جانرداعى اكتەرلىك شەبەرلىگى، دايىندىق بارىسىنداعى ىزدەنىسى، كورەرمەن الدىنداعى تالپىنىسى، بۇگىنگى تاڭداعى كوپ اكتەرلەرگە ۇلگى. ساحنادا ءوزىنىڭ بەينەسىن سىرتقى جانە ىشكى جان-دۇنيەلەرىنە تەرەڭ بويلاپ، جانىن سالىپ، تەمپەرامەنتىن ايامايتىن ونەر يەسى. مىنە، تالانتتى اكتەر مۇحاممەدسايد باعاشاروۆتىڭ اكتەرلىك ونەرى، يۋري ۋزيپەنكوسى وسىنداي!

باحتيار تۇرسىن، تەاترتانۋشى

Abai.kz