الاتاۋدىڭ اسقار شىڭدارىنا ىڭكارلەنە قاراعان جان، ونىڭ باۋرايىندا تۇنىپ تۇرعان تالاي تاعدىر بارىن اڭعارا بەرمەس. سول تاعدىرلاردىڭ توعىسقان ءبىر مەكەنى – «الاتاۋ» ءداستۇرلى ونەر تەاترى. بۇل شاڭىراقتا ونەر عانا ەمەس، جۇرەكتىڭ دە ءوز ءۇنى، ءوز شىندىعى بار. ساحنادا ايتىلعان ءار ءسوز، ءار اۋەن، ءار قيمىل – ادام جانىنىڭ ايناسى ىسپەتتى. ال سول ايناعا ۇڭىلگەن جاندار كەيدە ءوز سىڭارىن دا وسى جەردەن تابادى. ون جىل ىشىندە بۇل وردا بەس بىردەي شاڭىراقتىڭ كەرەگەسىن كەڭەيتىپ، بەس تاعدىردى ءبىر ارناعا توعىستىردى. قوزى كورپەش – بايان سۇلۋ كۇنىنىڭ قارساڭىندا بۇل حيكايالار ءتىپتى دە جۇرەككە جاقىن ەستىلەدى.

سۋرەت: اۆتوردىڭ مۇراعاتىنان الىندى.

ايبەك پەن ايگەرىمنىڭ كەزدەسۋى – جازدىڭ جايما-شۋاق ءبىر كۇنىندەي اڭداۋسىز باستالعان اسەر. 2020 جىلدىڭ ماۋسىمىندا ساحنا ۇستىندە ءبىر ءسات كوزگە تۇسكەن بەينە، كوڭىلدىڭ ءبىر تۇكپىرىنە جارىق ساۋلە تۇسىرگەندەي بولدى. «اباي-توعجان» قويىلىمىنىڭ قاربالاس دايىندىعى ولاردى ءبىر-بىرىنە جاقىنداتىپ، بەينە ءبىر ەكى وزەننىڭ ءبىر ارناعا قۇيىلعانىنداي سەزىمگە جەتەلەدى. اۋەلدە جاي عانا ارىپتەستىك اڭگىمە ەدى، كەيىن ول سىرعا، سىردان – ساعىنىشقا ۇلاستى. ايبەك جۇرەگىندەگى وتتى جاسىرا الماي، دوستارى ارقىلى جول تاۋىپ، ىقىلاسىن ءبىلدىردى. 2021 جىلدىڭ كوكتەمىندە ءبۇر جارعان بۇل سەزىم جىلدار وتە تامىرىن تەرەڭگە جىبەرىپ، 2024 جىلدىڭ كۇزىنە قاراي ماۋەلى بايتەرەككە اينالدى. بۇگىندە سول بايتەرەكتىڭ ساياسىندا ءسابي كۇلكىسى سىڭعىرلاپ تۇر.

سۋرەت: اۆتوردىڭ مۇراعاتىنان الىندى.

وسى ءبىر نازىك سەزىمنىڭ وربۋىنە كۋا بولعان تاعدىرلاس جاندار – نۇربولات پەن ساۋلە. ولاردىڭ ماحابباتى دا اسىقپاي توگىلگەن كۇيدەي باياۋ باستالدى. سول ءبىر «اباي-توعجان» قويىلىمىنىڭ اياسىندا تانىسىپ، ءبىر-بىرىنە جاقىنداي تۇسكەن قوس جۇرەك نۇربولاتتىڭ تۋعان كۇن كەشىندە ءتىپتى جاقىن تانىستى. اڭگىمە وربىگەن سايىن، كوڭىلدىڭ دە قاقپاسى ايقارا اشىلعانداي بولدى. ءۇش جىلعا سوزىلعان بۇل سەزىم ۋاقىت سىنىنان سۇرىنبەي ءوتىپ، 2025 جىلى شاڭىراق كوتەرۋمەن تۇيىندەلدى.

بۇل ەكى جۇپتىڭ اراسىندا كوزگە كورىنبەس، بىراق جۇرەكپەن سەزىلەر بايلانىس بار. ايبەك پەن نۇربولات – بالا كۇننەن تانىس دوستار بولسا، ايگەرىم مەن ساۋلە ونەر جولىندا قاتار شىڭدالعان، ءبىر وقۋ ورنىندا ءبىلىم العان جاندار. تەاتر قابىرعاسىندا بۇل تورتەۋ تەك ارىپتەس ەمەس، ءبىر-بىرىنە تىلەۋلەس، سىرلاس جانعا اينالدى. قوس-قوستان سەرۋەندەپ، ورتاق قۋانىش پەن اسەردى ءبولىسۋ – ولاردىڭ بايلانىسىن بەكىتە ءتۇستى. ءبىرىنىڭ سەزىمى ءبۇر جارسا، ەكىنشىسى سوعان كۋا بولىپ، بىرگە قۋاندى. وسىلايشا ەكى ماحاببات حيكاياسى ءبىر ورنەكتىڭ قوس جىبىندەي قاتار ءورىلدى.

سۋرەت: اۆتوردىڭ مۇراعاتىنان الىندى.

ال ايدوس پەن ايدانانىڭ جولى – ءۇنسىز باستالىپ، كۇرت وزگەرىسكە تولى اڭگىمە. العاشقىدا الىستان عانا سۇيسىنگەن كوڭىل ۇزاق ۋاقىت بويى ىشتە بۇعىپ جاتتى. تەاتر ساحناسىنداعى ءار كەزدەسۋ، ءاربىر ورتاق شارا – ونىڭ جۇرەگىندەگى سەزىمدى تەربەتە ءتۇستى. بىراق تاعدىردىڭ ءوز ۋاقىتى بار. 2023 جىلى ءبىر كەشتىڭ ساتىندە باستالعان تانىستىق جاڭا ءبىر ءومىردىڭ ەسىگىن اشقانداي بولدى. ءبىر ايعا جەتەر-جەتپەس ۋاقىتتا ولاردىڭ اڭگىمەسى ۇزىلمەيتىن ارناعا اينالدى. العاشقى كەزدەسۋدىڭ ءوزى – تابيعات اياسىندا، تازا اۋامەن تىنىستاپ، ەركىن سىرلاسۋ – جان دۇنيەلەرىن جاقىنداتتى. باتىل شەشىم قابىلداندى، سەزىمگە سەنىم قوسىلدى. توعىز اي ىشىندە قوس اۋلەت تابىسىپ، جاڭا شاڭىراق كوتەرىلدى. قازىر ەگىز ۇلدىڭ كۇلكىسى سول ءبىر ءۇنسىز باستالعان سەزىمنىڭ ايعاعى ىسپەتتى.

سۋرەت: اۆتوردىڭ مۇراعاتىنان الىندى.

دياس پەن ءتوميريستىڭ ماحابباتى – لاپ ەتكەن جالىن سەكىلدى. 2022 جىلدىڭ كۇزى ولار ءۇشىن تەك مەزگىل اۋىسۋى ەمەس، جۇرەك كۇيىنىڭ وزگەرۋى بولدى. دوستىقتىڭ نازىك ءجىبى ءبىر ساتتە ماحابباتتىڭ بەرىك ارقانىنداي بەكي ءتۇستى. ءتوميريستىڭ تۋعان كۇنى – تاعدىردىڭ شەشۋشى ساتىنە اينالدى: سول كۇنى ايتىلعان ءسوز، تاعىلعان ساقينا – ءبارى جاڭا ءومىردىڭ باستاۋىنداي ەدى. سول كۇننەن كەيىن ولار ءۇشىن ۋاقىتتىڭ ءوزى باسقا ىرعاقپەن سوققانداي بولدى. ءبىر كۇن كورمەسە، ءبىر الەم كەمىگەندەي سەزىم، بىرگە وتكەن ءار ءساتتىڭ قادىرى – ولاردىڭ بايلانىسىن بۇرىنعىدان دا تەرەڭ ەتتى. 2023 جىلى جاسالعان ۇسىنىس – سول سەزىمنىڭ زاڭدى جالعاسى. قازىر ولار اتا-انا اتانىپ، ماحابباتتىڭ شىن مانىندە ومىرگە اينالعانىن دالەلدەپ وتىر.

سۋرەت: اۆتوردىڭ مۇراعاتىنان الىندى.

ەرقانات پەن قۇرالايدىڭ حيكاياسى – بايقالماي باستالعانىمەن، جۇرەكتە تەرەڭ ءىز قالدىرعان تاعدىر. 2022 جىلعى «ايمان – شولپان» قويىلىمىنىڭ قاربالاسى كەزىندە العاش كوزگە تۇسكەن تانىستىق باستاپقىدا ءمانسىز كورىنگەندەي ەدى. بىراق كۇن سايىنعى جۇزدەسۋ، ورتاق داستارقان باسىنداعى اڭگىمە، ۇزاق گاسترولدىك ساپارلار – ءبارى-ءبارى جۇرەكتەردى ءبىر-بىرىنە جاقىنداتا ءتۇستى. ەرقاناتتىڭ ءۇنسىز ءىلتيپاتى، بايقاتپاي جاساعان قامقورلىعى قۇرالايدىڭ كوڭىلىندە جىلىلىق ۇيالاتتى. سەمەي ساپارىنداعى ءبىر اۋىز ءسوز – ازىلگە ۇقساس تىلەك – كەيىن تاعدىردىڭ شىندىققا اينالعان يشاراسى بولدى. دوستىقتىڭ نازىك ءجىبى ۋاقىت وتە ماحابباتتىڭ بەرىك ارقاۋىنا اينالىپ، ولار دا شاڭىراق كوتەردى. بۇگىندە ولاردىڭ ءومىرى بالا كۇلكىسىمەن اجارلانىپ تۇر.

بۇل بەس تاعدىر – بەس بولەك اۋەن. ءبىرى باياۋ توگىلگەن كۇيدەي، ءبىرى لاپىلداعان جالىنداي، ءبىرى تەرەڭ تولقىنداي. بىراق بارلىعىنىڭ باستاۋى ءبىر – شىنايى سەزىم. ونەردىڭ ىشىندە تۋعان ىقىلاس جاساندىلىقتان ادا، سوندىقتان دا ماڭگىلىككە ۇلاسۋعا بەيىم.

جۇرەككە جۇگىنگەن جان عانا تىرشىلىكتىڭ شىن ءمانىن تەرەڭنەن تاني الادى. ال وسى تەاتر قابىرعاسىندا ءبۇر جارعان ماحابباتتار – سول شىندىقتىڭ ءۇنسىز دالەلى. مۇندا ساحناداعى ءرول اياقتالعانىمەن، ومىردەگى ءرول ەندى عانا باستالادى.

ون جىل – ۋاقىتتىڭ ولشەمى عانا ەمەس، سەزىمنىڭ شەجىرەسى. توعىسقان تاعدىرلار، تابىلعان باقىت، جالعاسقان ومىرلەر – ءبارى وسى شاڭىراقتىڭ تاريحىنا اينالعان. ال «الاتاۋ» ءداستۇرلى ونەر تەاترى ءالى تالاي جۇرەكتىڭ ءۇنىن ەستىپ، تالاي ماحابباتتىڭ كۋاسى بولارى ءسوزسىز.

ينارا اۋباكيروۆا

Abai.kz