بۇل تۋرالى پرەمەر-مينيستر ۇكىمەت وتىرىسىندا ايتتى. تاريفتىك ساياسات بولجامدى ءارى ينفلياتسيانىڭ ماقساتتى كورسەتكىشتەرىنە سايكەس كەلۋگە ءتيىس ەكەندىگىنە توقتالدى.

"تاريفتىك ساياسات بولجامدى ءارى ينفلياتسيانىڭ ماقساتتى كورسەتكىشتەرىنە سايكەس كەلۋگە ءتيىس. ۇلتتىق ەكونوميكا، ەنەرگەتيكا، ونەركاسىپ جانە قۇرىلىس مينيسترلىكتەرى تاريفتەر مەن بەنزين باعاسىنا ءموراتوريدىڭ اياقتالۋىنا بايلانىستى ولاردىڭ ينفلياتسيا دەڭگەيىنە ۇلەسىن جوعارىلاتپاۋ ءۇشىن شارالار قابىلداۋى قاجەت", – دەدى ۇكىمەت باسشىسى.

ۇكىمەت باسشىسى نارىقتاردى جۇيەلى تۇردە دەمونوپوليزاتسيالاپ، ازىق-تۇلىك، وتىن، كولىك جانە كوممۋنالدىق قىزمەت نارىقتارىندا مونوپولياعا قارسى باقىلاۋدى كۇشەيتۋ كەرەكتىگىن باسا ايتتى.

"وسىعان بايلانىستى ۇلتتىق ەكونوميكا مينيسترلىگى باسەكەلەستىكتى قورعاۋ جانە دامىتۋ اگەنتتىگىمەن جانە سالالىق مەملەكەتتىك ورگاندارمەن بىرگە اتالعان باعىتتا بىرلەسكەن جۇمىستى جالعاستىرۋى قاجەت", – دەدى ولجاس بەكتەنوۆ.

Abai.kz