الماتىدا 19 ساۋىردە توعىزىنشى Almaty Half Marathon ءوتىپ، وعان الەمنىڭ 44 ەلىنەن 10 000-نان استام جەلاياق قاتىستى. اۋقىمدى سپورتتىق ءىس-شارا ءداستۇرلى تۇردە قازاقستانداعى ءىرى جۇگىرۋ ماۋسىمىنىڭ شىمىلدىعىن ءتۇرىپ، قالانىڭ حالىقارالىق سپورتتىق تۋريزم ورتالىقتارىنىڭ ءبىرى رەتىندەگى مارتەبەسىن تاعى ءبىر مارتە راستادى.

بيىل جارتىلاي مارافون شەتەلدىك قاتىسۋشىلار سانى بويىنشا رەكورد ورناتتى: جارىسقا 800-دەن استام شەتەلدىك سپورتشى قاتىستى. اسىرەسە، رەسەي، قىرعىزستان جانە وزبەكستان ەلدەرىنەن كەلگەن جەلاياقتار سانى كوپ بولدى. سونىمەن قاتار قىتاي، اقش، ۇلىبريتانيا، ۋكراينا، بەلارۋس جانە ەۋروپا، ازيا، امەريكا مەن تاياۋ شىعىستىڭ باسقا دا ەلدەرىنەن جارىس جولىنا شىقتى.

ۇيىمداستىرۋشىلار — «ءبىرىنشى بولۋ باتىلدىق» كورپوراتيۆتىك قورىنىڭ مالىمەتىنشە، جىل سايىن قاتىسۋشىلار اۋقىمى كەڭەيىپ، مارافون الەمنىڭ تۇكپىر-تۇكپىرىنەن جۇگىرۋ اۋەسقويلارىن باسىن قوساتىن ماڭىزدى الاڭعا اينالىپ كەلەدى.

سپورتتىق سايىسپەن قاتار، ءىس-شارا اياسىندا «تازا قازاقستان» جالپىۇلتتىق باستاماسىنا وراي ەكولوگيالىق اكتسيا دا ۇيىمداستىرىلدى.

جارىس باعىتى بويىندا جانە مارەگە جەتۋ ايماعىندا قالدىقتاردى بولەك جيناۋعا ارنالعان ارنايى ورىن ۇيىمداستىرىلىپ، ەكولوگيالىق مازمۇنداعى ينتەراكتيۆتى ايماقتار جۇمىس ىستەدى. جينالعان قايتا وڭدەلەتىن قالدىقتار EcoNetwork سەرىكتەسىنىڭ قولداۋىمەن وڭدەۋگە جىبەرىلدى.

ۇيىمداستىرۋشىلار قورشاعان ورتاعا تۇسەتىن سالماقتى ازايتۋعا ايرىقشا كوڭىل ءبولىپ، ءبىر رەتتىك ماتەريالداردى قولدانۋدى قىسقارتىپ، باسپا ونىمدەرىنىڭ ءبىر بولىگىنەن باس تارتتى. سونىمەن بىرگە، تۇراقتى ءارى جاۋاپتى تۇتىنۋ مادەنيەتىن ەنگىزۋگە باسىمدىق بەرىلدى.

مارافون اياسىندا «تەپلو» قايىرىمدىلىق باستاماسى دا وتكىزىلىپ، قاتىسۋشىلار قالدىرعان جىلى كيىمدەر جينالىپ، سۇرىپتالىپ، مۇقتاج جاندارعا تابىستالدى.

الماتى قالاسى سپورت باسقارماسىنىڭ حابارلاۋىنشا، مۇنداي اۋقىمدى شارالار بۇقارالىق سپورتتى دامىتۋعا عانا ەمەس، قوعامدا ەكولوگيالىق مادەنيەتتى قالىپتاستىرۋعا دا زور ىقپال ەتەدى. بۇل — «تازا قازاقستان» باستاماسىنىڭ نەگىزگى ماقساتتارىمەن تولىق ۇندەسەدى.

ۇيىمداستىرۋشىلار قاتىسۋشىلاردىڭ جايلىلىعىن دا نازاردان تىس قالدىرمادى: مارەگە جەتۋ ايماعىندا انا مەن بالاعا ارنالعان ارنايى بولمە جاساقتالىپ، بولەك جانە ينكليۋزيۆتى سانيتارلىق ايماقتار قاراستىرىلدى.

Almaty Half Marathon الماتى قالاسى اكىمدىگىنىڭ قولداۋىمەن ءوتتى.

Abai.kz