پرەزيدەنتكە حات: شاحانوۆتىڭ اقىرعى اماناتى
قازاقستاننىڭ حالىق جازۋشىسى، قازاقستاننىڭ ەڭبەك ەرى، كورنەكتى اقىن، دراماتۋرگ، قوعام قايراتكەرى مۇحتار شاحانوۆتىڭ سوڭعى اماناتى جاريالاندى.
حاتتى الەۋجەلىگە «Uzhdan» جوباسىنىڭ جەتەكشىسى نازەركە شاكىرباي جۇكتەگەن. ول اقىن ءحال ۇستىندە جاتقاندا جارى حانشايىم شاحانوۆانىڭ پرەزيدەنت قاسىم-جومارت توقاەۆقا حات جولداعانىن ايتتى.
«قۇرمەتتى مۇحتار شاحانوۆتى جوقتاپ، وتباسىنا كوڭىل ايتىپ جاتقان بارشا قاۋىم!
سىزدەردەن مۇحتار اتامىزدىڭ سوڭعى اماناتىن ورىنداۋعا كومەك سۇرايمىز. ولگەننىڭ ارتىنداعى ءتىرىنىڭ پارىزى – ونى ارۋلاپ جەر قوينىنا تاپسىرۋ. مۇحتار شاحانوۆتىڭ ءتىرى كەزىندەگى سوڭعى اماناتى – ءوز اتا-باباسىنىڭ مەكەنى وتىراردا، ارىستان باب كەسەنەسىنىڭ ماڭىنا جەرلەۋ ەدى. بۇل جاي عانا تىلەك ەمەس، ەلىنىڭ ارى، نامىسى بولا بىلگەن رۋحتى اقىننىڭ حالقىنا تىلەك اماناتى»، - دەيدى نازەركە شاكىرباي.
اقىن ءحال ۇستىندە جاتقان ساتتەن باستاپ، جارى حانشايىم شاحانوۆا قر پرەزيدەنتى قاسىم-جومارت توقاەۆقا حات جولداعان ەكەن. وندا اقىننىڭ سوڭعى اماناتى ناقتى جازىلعان.
ءوتىنىش حات
قۇرمەتتى قاسىم-جومارت كەمەلۇلى!
مەن، مۇحتار شاحانوۆتىڭ جارى حانشايىم شاحانوۆا، سىزگە قازاق رۋحانياتىنىڭ كورنەكتى وكىلى، كسرو حالىق دەپۋتاتى، قازاقستاننىڭ ەڭبەك ەرى، اقىن مۇحتار شاحانوۆتىڭ تاعدىرى مەن سوڭعى اماناتىنا بايلانىستى ۇلكەن الاڭداۋشىلىقپەن ءوتىنىش جولدايمىن.
ۇلتىمىزدىڭ ءبىرتۋار پەرزەنتى، «جەلتوقسان» وقيعاسىنىڭ شىندىعىن الەمگە جەتكىزگەن قايراتكەر، بۇكىل تۇركى الەمىنە ورتاق تۇلعا بۇگىندە اۋىر دەرتكە شالدىعىپ، ءحالى اسا كۇردەلى جاعدايدا.
مۇحتار شاحانوۆ — تەك اقىن عانا ەمەس، ول ۇلتتىق نامىستىڭ سيمۆولى، قازاق رۋحانياتىنىڭ اسقار شىڭى، سانالى عۇمىرىن ەلىنىڭ ازاتتىعى مەن انا ءتىلىنىڭ مارتەبەسىنە ارناعان ءىرى تۇلعا.
وسىنداي سىن ساعاتتا اقىننىڭ ەڭ سوڭعى ءارى ماڭىزدى اماناتى — ءوزىنىڭ ماڭگىلىك تىنىس تاباتىن جەرى رەتىندە اتا-بابالارىمىزدىڭ كيەلى مەكەنى، وتىرار وڭىرىندەگى ارىستانباب كەسەنەسىنىڭ ىرگەسىنە جەرلەنۋ.
اتالعان نىساننىڭ رەسپۋبليكالىق ماڭىزى بار تاريحي-مادەني ەسكەرتكىش ەكەنىن تولىق تۇسىنەمىز. وسىعان بايلانىستى جەرلەۋ جانە مۇمكىن بولاتىن مەموريالدىق بەلگى ورناتۋ جۇمىستارى قازاقستان رەسپۋبليكاسىنىڭ قولدانىستاعى زاڭناماسىنا، اتاپ ايتقاندا «تاريحي-مادەني مۇرا وبەكتىلەرىن قورعاۋ جانە پايدالانۋ تۋرالى» زاڭ تالاپتارىنا جانە مۋزەي-قورىقتىڭ ارحيتەكتۋرالىق تالاپتارىنا تولىق سايكەس جۇرگىزىلەتىنىنە كەپىلدىك بەرەمىز.
وسىنى ەسكەرە وتىرىپ، سىزدەن مۇحتار شاحانوۆتىڭ ۇلت الدىنداعى ەرەن ەڭبەگىن، تاريحي تۇلعاسىن جانە حالىقارالىق دەڭگەيدەگى بەدەلىن نازارعا الىپ، ونىڭ سوڭعى اماناتىنىڭ ورىندالۋىنا مەملەكەتتىك دەڭگەيدە قولداۋ كورسەتۋىڭىزدى سۇرايمىن.
اقىننىڭ كيەلى توپىراقتا جەرلەنۋى — بۇل تەك وتباسىنىڭ ءوتىنىشى عانا ەمەس، بۇل ۇلتتىق رۋحقا، تاريحقا جانە ۇلى تۇلعاعا كورسەتىلەتىن زور قۇرمەت دەپ بىلەمىز.
وسى ماسەلە بويىنشا ءتيىستى رۇقساتتىڭ بەرىلۋىنە ىقپال ەتىپ، سونداي-اق اتالعان ۇدەرىستى قازاقستان رەسپۋبليكاسىنىڭ مادەنيەت جانە اقپارات مينيسترلىگى جانە تۇركىستان وبلىسىنىڭ اكىمدىگىمەن ۇيلەستىرۋگە تاپسىرما بەرۋىڭىزدى وتىنەمىن.
بۇل — تەك شاحانوۆ وتباسىنىڭ عانا ەمەس، ەل اعالارى مەن زيالى قاۋىم وكىلدەرىنىڭ ورتاق تىلەگى.
ءسىزدىڭ ءادىل شەشىمىڭىزگە جانە ۇلتتىق قۇندىلىقتارعا دەگەن جاناشىرلىعىڭىزعا سەنىم ارتا وتىرىپ، اتالعان وتىنىشكە وڭ شەشىم قابىلدانادى دەپ ۇمىتتەنەمىن.
Abai.kz
