ەلىمىزدە بىلتىر قابىلدانعان “بانك تۋرالى” زاڭدا تسيفرلىق تەڭگەنىڭ مارتەبەسى ايقىندالىپ، قارجى قۇرالى زاڭدىق كۇشىنە ەندى. قازىرگى ۋاقىتتا تسيفرلىق تەڭگە ۇلتتىق قور ەسەبىنەن جوبالاردى قارجىلاندىرۋ كەزىندە قولدانىلىپ ءجۇر. مەملەكەت باسشىسى 2025 جىلداعى جولداۋىندا تسيفرلىق تەڭگەنى رەسپۋبليكالىق جانە جەرگىلىكتى بيۋدجەتتە، سونداي-اق مەملەكەتتىك حولدينگتەردىڭ بيۋدجەتىندە دە پايدالانۋدى تاپسىردى. قر ۇلتتىق بانكى اقپارات جانە كوممۋنيكاتسيالار دەپارتامەنتىنىڭ ديرەكتورى اسان احمەتجان “24KZ” تەلەارناسىنداعى ء“تۇيىن” باعدارلاماسىنا بەرگەن سۇحباتىندا تسيفرلىق تەڭگەنىڭ بولاشاعى تۋرالى ويىمەن ءبولىستى.

“تسيفرلىق تەڭگەنىڭ مۇمكىندىكتەرى زور. ول بولاشاقتا تەحنولوگيالىق ىلگەرىلەۋگە جول اشادى. بانكتەر وزدەرىنىڭ باسەكەگە قابىلەتتىلىگىن ارتتىرۋ ءۇشىن تسيفرلىق تەڭگەنىڭ مۇمكىندىكتەرىن بارىنشا پايدالانۋ ءۇشىن ءتۇرلى ونىمدەر ازىرلەپ، ۇسىنادى دەگەن ويدامىز. قازىرگى تاڭدا بانكتەر ءتۇرلى ونىمدەر ۇسىنىپ جاتىر. تسيفرلىق يپوتەكادان باستاپ نەسيەلەۋگە دەيىن. سوعان قولجەتىمدىلىكتى ارتتىرۋ ءۇشىن تسيفرلىق تەڭگە ەنگىزىلىپ جاتىر”، - دەدى اسان احمەتجان.

سپيكەردىڭ ايتۋىنشا، تسيفرلىق تەڭگەنى كەز-كەلگەن تۇرعىن پايدالانا الادى.

“تسيفرلىق تەڭگە ول بولەك ۆاليۋتا ەمەس. ول ءوزىمىزدىڭ ءتول تەڭگەمىزدىڭ ءۇشىنشى ءتۇرى. مىسالى، ءداستۇرلى قولما-قول اقشا مەن بانك شوتىنداعى ەلەكتروندى تۇردەگى اقشا بار. ال تسيفرلىق تەڭگە - ول قولما-قول جانە ەلەكتروندى اقشانىڭ قاسيەتتەرىن بىرىكتەرگەن ءۇشىنشى ءتۇرى. مىسالى، قولما-قول 10 مىڭ تەڭگەڭىزدى تسيفرلىق تەڭگەدەگى شوتىڭىزعا اۋدارساڭىز، ول تسيفرلىق 10 مىڭ تەڭگەگە اينالادى”، - دەپ ءتۇسىندىردى باعدارلاما قوناعى.

Abai.kz