ءماسىموۆتىڭ بۇرىنعى كۇيەۋ بالاسى وزىنە تاعىلعان ايىپتاردى تەرىسكە شىعاردى. 

حالىقارالىق ىزدەۋدە جۇرگەن قازاقستاندىق كاسىپكەر ازامات قاپەنوۆ الەۋمەتتىك جەلىدە ۆيدەومالىمدەمە جاساپ، وزىنە قاتىستى ايىپتاۋلاردى جوققا شىعاردى.

ول «قازاقستاننان قارجى جىمقىرىپ، شەتەلدە جاسىرىندى» دەگەن اقپاراتتىڭ شىندىققا جاناسپايتىنىن مالىمدەدى.

كاسىپكەردىڭ ايتۋىنشا، ونىڭ وتباسىنا تيەسىلى «ەۆروترانسگرۋپپ» كومپانياسى قىتايمەن شەكاراداعى دوستىق ستانتسياسىندا ءىرى لوگيستيكالىق پورت سالىپ جاتىر.

قاپەنوۆ 51 گەكتار جەردىڭ جەكە مەنشىكتەن ساتىپ الىنعانىن جانە جوبا بانك نەسيەسى ەسەبىنەن جۇزەگە اسىپ جاتقانىن اتاپ ءوتتى.

ونىڭ مالىمەتىنشە، 2022 جىلى باستالعان نىسان قۇرىلىسى 2023 جىلدان باستاپ ايىنا شامامەن 1 ملن دوللار تابىس اكەلە باستاعان.

Abai.kz