تۇركيا رەسپۋبليكاسىنىڭ پرەزيدەنتى رەجەپ تايىپ ەردوعاننىڭ قازاقستانعا جاساعان مەملەكەتتىك ساپارى اياسىندا بىرقاتار ماڭىزدى كەلىسىمگە قول قويىلدى. ماقۇلدانعان 14 قۇجاتتىڭ ىشىندە اسكەري سالاداعى ىنتىماقتاستىقتى نىعايتۋ كوزدەلگەن.

سونىڭ ىشىندەگى ەڭ ماڭىزدىسى — «ANKA» ۇشقىشسىز ۇشۋ اپپاراتتارىن ءوندىرۋ جانە ولارعا سەرۆيستىك قىزمەت كورسەتۋ جونىندەگى بىرلەسكەن كاسىپورىن قۇرۋ تۋرالى كەلىسىم.

ANKA — تۇركيانىڭ الەمگە تانىمال ۇشقىشسىز ۇشۋ اپپاراتى (ۇۇا). ورتا بيىكتىكتە ۇزاق ۋاقىت ۇشا الاتىن بۇل جۇيە بارلاۋ، باقىلاۋ، دەرەكتەر جيناۋ جانە قاجەت جاعدايدا نىساناعا ءدال سوققى بەرۋ وپەراتسيالارىنا ارنالعان.

2010 جىلى العاشقى نۇسقاسى تانىستىرىلعان دروننىڭ بۇگىندە ANKA-A, ANKA-S جانە ANKA III سىندى بىرنەشە ۇلگىسى بار.

ولار ۇنەمى زامان تالابىنا ساي جەتىلدىرىلىپ كەلەدى:

• ANKA-S: سپۋتنيك ارقىلى باسقارىلادى، بۇل ونىڭ كەز كەلگەن ۋاقىتتا (كۇندىز-ءتۇنى) جانە الىس قاشىقتىقتا وپەراتسيا جۇرگىزۋىنە مۇمكىندىك بەرەدى.
• ANKA III: جاڭا بۋىنداعى بۇل درون رەاكتيۆتى قوزعالتقىشپەن جابدىقتالعان. ونىڭ ەرەكشەلىگى — رادارعا از بايقالادى (ستەلس تەحنولوگياسى) جانە شابۋىل جاساۋ الەۋەتى وتە جوعارى.

وپتيكالىق كامەرا، رادار جانە لازەرلىك جۇيەلەرمەن جابدىقتالعان بۇل اپپاراتتار اۋادا 30 ساعاتقا دەيىن ۇزدىكسىز ۇشا الادى جانە 9 مىڭ مەتر بيىكتىكتە تاپسىرمالاردى ەركىن ورىندايدى. سونداي-اق، جۇيە تولىقتاي اۆتوماتتى تۇردە ۇشىپ-قونۋ فۋنكتسياسىمەن جانە ءتۇرلى قارۋ-جاراقتاردى تاسىمالداۋ مۇمكىندىگىمەن ەرەكشەلەنەدى.

Abai.kz