ۇلت رۋحانياتىنىڭ الىبى، قازاق ادەبيەتىنىڭ كلاسسيگى مۇحتار اۋەزوۆ بەينەلەنگەن سيرەك فوتوسۋرەت تابىلدى. كوپشىلىككە بۇرىن بەيمالىم بولىپ كەلگەن بۇل تاريحي كادردا قالامگەردىڭ قازاقتىڭ ۇلتتىق زياتكەرلىك ويىنى — توعىزقۇمالاق ويناپ وتىرعان ءساتى كورىنىس تاپقان.

بۇل فوتو تەك ءبىر تۇلعانىڭ بەينەسى عانا ەمەس، قازاق مادەنيەتى مەن ۇلتتىق مۇراسىنىڭ تەرەڭ بايلانىسىن ايعاقتايتىن قۇندى دەرەك. سۋرەتتەن مۇحتار اۋەزوۆتىڭ ۇلتتىق ونەر مەن داستۇرگە دەگەن جاقىندىعىن، حالقىمىزدىڭ ينتەللەكتۋالدىق قۇندىلىقتارىنا دەگەن قۇرمەتىن اڭعارۋعا بولادى.

دۇنيەجۇزىلىك توعىزقۇمالاق فەدەراتسياسىنىڭ پرەزيدەنتى، قوعام جانە مەملەكەت قايراتكەرى ءاليحان بايمەنوۆتىڭ ايتۋىنشا، فوتوسۋرەت 1950 جىلى تۇسىرىلگەن. قازىرگى تاڭدا سۋرەتتىڭ تۇپنۇسقاسى مەن تۇسىرىلگەن ورنىنا قاتىستى زەرتتەۋ جۇمىستارى جۇرگىزىلىپ جاتىر.

سۋرەت: قازاقستان توعىزقۇمالاق سپورتى فەدەراتسياسىنىڭ ءباسپاسوز قىزمەتىنەن الىندى.

“بۇل جاڭالىقتىڭ ماڭىزى توعىزقۇمالاق الەمى ءۇشىن دە، تۇلعالاردىڭ بويىنداعى مادەني ساباقتاستىقتى قالىپتاستىرۋ ءۇشىن دە، اۋەزوۆتانۋ الەمى ءۇشىن دە، جالپى زەرتتەۋلەر ءۇشىن دە وتە ماڭىزدى. ارينە ءبىز مۇحتار اۋەزوۆتىڭ توعىزقۇمالاق وينىن قايتا جانداندىرۋعا قوسقان ۇلەسىن بىلەتىنبىز. كەڭەستىك يدەولوگيا قىسىمىمەن، جالپى ۇلتتىق رۋحانيات، سونىڭ ىشىندە توعىزقۇمالاق جوعالىپ كەتەر تۇستا مۇحتار ومارحانۇلى مەن قاليبەك قۋانىشباەۆ باستاپ، ويىننىڭ ەرەجەلەرىن قايتا جاڭعىرتىپ، جارىستار وتكىزگەن. ەندى وسىنىڭ بەينە دالەلى تابىلىپ وتىر. بۇعان دەيىن قۇجاتتاردان بىلدىك تە، ءبىز ايتىپ وتىرعان سۋرەتى بولماپ ەدى”،– دەيدى ءاليحان بايمەنوۆ.

ويىنشىلاردىڭ اتى بەينەلەنگەن فوتوسۋرەتتە مۇحتار اۋەزوۆ، ونىڭ توعىزقۇمالاقتاعى قارسىلاس ويىنشىسى جانە تۇرەگەلىپ تۇرعان باقىلاۋشى مەن توعىزقۇمالاق تاقتاسى بەينەلەنگەن. ويىن بارىسىندا تاراپتاردىڭ ويلانىپ وتىرعان ساتتەگى فوتوبەينەنىڭ استىنا “1950 جىل” دەپ بەلگى قويىلعان.

“بۇل فوتوسۋرەت ءۇشىن “الماتىكىتاپ” باسپاسىنىڭ قىزمەتكەرلەرىنە العىس ايتامىز. سونداعى توعىزقۇمالاق جاناشىرلارى وسى بەينەسۋرەتتى تاۋىپ، قازاقستان توعىزقۇمالاق سپورتى فەدەراتسياسىنىڭ ۆيتسە-پرەزيدەنتى، Binom مەكتەپتەر جەلىسىنىڭ باسشىسى شولپان قادىروۆاعا حابارلاسىپ، سۇيىنشىلەگەن. مۇنىڭ ءبىزدىڭ قولىمىزعا تيگەنىنە ەكى-ءۇش كۇن عانا بولدى”،– دەيدى دۇنيەجۇزىلىك توعىزقۇمالاق فەدەراتسياسىنىڭ پرەزيدەنتى ءاليحان بايمەنوۆ.

سۋرەت: قازاقستان توعىزقۇمالاق سپورتى فەدەراتسياسىنىڭ ءباسپاسوز قىزمەتىنەن الىندى.

جەتىسۋ وبلىسىنىڭ ورتالىعى تالدىقورعان قالاسىندا توعىزقۇمالاق ارداگەرلەرى اراسىندا رەسپۋبليكالىق تۋرنير ءوتىپ جاتىر. ەلىمىزدىڭ بارلىق وڭىرىنەن جۇزدەگەن توعىزقۇمالاق قايراتكەرلەرى مەن ارداگەرلەرى جينالعان شارانىڭ اشىلۋ سالتاناتىندا بەلگىلى سپورت ءجۋرناليسى، الماتى وبلىسىنىڭ قۇرمەتتى ازاماتى، تاۋەلسىز قازاقستان توعىزقۇمالاق سپورتى فەدەراتسياسىنىڭ تۇڭعىش پرەزيدەنتى، بيىل 75 جاس مەرەيتويىن اتاپ ءوتىپ جاتقان نەسىپ ءجۇنىسبايۇلىنا وسى فوتوسۋرەت ەستەلىك رەتىندە سىيعا بەرىلدى.

توعىزقۇمالاق — حالقىمىزدىڭ عاسىرلار بويى جالعاسقان زياتكەرلىك مۇراسى. ال ونى مۇحتار اۋەزوۆ سەكىلدى ۇلى تۇلعانىڭ ويناپ وتىرعان ءساتى ۇلتتىق تاريحىمىز ءۇشىن ەرەكشە جاڭالىق. الداعى ۋاقىتتا فوتوسۋرەتكە قاتىستى تىڭ مالىمەتتەر مەن زەرتتەۋ ناتيجەلەرى جاريالاناتىن بولادى.

Abai.kz