بۇگىن اقوردادا مەملەكەت باسشىسى قاسىم-جومارت توقاەۆ مادەنيەت جانە ونەر قىزمەتكەرلەرىن كاسىبي مەرەكەلەرىمەن قۇتتىقتادى. 

— بۇل — ەلىمىز ءۇشىن ءمان-ماڭىزى ايرىقشا مەرەكە. مادەنيەت حالقىمىزدىڭ ۇلتتىق بولمىسى مەن رۋحاني دەربەستىگىن ارقاۋ ەتكەنىن ءبارىمىز جاقسى بىلەمىز. مادەني جانە رۋحاني دۇنيەسىن ساقتاي بىلگەن ەلدىڭ مارتەبەسى بيىك، مەرەي ۇستەم بولارى ايقىن. سىزدەر وسى يگى ماقسات جولىندا تاباندى جۇمىس ىستەپ كەلەسىزدەر. قوعامىمىز بۇل ەڭبەكتى جوعارى باعالايدى. بۇگىن مەن كاسىبي مەرەكە كۇنى ەلىمىزدەگى بارشا مادەنيەت جانە ونەر سالاسى ماماندارىنا شىنايى العىسىمدى بىلدىرەمىن، — دەدى پرەزيدەنت.

مەملەكەت باسشىسى قازاق ونەردىڭ كيەسىن ۇعاتىن، ونەرپازدىڭ قادىرىن بىلەتىن جۇرت ەكەنىن باسا ايتتى.

— ءبىز ەرەكشە دارىن يەلەرىنە ءاردايىم لايىقتى قۇرمەت كورسەتەمىز. جۇرتىمىز «ونەردىڭ ءورىسى كەڭ» دەپ سىزدەردى قاشاندا قادىرلەگەن. مىنە، بۇگىنگى جيىن دا سونىڭ ءبىر كورىنىسى. شىن مانىندە رۋحانياتى باي ەلدىڭ ويى وزىق، بولاشاعى جارقىن بولادى. وزدەرىڭىزگە ءمالىم، قازىر قازاقستاندا اۋقىمدى وزگەرىستەر بولىپ جاتىر. بۇل جاي عانا وزگەرىستەر ەمەس. ەلىمىزدىڭ بولاشاعىنا تىكەلەي قاتىسى بار، ماعىناسى اۋقىمدى، تەرەڭ، كەشەندى، جۇيەلى رەفورمالار جاسالىپ جاتىر. ماقساتىمىز — وتانىمىزدى كۇشتى وزىق مەملەكەت رەتىندە دامىتۋ، سونداي-اق دارىندى، وتانشىل، جىگەرلى جانە كوزى اشىق، كوكىرەگى وياۋ جاستاردىڭ ءومىر جولىن اشىپ بەرۋ، — دەدى قاسىم-جومارت توقاەۆ.

ايتا كەتەلىك پرەمەر-ءمينيسترىنىڭ ورىنباسارى – مادەنيەت جانە اقپارات ءمينيسترى ايدا بالاەۆا مادەنيەت جانە ونەر قىزمەتكەرلەرىن كاسىبي مەرەكەسىمەن قۇتتىقتاعان ەدى.

— بۇدان بولەك، ءداستۇرلى ونەردى، اسىرەسە جىر، تەرمە، كۇي ونەرىن دامىتۋعا ەرەكشە ءمان بەرۋمىز كەرەك. ءتول وركەنيەتىمىزدىڭ وسىنداي تەڭدەسسىز قازىنالارىن دارىپتەپ جۇرگەن ونەر ادامدارىنا قولداۋ كورسەتۋ ماڭىزدى. وسى ورايدا مەن «اسىل مۇرا» ۇلتتىق سىيلىعىن تاعايىنداۋ تۋرالى شەشىم قابىلدايتىن بولدىم، — دەدى قاسىم-جومارت توقاەۆ.

مەملەكەت باسشىسىنىڭ پايىمىنشا، بۇل ماراپات ءداستۇرلى ونەر وكىلدەرىن قولداۋعا، ولاردىڭ شىعارماشىلىعىن ناسيحاتتاۋعا، ۇلتتىق ونەردىڭ بەدەلىن ارتتىرۋعا ىقپال ەتەدى.

— وسى جوعارى دارەجەلى سىيلىقپەن ءتيىستى مينيسترلىكتىڭ ۇسىنىسى بويىنشا مەملەكەت باسشىسىنىڭ جارلىعىمەن لايىقتى ونەر جانە مادەنيەت قايراتكەرلەرى ماراپاتتالادى. جالپى، مادەنيەت پەن ونەر سالاسى ەل ءومىرىنىڭ اجىراماس بولىگى رەتىندە ءاردايىم مەملەكەت نازارىندا بولادى، — دەدى پرەزيدەنت.

Abai.kz