بوقاەۆ ءىسى: شاعىم قاناعاتتاندىرىلمادى...
الماتى سوتى بوقاەۆتىڭ قاماۋ مەرزىمىنە قاتىستى شاعىمدى قارادى. ىستە الاياقتىق، جالعان اقپارات تاراتۋ جانە وزگە دە كۇدىك بار.
الماتى قالالىق سوتى سانجار بوقاەۆتىڭ ىسى بويىنشا قورعاۋشىلاردىڭ اپەللياتسيالىق شاعىمىن قاناعاتتاندىرماي، وزگەرىسسىز قالدىردى. بۇل تۋرالى ادۆوكات رادمير ۋتەپوۆ الەۋمەتتىك جەلىدە جاريالاعان ۆيدەوۇندەۋىندە مالىمدەدى.
ادۆوكاتتىڭ ايتۋىنشا، سوت بوقاەۆتى قاماۋدا ۇستاۋ مەرزىمىن ۇزارتۋ تۋرالى تەرگەۋ سوتىنىڭ قاۋلىسىن كۇشىندە قالدىرعان.
– 2026 جىلعى 21 مامىردا الماتى قالالىق سوتى ءبىزدىڭ اپەللياتسيالىق شاعىمىمىزدى قاناعاتتاندىرۋدان باس تارتتى. سوت قورعاۋىمىزداعى بوقاەۆ سانجار ومارۇلىنا قاتىستى قاماۋ مەرزىمىن ۇزارتۋ جونىندەگى تەرگەۋ سوتىنىڭ قاۋلىسىن وزگەرىسسىز قالدىردى، – دەدى رادمير ۋتەپوۆ.
سانجار بوقاەۆ 2026 جىلعى 18 ناۋرىزدا الماتىدا قىلمىستىق ءىس اياسىندا ۇستالعان بولاتىن.
تەرگەۋ مالىمەتىنشە، ول قوعامدا تەرىس پىكىر قالىپتاستىرۋ ماقساتىندا جالعان اقپارات تاراتتى دەگەن كۇدىككە ىلىنگەن.
تەرگەۋ نۇسقاسىنا سايكەس، بوقاەۆ الەۋمەتتىك جەلىلەردە قوعامدىق ساياباق اۋماقتارىنداعى اعاشتاردىڭ زاڭسىز كەسىلۋى جانە قۇرىلىس نىساندارىنداعى ۇرلىقتار تۋرالى بەينەماتەريالدار جاريالاعان.
سونداي-اق قۇقىق قورعاۋ ورگاندارىنىڭ بولجامىنشا، ول بۇل ارەكەتتەردى ۇيىمداستىرىپ، قارجىلاندىرۋى مۇمكىن. تەرگەۋ مالىمەتىندە ادامداردى اقشا ۇسىنىپ تارتقانى دا ايتىلعان.
بۇدان بولەك، بوقاەۆ اسا ءىرى كولەمدە الاياقتىق جاساۋ جانە قارجى جىمقىرۋ ءىسى بويىنشا دا كۇدىكتى رەتىندە قاراستىرىلىپ وتىر.
2 ءساۋىر كۇنى سەناتتاعى بريفينگتە باس پروكۋروردىڭ ورىنباسارى ەرلان وتەگەنوۆ بوقاەۆتىڭ قارجى جىمقىرۋ جانە اعاشتاردى زاڭسىز كەسۋدى ۇيىمداستىرۋ فاكتىلەرى بويىنشا كۇدىككە ىلىنگەنىن حابارلاعان ەدى.
– ول ءىرى كولەمدە الاياقتىق ارقىلى اقشا جىمقىردى جانە اعاشتاردى زاڭسىز كەسۋدى ۇيىمداستىردى دەگەن كۇدىككە ءىلىندى، – دەگەن بولاتىن وتەگەنوۆ.
ونىڭ سوزىنشە، بولجامدى قۇقىقبۇزۋشىلىقتار بوقاەۆتىڭ ۇلتتىق كومپانيادا جۇمىس ىستەگەن كەزەڭىندە جاسالۋى مۇمكىن.
سانجار بوقاەۆ – قوعام بەلسەندىسى، ەكونوميست جانە بلوگەر رەتىندە تانىمال. ول الەۋمەتتىك جەلىلەردە قوعامدىق-ساياسي جانە ەكونوميكالىق تاقىرىپتاردى، سونداي-اق قالا ينفراقۇرىلىمى مەن ەكولوگيا ماسەلەلەرىن ءجيى كوتەرىپ جۇرگەن.
Abai.kz
