قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ اقتوبە قالاسىندا تاحاۋي احتانوۆ اتىنداعى دراما تەاترى ءۇشىن جاڭا عيمارات سالۋ جونىندەگى تاپسىرماسىن جۇزەگە اسىرۋ اياسىندا ۇكىمەت رەزەرۆىنەن 8 ملرد تەڭگە ءبولىندى.

ءتيىستى قاۋلىعا پرەمەر-مينيستر ولجاس بەكتەنوۆ قول قويدى.

ۇكىمەت بولگەن قارجى تەاتر قۇرىلىسىن وسى جىلدىڭ سوڭىنا دەيىن اياقتاۋعا مۇمكىندىك بەرەدى.

تەاتر قالا مەن ايماقتىڭ مادەني ءومىرى ءۇشىن وتە ماڭىزدى، ونىڭ تاريحى 80 جىلدان اسادى.

تەاتردىڭ جاڭا عيماراتى التىن وردا شاعىن اۋدانىندا سالىنىپ جاتىر، 700 ورىنعا ەسەپتەلگەن تەاتر ونەردىڭ زاماناۋي تالاپتارىنا ساي ۇلكەن جانە كىشى زالداردان، زاماناۋي رەپەتيتسيالىق ءۇي-جايلار مەن ساحنالىق كەڭىستىكتەردەن تۇرادى. تەاتردىڭ اينالاسىندا دەمالىس ورتالىقتارى، ساياباق پەن قالا تۇرعىندارىنىڭ دەمالۋىنا ارنالعان ستاديون سالۋ كوزدەلگەن.

جاڭا مادەني نىساننىڭ قۇرىلۋى قالا مەن وبلىس حالقىنىڭ ەكى ەسەگە جۋىق وسۋىنە بايلانىستى، بۇل مادەني ينفراقۇرىلىمدى كەڭەيتۋ جانە شىعارماشىلىق قىزمەت ءۇشىن جاڭا الاڭداردىڭ پايدا بولۋ قاجەتتىلىگىن ارتتىردى. جالپى، جوبا تەاتر قىزمەتتەرىنىڭ ساپاسىن ارتتىرۋعا، شىعارماشىلىق ۇجىمداردىڭ جۇمىسى ءۇشىن زاماناۋي جاعداي قالىپتاستىرۋعا جانە تەاتر ونەرىن ودان ءارى دامىتۋعا ىقپال ەتەدى.

تاريحي-مادەني مۇرانى ساقتاۋ مەملەكەتتىڭ ماڭىزدى مىندەتتەرىنىڭ ءبىرى رەتىندە ەلىمىزدىڭ جاڭا كونستيتۋتسياسىندا بەكىتىلگەن. پرەزيدەنت تاپسىرمالارىن جۇزەگە اسىرۋ اياسىندا وتكەن جىلى ەلىمىزدە 61 مادەني نىسان سالىنىپ، 250-دەن استام مەكەمەگە جوندەۋ جۇمىستارى جۇرگىزىلدى.

Abai.kz