بقو-دا بەلگىسىز درونداردىڭ شەكارا ۇستىنەن ۇشىپ جۇرگەنىنە ەكىنشى كۇن بولدى. ولار وتكىزۋ پۋنكتى مەن شەكارا زاستاۆاسىنىڭ ۇستىنەن بايقالعان.

باتىس قازاقستان وبلىسىندا شەكارا ۇستىنەن ونداعان بەلگىسىز درون بايقالدى، دەپ حابارلايدى «ۋرالسكايا نەدەليا».

وڭىرلىك رەداكتسيانىڭ مالىمەتىنشە، «سىرىم» شەكارالىق پۋنكتىنىڭ ۇستىندە درونداردىڭ پايدا بولعانى تىركەلگەن. اۋەدەگى تەحنيكانىڭ جۇرگەنىنە بىرنەشە كۇن بولعانى اتاپ وتىلەدى.

كۋاگەرلەردىڭ ايتۋىنشا، 10-عا جۋىق ۇشقىشسىز ۇشۋ اپپاراتى سامارا وبلىسى تاراپىنان قوزعالىپ كەلەدى. ولار وتكىزۋ پۋنكتى مەن شەكارا زاستاۆاسىنىڭ ۇستىنەن بايقالعان. جەرگىلىكتى تۇرعىندار مۇنداي جاعدايلاردىڭ بىرنەشە كۇن قاتارىنان تىركەلىپ جاتقانىن العا تارتادى.

رەسمي ورگانداردىڭ جاۋابى

ءوز كەزەگىندە قازاقستاننىڭ قورعانىس مينيسترلىگى اۋە كەڭىستىگىن بۇزۋ جاعدايلارى تىركەلمەگەنىن، جاعداي ءتيىستى قىزمەتتەردىڭ باقىلاۋىندا ەكەنىن حابارلادى. ۆەدومستۆو ازاماتتاردان سابىرلىق ساقتاۋدى جانە شىنايى ەمەس اقپاراتتى تاراتپاۋدى سۇرادى.

بىرنەشە كۇن بۇرىن بقو-نىڭ اقجايىق اۋدانىندا، ەلدى مەكەن اۋماعىنان تىس جەردە ۇۇا (بپلا) بولشەكتەرىنە ۇقساس زاتتار تابىلعان بولاتىن. وقيعانىڭ ءمان-جايى انىقتالۋدا.

بۇعان دەيىن بولعان ۇقساس جاعدايلار

بۇل ايماقتا مۇنداي وقيعا ءبىرىنشى رەت بولىپ وتىرعان جوق:

• 2025 جىلعى 18 اقپان – بوكەي ورداسى اۋدانىنىڭ ۇيالى اۋىلىندا العاشقى قۇلاعان ۇۇا تابىلدى (BES.media سۋرەتتەگى وبەكتىنىڭ رەسەيلىك «ورلان-10» پيلوتسىز اپپاراتىنا ۇقساستىعىن انىقتاعان);

• 18 ناۋرىز – تاسقالا اۋدانىنىڭ اتامەكەن اۋىلىندا ۇۇا تابىلدى (سۋرەتكە قاراعاندا، وبەكت رەسەي ارمياسىندا «گەران-1» دەگەن اتپەن بەلگىلى Shahed-131 اپپاراتىنا ۇقساۋى مۇمكىن – بۇل رف-دا دا شىعارىلاتىن جانە 2022 جىلدىڭ قازان ايىنان باستاپ ۋكرايناداعى سوعىستا بەلسەندى قولدانىلىپ جۇرگەن يراندىق بارراجداۋشى وق-ءدارى);

• 24 ناۋرىز ساعات 21:15-تە – بقو جانىبەك اۋدانى ۇزىنكول اۋىلدىق وكرۋگىنىڭ اۋماعىندا بەلگىسىز ۇشقىشسىز ۇشۋ اپپاراتىنىڭ (ۇۇا) سىنىقتارى تابىلعانى تۋرالى حابارلاما تۇسكەن.

Abai.kz