الماتى وبلىسىندا جەدەل مەديتسينالىق جاردەم قىزمەتىنىڭ اۆتوپاركى اۋقىمدى جاڭارتۋدان وتۋدە. مەديتسينا قىزمەتكەرلەرى كۇنى قارساڭىندا ءوڭىردىڭ جەدەل مەديتسينالىق جاردەم ستانتسياسىنا 70 جاڭا سانيتاريالىق اۆتوكولىكتىڭ كىلتى تابىستالادى. قازىرگى ۋاقىتتا اۆتوكولىكتەردىڭ قۇجاتتارىن راسىمدەۋ جۇمىستارى جۇرگىزىلۋدە.

جاڭا تەحنيكالار 2025 جىلى ليزينگ شارتى نەگىزىندە ساتىپ الىنعان. ونىڭ ىشىندە 30-ى «س» كلاسىنداعى رەانيموبيل، ال 40-ى «ۆ» كلاسىنداعى سانيتاريالىق اۆتوكولىك. بارلىعى زاماناۋي مەديتسينالىق جابدىقتارمەن تولىق قامتاماسىز ەتىلگەن جانە شۇعىل كومەك كورسەتۋگە بەيىمدەلگەن.

وسىلايشا، بيىل الماتى وبلىسىنىڭ جەدەل مەديتسينالىق جاردەم قىزمەتى ءۇشىن ساتىپ الىنعان 90 سانيتاريالىق اۆتوكولىكتىڭ بارلىعى پايدالانۋعا بەرىلەدى. ونىڭ 20-سى جىل باسىندا مەديتسينالىق ۇيىمدارعا تاپسىرىلسا، قالعان 70 كولىك جاقىن كۇندەرى قىزمەتكە كىرىسەدى.

الماتى وبلىسى دەنساۋلىق ساقتاۋ باسقارماسىنىڭ باسشىسى ەرجان سۇلەيمەنوۆتىڭ ايتۋىنشا، اۆتوپاركتى جاڭارتۋ تۇرعىندارعا كورسەتىلەتىن جەدەل مەديتسينالىق كومەكتىڭ ساپاسى مەن قولجەتىمدىلىگىن ارتتىرۋعا مۇمكىندىك بەرەدى.

«جەدەل مەديتسينالىق جاردەم قىزمەتىنىڭ ماتەريالدىق-تەحنيكالىق بازاسىن جاڭارتۋ جۇمىستارى كەزەڭ-كەزەڭىمەن جالعاسۋدا. جاڭا سانيتاريالىق اۆتوكولىكتەر شالعاي ەلدى مەكەندەرگە دەر كەزىندە جەتۋگە، شاقىرتۋلارعا جەدەل ارەكەت ەتۋگە جانە مەديتسينالىق كومەكتىڭ ساپاسىن جاقسارتۋعا مۇمكىندىك بەرەدى. بۇل — تۇرعىنداردىڭ قاۋىپسىزدىگى ءۇشىن جاسالىپ جاتقان ماڭىزدى جۇمىس»، — دەدى ەرجان سۇلەيمەنوۆ.

جەدەل جاردەم قىزمەتىنىڭ اۆتوپاركىن جاڭارتۋعا بيزنەس وكىلدەرى دە قولداۋ كورسەتىپ كەلەدى. وتكەن جىلى الەۋمەتتىك جاۋاپكەرشىلىك اياسىندا «Mareven Food» جشس جەدەل مەديتسينالىق جاردەم قىزمەتىنە گۋمانيتارلىق كومەك رەتىندە «ۆ» كلاسىنداعى 10 Foton ماركالى سانيتاريالىق اۆتوكولىكتى تابىستاعان بولاتىن.

قازىرگى تاڭدا الماتى وبلىسىندا جەدەل مەديتسينالىق كومەكتى 1 ستانتسيا، 12 قوسالقى ستانتسيا، اۋىلدىق ەلدى مەكەندەردەگى 66 ديسلوكاتسيالىق پۋنكت جانە 1 سانيتاريالىق اۆياتسيا بولىمشەسى كورسەتەدى. وڭىردە 147 جەدەل مەديتسينالىق جاردەم بريگاداسى جۇمىس ىستەيدى. ونىڭ ىشىندە 20 دارىگەرلىك جانە 127 فەلدشەرلىك بريگادا بار.

Abai.kz