الدىمەن يران پرەزيدەنتى ءماسۋد پەزەشكياننىڭ وتستاۆكاسى جايلى مالىمەت تارادى.

ول ەلدىڭ جوعارى باسشىسى كىشى-حامەنەيگە ءوتىنىش جازىپتى-مىس. قىزمەتتەن كەتۋ سەبەبىن «ەلدى قازىرگى جاعدايدا باسقارۋ مۇمكىن ەمەستىگىمەن» تۇسىندىرسە كەرەك. سوڭىنان ونىڭ اپپاراتى دا، ۇكىمەتتىڭ ءباسپاسوز قىزمەتى دە مۇنى جوققا شىعاردى.

ارتىنشا پەزەشكياننىڭ ۇكىمەت جيىنىنا قىسقا جەڭ جەيدەمەن قاتىسقانى جايلى مالىمەت، سۋرەتى تاراپ كەتتى. جەيدەنى بىلاي قويعاندا، يراننىڭ باسقارۋ ورنىندا باسشىنىڭ قىسقا جەڭ كيىممەن كەلۋى - توسىن جاي. «وتستاۆكا وتىنىشىنەن» بۇرىنعى وقيعا بولسا دا، بۇل - نازار اۋدارتارلىق جايت. ال كەيىنگى وقيعا بولسا، استارى بار دەگەن ءسوز.

جيىندا پرەزيدەنت كونديتسيونەردى ءوشىرىپ، ۋازىرلەرىنە مىندەتتى تۇردە «بەشپەنت كيمەۋ» جايلى ايتىپتى. ياعني، ايتقانى ەلەكتر قۋاتىن وسىلاي دا ۇنەمدەۋ كەرەك دەگەنگە سايادى.

يران ۇكىمەتىندە «وتستاۆكامەن» ۇركىتۋ بۇرىن دا بولعان، بىراق ۇكىمەت باسشىسىنىڭ سونداي ارەكەتى ءبىرىنشى رەت بايقالىپ وتىر. بىرنەشە جىل بۇرىن يران سىرتقى ىستەر ءۋازىرى، مىنەزى قىزبالاۋ جاۆود زاريف الەۋمەتتىك جەلىدە قىزمەتتەن كەتكەنىن جاريالاعان. بۇل - باتىسپەن ارادا يادرولىق باعدارلاما جايى تالقىلانىپ، بىرىككەن ارەكەتتەرگە قادام باسقان تۇس بولاتىن.

سول كەزدە ەل ىشىندە زاريف قاتتى سىنالعان، ءتىپتى «سىرتتىڭ ادامى» دەگەن ءسوز تاراعان. كەيبىرەۋلەردىڭ ەسىنە ونىڭ يران-يراك سوعىسى كەزىندە اقش ۋنيۆەرسيتەتىندە وقىپ، «جايلى جاقتا» جۇرگەنى ءتۇسىپ كەتكەن.

«وتستاۆكاسى» جايلى پوستىنان كەيىن دە ول جىم-جىرت قىزمەتىن جالعاستىرا بەرگەن. كەيىن پوستىن الىپ تاستاعان. بۇل جاعدايعا سوندا ەشكىم تۇسىنىك بەرمەگەن.

ءبىر اي بۇرىن يران پارلامەنتى جۇمىسىن جالعاستىرىپ، دەپۋتاتتار قايتادان باس قوسا باستاعان. سوعىستان كەيىنگى بۇل سەسسيادا ماجىلىستە «كارتوپ جاراتىندار» قاپتاپ كەتكەن. كۇندەلىكتى ماجىلىستەن ەستىلگەن مالىمدەمەلەرگە سالساق، بۇگىنگە دەيىن ماسەلە ءبىر جاقتى بولىپ قالۋى كەرەك ەدى، بىراق اقش-پەن كەلىسسوز قايتا-قايتا تىعىرىققا تىرەلىپ جاتىر.

ورازا ايتى ءوتتى، قۇربان ايت ءوتتى. الدا اقش-تا «فۋتبول ايتى» كەلە جاتىر.

سول قارساڭدا يران پرەزيدەنتىنىڭ «وتستاۆكاسى» جايلى حاباردىڭ تاراۋى يران بيلىگىندە اقش-پەن كەلىسسوز تۋرالى بىرىڭعاي كوزقاراس قالىپتاسپاعانىن كورسەتەدى.

ال 3 ماۋسىم شاماسىندا 28 اقپاندا قازا تاپقان اياتوللا حامەنەيدىڭ ءمايىتى جەرلەنبەكشى. 3 ماۋسىم - 1989 جىلى ۇلكەن اياتوللا، رەۆوليۋتسيونەر يمام حومەيني قايتىس بولعان كۇن. سول كەزدە يراكپەن سوعىس اياقتالىپ، ەل ەسىن جيناي باستاعان كەز ەدى. حامەنەي حومەينيدىڭ ورنىنا ۇسىنىلىپ، جۇلدىزى جارق ەتە قالعان.

وسىنداي وقيعالار فونىندا اقش كەلىسسوز جاساۋعا بولادى دەپ مەجەلەگەن يران ۇكىمەتى باسشىسىنىڭ «قىزمەتتەن كەتۋى» ءبىر جاعى ەلدەگى اسكەري بيلىككە قارسى نارازىلىقتى دا بىلدىرەدى.

يسلام رەۆوليۋتسياسى ساقشىلارى كورپۋسى سوڭعى كەزدە ءوز دەربەستىگىن، دەربەستىگىنەن دە گورى وكتەمدىگىن كورسەتە باستاعان. ءتىپتى پەزەشكيان ۇكىمەتىنىڭ سىرتقى ءمينيسترى، كەلىسسوز ميسسياسى جۇكتەلگەن ابباس اراقچيدىڭ ۇكىمەتكە باعىنباي كورپۋستىڭ سويىلىن سوعىپ كەتكەنى ايتىلادى.

مۇنىڭ ءبارى ەلدەگى قوسبيلىكتىڭ سالدارى قانداي بولارىن كورسەتەدى.

قۋانىشبەك قاري، يرانتانۋشى

Abai.kz