«قازاقستان رەسپۋبليكاسىنىڭ جاڭا كونستيتۋتسياسىن قابىلداۋعا بايلانىستى راقىمشىلىق جاساۋ تۋرالى» زاڭ جوباسى جونىندە زاڭناما جانە سوت-قۇقىقتىق رەفورما كوميتەتىنىڭ مۇشەسى قايرات بالابيەۆتىڭ قوسىمشا بايانداماسى.

اكىمشىلىك راقىمشىلىق ازاماتتارعا سوت ورىنداۋشىلارىنا جۇگىنبەي-اق شوتتارىنداعى بۇعاتتاۋدى الىپ تاستاۋعا مۇمكىندىك بەرەدى

جاڭا كونستيتۋتسياعا بايلانىستى راقىمشىلىق تۋرالى زاڭنىڭ قابىلدانۋى ازاماتتارعا مۇلىك پەن بانك شوتتارىنا قويىلعان شەكتەۋلەردى سوت ورىنداۋشىلارىنا جۇگىنبەي-اق الىپ تاستاۋعا مۇمكىندىك بەرەدى. بۇل تۋرالى قر ءماجىلىسىنىڭ دەپۋتاتى قايرات بالابيەۆ ماجىلىستە زاڭ جوباسىن تانىستىرۋ بارىسىندا مالىمدەدى.

ايىپپۇلداردى جويۋ جانە بورىشتىق جۇكتەمەنى ازايتۋ

دەپۋتاتتىڭ ايتۋىنشا، زاڭ جوباسىنىڭ نەگىزگى ماقساتتارىنىڭ ءبىرى – العاشقى اكىمشىلىك راقىمشىلىق اياسىندا قىلمىستىق ساياساتتى ىزگىلەندىرۋ جانە حالىقتىڭ بورىشتىق جۇكتەمەسىن ازايتۋ.

بالابيەۆتىڭ سوزىنشە، اكىمشىلىك قۇقىق بۇزۋشىلىق تۋرالى كودەكستە ۋاكىلەتتى ورگاندار شىعارعان اكىمشىلىك جازا قولدانۋ تۋرالى قاۋلىلاردىڭ ورىندالۋىن توقتاتۋ ءتارتىبىن رەتتەيتىن نورمالار قاراستىرىلعان.

سونىمەن قاتار، «اتقارۋشىلىق ءىس جۇرگىزۋ جانە سوت ورىنداۋشىلارىنىڭ مارتەبەسى تۋرالى» زاڭدا راقىمشىلىق اكتىسى قولدانىلعان جاعدايدا اتقارۋشىلىق ءىس جۇرگىزۋدى توقتاتۋعا نەگىز بولاتىن نورمالار كوزدەلگەن.

«بۇل نورمالار ازاماتتارعا سوت ورىنداۋشىسىنا جۇگىنبەي-اق مۇلىك پەن بانك شوتتارىنا قويىلعان شەكتەۋلەردى الىپ تاستاۋعا مۇمكىندىك بەرەدى. بۇدان بولەك، راقىمشىلىق اكتىسى نەگىزىندە اتقارۋشىلىق ءىس جۇرگىزۋ توقتاتىلعان جاعدايدا ازاماتتار اتقارۋشىلىق سانكتسيالاردى تولەۋدەن جانە جەكە سوت ورىنداۋشىسىنىڭ قىزمەتىنە اقى تولەۋدەن بوساتىلادى»، – دەپ اتاپ ءوتتى دەپۋتات.

ونىڭ ايتۋىنشا، ۇسىنىلىپ وتىرعان وزگەرىستەر ءراسىمدى جەڭىلدەتىپ قانا قويماي، ازاماتتاردىڭ قارجىلىق جۇكتەمەسىن ەداۋىر تومەندەتەدى.

قىلمىستىق-اتقارۋ جۇيەسىندە قانداي وزگەرىستەر بولادى

بالابيەۆ زاڭ جوبالارىنىڭ قابىلدانۋى قىلمىستىق-اتقارۋ جۇيەسىندەگى بىرقاتار جۇيەلى ماسەلەلەردى شەشۋگە مۇمكىندىك بەرەتىنىن ايتتى.

اتاپ ايتقاندا، راقىمشىلىققا ىلىكپەيتىن ادامداردى ۇستاۋ جاعدايلارىن جاقسارتۋ، مەكەمەلەردەگى ماتەريالدىق-تۇرمىستىق جانە مەديتسينالىق-سانيتارلىق جاعدايلاردى جەتىلدىرۋ، سونداي-اق بوساتىلاتىن بيۋدجەت قاراجاتىن قىلمىستىق-اتقارۋ جۇيەسىن دامىتۋعا جانە جازالاردى ورىنداۋدىڭ حالىقارالىق ستاندارتتارىن ەنگىزۋگە باعىتتاۋ كوزدەلىپ وتىر.

راقىمشىلىق – قۇقىق بۇزۋشىلىقتىڭ الدىن الۋ قۇرالى

دەپۋتات راقىمشىلىقتىڭ تەك قۇقىقتىق تەتىك قانا ەمەس، سونىمەن بىرگە قۇقىق بۇزۋشىلىقتاردىڭ الدىن الۋدىڭ ماڭىزدى قۇرالى ەكەنىن اتاپ ءوتتى.

«ءوز قاتەلىگىن ءتۇسىنىپ، تۇزەلۋگە مۇمكىندىك العان ادام قىلمىستى قايتا جاساۋعا ازىراق بەيىم بولادى»، – دەدى ول.

بالابيەۆتىڭ ايتۋىنشا، راقىمشىلىق مەملەكەتتىڭ تەك جازالاۋعا عانا ەمەس، سونىمەن قاتار تۇزەتۋگە، قۇقىق بۇزۋشىلىقتاردىڭ الدىن الۋعا جانە الەۋمەتتىك ادىلەتتىلىكتى قالپىنا كەلتىرۋگە قابىلەتتى ەكەنىن كورسەتەدى.

«راقىمشىلىق – مەملەكەتتىڭ السىزدىگىنىڭ ەمەس، زاڭنىڭ تەك جازالاپ قانا قويماي، تۇزەتۋگە، الدىن الۋعا جانە الەۋمەتتىك ادىلەتتىلىكتى قالپىنا كەلتىرۋگە قابىلەتتى ەكەنىنە سەنىمدى كۇشتى مەملەكەتتىڭ كورىنىسى»، – دەدى دەپۋتات.

ول قارالىپ جاتقان زاڭ جوبالارى كونستيتۋتسيالىق رەفورمالاردىڭ رۋحىنا، ادىلەتتى قازاقستان قۇرۋ مىندەتتەرىنە جانە ەل ازاماتتارىنىڭ مۇددەلەرىنە تولىق سايكەس كەلەتىنىن قوستى.

Abai.kz