مەملەكەتتىك رامىزدەر كۇنى قارساڭىندا الماتى وبلىسىنىڭ اكىمى مارات سۇلتانعازيەۆ قوناەۆ قالاسىنداعى بەردىبەك سوقپاقباەۆ اتىنداعى ساياباقتا بالالارمەن كەزدەستى.

ەركىن فورماتتا وتكەن كەزدەسۋگە 35-كە جۋىق بالا قاتىستى. اشىق اسپان استىندا ۇيىمداستىرىلعان جۇزدەسۋ بارىسىندا وقۋشىلار وبلىس اكىمىنە وزدەرىن قىزىقتىرعان سۇراقتارىن قويىپ، قازاقستاننىڭ مەملەكەتتىك رامىزدەرىنىڭ تاريحى مەن ماڭىزى تۋرالى پىكىر الماستى.

كەزدەسۋ بارىسىندا مارات سۇلتانعازيەۆ بالالارعا مەملەكەتتىك تۋ، ەلتاڭبا جانە ءانۇراننىڭ تاۋەلسىز قازاقستاننىڭ باستى نىشاندارى ەكەنىن ايتىپ، ولاردى قۇرمەتتەۋ ءار ازاماتتىڭ پارىزى ەكەنىن اتاپ ءوتتى.

سونداي-اق اكىم مەملەكەتتىك رامىزدەرگە قاتىستى قىزىقتى دەرەكتەرمەن ءبولىستى. اسىرەسە، كوك تۋدىڭ عارىش كەڭىستىگىنە كوتەرىلىپ، الەمنىڭ ەڭ بيىك شىڭدارىندا جەلبىرەگەنى تۋرالى ايتىلعان مالىمەتتەر بالالاردىڭ ەرەكشە قىزىعۋشىلىعىن تۋدىردى.

شارا بارىسىندا بالالار مەملەكەتتىك رامىزدەردىڭ اۆتورلارى، ولاردىڭ ءمان-ماعىناسى جانە قازاقستاننىڭ حالىقارالىق دەڭگەيدەگى جەتىستىكتەرى تۋرالى سۇراقتار قويدى. كەزدەسۋ اشىق ديالوگ فورماتىندا ءوتىپ، جاس قاتىسۋشىلار ءوز ويلارىن ەركىن جەتكىزۋگە مۇمكىندىك الدى.

وبلىس اكىمى مۇنداي كەزدەسۋلەردىڭ جاس ۇرپاقتىڭ بويىندا پاتريوتتىق قۇندىلىقتاردى قالىپتاستىرۋدا ماڭىزدى ءرول اتقاراتىنىن اتاپ ءوتتى.

“مەملەكەتتىك رامىزدەر – ءبىزدىڭ تاۋەلسىزدىگىمىزدىڭ، بىرلىگىمىزدىڭ جانە ەلدىگىمىزدىڭ بەلگىسى. ولاردى قۇرمەتتەۋ – تۋعان ەلگە دەگەن قۇرمەتتىڭ كورىنىسى”، – دەدى مارات سۇلتانعازيەۆ.

ايتا كەتەيىك، مەملەكەتتىك رامىزدەر كۇنى جىل سايىن 4 ماۋسىمدا اتالىپ وتىلەدى. بۇل كۇن قازاقستاندىقتاردىڭ ەلدىك قۇندىلىقتارعا دەگەن قۇرمەتىن ارتتىرۋعا جانە وسكەلەڭ ۇرپاقتىڭ پاتريوتتىق تاربيەسىن نىعايتۋعا باعىتتالعان ءتۇرلى ءىس-شارالارمەن ەرەكشەلەنەدى.

Abai.kz