ۇكىمەت 2025 جىلدىڭ قورىتىندىسى بويىنشا الەۋمەتتىك مىندەتتەمەلەردىڭ ورىندالۋىن تولىق كولەمدە قامتاماسىز ەتتى. قر قارجى ءمينيسترى ءمادي تاكيەۆ ءماجىلىستىڭ جالپى وتىرىسىندا رەسپۋبليكالىق بيۋدجەتتىڭ شىعىستارى 25,5 ترلن تەڭگەنى قۇراعانىن، ونىڭ 9,3 ترلن تەڭگەسى الەۋمەتتىك سالاعا جانە 7,7 ترلن تەڭگەسى وڭىرلەردى قولداۋعا باعىتتالعانىن باياندادى.
«رەسپۋبليكالىق بيۋدجەت شىعىستارى 99%-عا ورىندالىپ، 25,5 ترلن تەڭگەنى قۇرادى. ۇكىمەت تاراپىنان بارلىق الەۋمەتتىك مىندەتتەمەلەر ورىندالدى. وڭىرلەردى قولداۋعا 7,7 ترلن تەڭگە باعىتتالعان بولسا، الەۋمەتتىك سالاعا 9,3 ترلن تەڭگە جىبەرىلدى»،
— دەدى ءمادي تاكيەۆ.
قارجى ءمينيسترى ۇلتتىق جوبالار اياسىندا 198 مەكتەپ پەن 655 دەنساۋلىق ساقتاۋ نىسانىنىڭ قۇرىلىسى اياقتالعانىن اتاپ ءوتتى. سونداي-اق ستۋدەنتتەرگە ارنالعان 10 مىڭنان استام ورىنعا 30 جاتاقحانا پايدالانۋعا بەرىلدى.
«بارلىق قارجىلاندىرۋ كوزدەرى ەسەبىنەن، 20,1 ملن شارشى مەتر تۇرعىن ءۇي پايدالانۋعا بەرىلدى. حالىقتىڭ الەۋمەتتىك وسال توپتارى ءۇشىن، 5 141 تۇرعىن ءۇي ساتىپ الىندى. ينجەنەرلىك ينفراقۇرىلىمدى دامىتۋ جونىندەگى جۇمىستار جالعاسۋدا. 980,5 شاقىرىم ينجەنەرلىك – كوممۋنيكاتسيالىق ينفراقۇرىلىم جەلىسى سالىندى. سۋمەن جابدىقتاۋ جانە سۋ بۇرۋ جۇيەلەرىنىڭ 6,3 مىڭ شاقىرىم جەلىسى سالىندى جانە جوندەلدى»،
— دەپ اتاپ ءوتتى قارجى ءمينيسترى.
كولىك ينفراقۇرىلىمىنا دا قوماقتى قاراجات جۇمسالدى. 13 مىڭ شاقىرىمعا جۋىق اۆتوجول، ونىڭ ىشىندە 9 مىڭ شاقىرىم رەسپۋبليكالىق ماڭىزى بار جول جانە 4 مىڭ شاقىرىم جەرگىلىكتى ماڭىزى بار اۆتوجول جۇمىستىڭ بارلىق تۇرىمەن قامتىلدى. سونىمەن قاتار الەۋمەتتىك ماڭىزى بار تەمىرجول جانە اۋە باعىتتارىن قولداۋ جۇمىستارى جالعاستىرىلدى.
