جەتىسۋ وبلىسىنا سوڭعى ەكى جىلدا جۇمىس ىستەۋگە 153 دارىگەر مامان كەلگەن. بۇل وبلىس اكىمىنىڭ باستاماسىمەن دارىگەر تاپشىلىعىن جويۋ ماقساتىندا دارىگەرلەردى قولداۋ شارالاردىڭ ارقاسىندا مۇمكىن بولدى. ولاردىڭ 57-ءسى اۋىلدىق جەرلەردە، 96-سى قالادا جۇمىس ىستەيدى. ولاردىڭ ارقايسىنا ءبىر رەتتىك كوتەرمە اقى تولەنىپ، 47 مەديتسينا مامانىنا قىزمەتتىك پاتەر بەرىلدى. بۇل تۋرالى بۇگىن وبلىس اكىمى بەيبىت يساباەۆتىڭ قاتىسۋىمەن وتكەن مەديتسينا قىزمەتكەرلەرى كۇنىنە ارنالعان سالتاناتتى جيىندا ايتىلدى، - دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.

تالدىقورعانداعى ءى. جانسۇگىروۆ اتىنداعى مادەنيەت سارايىنىڭ فويەسىندە ءوڭىر باسشىسى الدىمەن وبلىسقا كەلگەن جاس ماماندارمەن تىلدەستى. «سىزدەردىڭ جۇمىستارىڭىز وڭاي ەمەس، دەگەنمەن ءبىلىمدى، بىلىكتى مامان قاي كەزدە دە ءوز ءىسىن جاۋاپكەرشىلىكپەن اتقارادى. بالالاردىڭ، انالاردىڭ، جالپى حالىقتىڭ دەنساۋلىعى سىزدەردىڭ ساپالى قىزمەتتەرىڭىزگە بايلانىستى. سوندىقتان جاقسىلاپ جۇمىس ىستەڭىزدەر. ءبىز ءوز تاراپىمىزدان دەنساۋلىق ساقتاۋ سالاسىنا قولداۋ كورسەتۋدى جالعاستىرامىز»، - دەدى ب. يساباەۆ.

زالعا جينالعان سالا ماماندارىن كاسىبي مەرەكەمەن قۇتتىقتاعان وبلىس اكىمى:

- ازاماتتاردىڭ دەنساۋلىعى – قوعامنىڭ ءال-اۋقاتى مەن مەملەكەت دامۋىنىڭ باستى كورسەتكىشى. ەلدىڭ كەلەشەگى مەن وركەندەۋى ۇلت ساۋلىعىنا تىكەلەي بايلانىستى. سوندىقتان سىزدەردىڭ ەڭبەكتەرىڭىز قانداي قۇرمەتكە دە لايىق. وسى ورايدا مەرەكە قارساڭىندا بارشاڭىزعا جەتىسۋلىقتاردىڭ اتىنان شىنايى ريزاشىلىعىمدى بىلدىرەمىن. بۇگىندە ازاماتتاردىڭ دەنساۋلىعىن ساقتاۋ، اۋرۋدىڭ الدىن الۋ جانە زاماناۋي مەديتسينالىق كومەكتى دامىتۋ – مەملەكەتتىك ساياساتتىڭ باسىم باعىتتارىنىڭ ءبىرى. سوندىقتان وڭىردە دەنساۋلىق ساقتاۋ ينفراقۇرىلىمىن دامىتۋعا كوپ كوڭىل ءبولىنىپ كەلەدى، - دەگەن ب. يساباەۆ وبلىستا دەنساۋلىق ساقتاۋ سالاسىنا جاسالىپ وتىرعان قولداۋ شارالارىن اتاپ ءوتىپ، مەديتسينا ماماندارىنىڭ قىزمەتىنە تابىس تىلەدى.

مۇنان سوڭ جيىن ماراپاتتاۋ راسىمىمەن جالعاستى. اتاپ ايتقاندا، پرەزيدەنتتىڭ جارلىعىمەن وبلىستىق بالالار اۋرۋحاناسى ديرەكتورىنىڭ ورىنباسارى ۆاديم تۋرۋسكينگە «قۇرمەت» وردەنى، وبلىستىق كارديولوگيا ورتالىعىنىڭ ءبولىم مەڭگەرۋشىسى حۋسان يسمانوۆقا «ەرەن ەڭبەگى ءۇشىن» مەدالى بەرىلدى.

سونداي-اق جىلدىڭ ۇزدىك ماماندارى ارنايى ديپلوممەن جانە اقشالاي سىيلىق سەرتيفيكاتىمەن ماراپاتتالدى. ماسەلەن، وبلىستىق كوپ سالالى كلينيكاسىنىڭ ونكولوگ دارىگەرى الەكساندر كلياتسكو «ۇزدىك ستاتسيونار دارىگەرى»، ەسكەلدى اۋداندىق ورتالىق اۋرۋحاناسىنىڭ پروۆيزورى داريعا سەرىكقالي «ۇزدىك پروۆيزور»، وبلىستىق جۇقپالى اۋرۋلار اۋرۋحاناسىنىڭ ديرەكتورى ومىرزاق نيازبەكوۆ «ۇزدىك دەنساۋلىق ساقتاۋ مەنەدجەرى»، تالدىقورعان قالالىق ەمحاناسىنىڭ دارىگەرى سالتانات سادۋاقاسوۆا «ۇزدىك مەديتسينالىق-سانيتارلىق العاشقى كومەك دارىگەرى»، سارقان اۋداندىق ورتالىق اۋرۋحاناسىنان ماديار بايعاليەۆ «ۇزدىك سانيتارلىق-ەپيدەميولوگيالىق بەيىن دارىگەرى»، كوكسۋ اۋداندىق ورتالىق اۋرۋحاناسىنان جاننات داركەنباەۆا «ۇزدىك اكۋشەر» اتاندى.

سول سياقتى تالدىقورعان قالالىق كوپسالالى اۋرۋحاناسىنىڭ مەيىرگەرى ەركە چاكۋقىزى، تالدىقورعان جوعارى مەديتسينالىق كوللەدجىنىڭ وقىتۋشىسى ايدانا سەيىتحانوۆا، پانفيلوۆ اۋدانارالىق كوپسالالى اۋرۋحاناسىنىڭ مەيىرگەرى تالشىن يعيسا، اقسۋ اۋداندىق ورتالىق اۋرۋحاناسىنىڭ فەلدشەرى داۋرەن ورالتايۇلى دا نوميناتسيا جەڭىمپازدارى بولدى.

ماراپاتتالۋشىلار اتىنان ءسوز العان ايدانا سەيىتحانوۆا:

- بارشا ارىپتەستەرىمدى مەديتسينا قىزمەتكەرلەرىنىڭ كۇنىمەن قۇتتىقتايمىن. بۇگىنگى ماراپات بىزگە كورسەتىلگەن سەنىم جانە ۇجىمىمىزعا كورسەتىلگەن قۇمەت دەپ بىلەمىز. ءبىزدىڭ تالدىقورعان جوعارى مەديتسينالىق كوللەدجىنە بيىل 90 جىل تولىپ وتىر. وسى ۋاقىت ىشىندە ءبىزدىڭ وقۋ ورنىنان تۇلەپ ۇشقان قانشاا تۇلەك دەنساۋلىق ساقتاۋ سالاسىنىڭ بىلىكتى مامانى بولدى. الداعى ۋاقىتتا دا كادر دايىنداۋ ىسىنە ءوزىمىزدىڭ لايىقتى ۇلەسىمىزدى قوسا بەرەمىز، - دەدى ول.

مەرەكەگە وراي «قۇرمەت» وردەنىنە يە بولعان ۆاديم تۋرۋسكين ءوز پىكىرىن ءبىلدىردى:

- نەگىزگى ماماندىعىم – بالالار حيرۋرگى، سونىڭ ىشىندە نەوناتالدى  حيرۋرگپىن. قازىر وبلىستىق بالالار اۋرۋحاناسىندا جۇمىس ىستەيمىن. حالىقتىڭ دەنساۋلىعىنا، سونىڭ ىشىندە جاس سابيلەردىڭ ومىرىنە جاۋاپتى بولۋ وڭاي ەمەس. جالپى ءبىزدىڭ قىزمەتىمىز ءبىر عانا ماماننىڭ ەمەس، ۇجىمنىڭ، سونىڭ ىشىندە دارىگەرلەر، مەدبيكەلەر، سانيتارلار – ءبارىمىزدىڭ بىرلەسكەن ەڭبەگىمىزدەن تۇرادى جانە جەتىستىگىمىز دە سول ورتاق ەڭبەكتىڭ جەمىسى. بۇگىن ەڭبەگىمىزدى ەلەپ، ۇلكەن ماراپات بەرىپ وتىرعانىنا ريزاشىلىعىمدى بىلدىرەمىن. قيىن دا كۇردەلى قىزمەتتە ارىپتەستەرىمە قاجىر-قايرات، توزىمدىلىك، كاسىبيلىك، دەنساۋلىق، تابىس تىلەيمىن، - دەدى ول.

وبلىسقا جۇمىسقا كەلگەن جاس مامانداردىڭ قاتارىندا ەرلى-زايىپتى دارىگەرلەر الماعامبەتوۆتار وتباسى دا بار.

- مەن جالپى تاجىريبەلىك دارىگەرمىن، زايىبىم – ايسۇلۋ دا جالپى تاجىريبەلىك دارىگەر. جەتىسۋ وبلىسىندا ءبىر رەتتىك كوتەرمە اقى بەرەتىنىن ەستىپ، 2025 جىلى ساۋىردە وبلىسقا وتباسىمىزبەن كوشىپ كەلدىك. مەن قاراتال اۋدانى كالپە اۋىلىنداعى، ايسۇلۋ ەسكەلدى اۋىلىنداعى مەديتسينالىق نىساندا جۇمىسقا كىرىستىك. ەكەۋمىز بىرىگىپ 20 ملن تەڭگە كوتەرمە اقى الدىق، تەگىن قىزمەتتىك ءۇي بەرىلدى، بۇل ءبىزدىڭ جاس وتباسىمىز ءۇشىن ۇلكەن كومەك بولدى. جالپى جەتىسۋ ءوڭىرىنىڭ تابيعاتى، حالقى بىزگە قاتتى ۇنادى. جۇمىس ىستەۋگە مىندەتتەلگەن 5 جىلدان كەيىن دە وسى وڭىردە قالساق پا دەگەن ويىمىز بار، - دەيدى ەربول الماعامبەتوۆ.

جالپى، جەتىسۋ وبلىسى قۇرىلعالى بەرى وڭىردە 149 جاڭا مەديتسينالىق نىسان سالىندى. «اۋىلداعى دەنساۋلىق ساقتاۋدى جاڭعىرتۋ» ۇلتتىق جوباسى شەڭبەرىندە 59 نىسان بوي كوتەردى. سونداي-اق 13 نىسان كۇردەلى جوندەۋدەن ءوتتى. وسىلايشا وڭىردەگى بارلىق مەديتسينا نىساندارىنىڭ 63,8% جاڭاردى. ال ماتەريالدىق-تەحنيكالىق بازانى نىعايتۋ ماقساتىندا وتكەن جىلى 165 مەديتسينالىق تەحنيكا مەن 29 سانيتارلىق اۆتوكولىك ساتىپ الىنسا، بيىل دا قاراجات ءبولىنىپ وتىر. سونىڭ ناتيجەسىندە مەديتسينالىق ۇيىمداردىڭ زاماناۋي قۇرالدارمەن جابدىقتالۋ دەڭگەيى 93 پايىزعا جەتتى.

Abai.kz