جالپى جەتىسۋ وبلىسى ارقىلى وتەتىن 1050 كم رەسپۋبليكالىق ماڭىزى بار اۆتوموبيل جولدارىنىڭ جاقسى جانە قاناعاتتانارلىق جاعدايداعى ۇلەسى 100 %-دى، جەرگىلىكتى ماڭىزى بار 3 مىڭ كم جولدار بويىنشا 95 %-دى قۇرايدى. بۇل تۋرالى بۇگىن سەلەكتورلىق رەجيمدە وتكەن ۇكىمەت وتىرىسىندا اۆتوجول سالاسىن دامىتۋ تۋرالى بايانداعان وبلىس اكىمى بەيبىت يساباەۆ وسىلاي دەدى، - دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.

بۇل كورسەتكىشتەرگە بىرقاتار جوبالاردى ىسكە اسىرۋ ارقىلى قول جەتكىزىلدى، ونىڭ ىشىندە ىرىلەرى رەتىندە رەسپۋبليكالىق ماڭىزى بار 498 كم «تالدىقورعان-دوستىق», 248 كم «سارىوزەك-قورعاس» جانە وبلىستىق ماڭىزى بار 132 كم  «تالدىقورعان-بالقاش كولى» باعىتىنداعى اۆتوموبيل جولدارىن جوندەۋ جوبالارىن اتاۋعا بولادى.

ءوڭىر باسشىسىنىڭ ايتۋىنشا، جەتىسۋ وبلىسى اۋماعىندا اۆتوموبيل جولدارىنىڭ جالپى ۇزىندىعى 4,0 مىڭ كم. وسى جولداردىڭ نورماتيۆتىك جاعدايىن قامتاماسىز ەتۋ ماقساتىندا وڭىردە 2024 جىلدان باستاپ 10 اۆتوماتتاندىرىلعان ولشەۋ ستانتسياسى (اسي) ورناتىلعان.

سونداي-اق وبلىس باسشىسى ءوز سوزىندە اپاتتى كوپىرلەر ماسەلەسىنىڭ شەشىلۋ بارىسىنا دا توقتالدى.

- وبلىستىق ماڭىزى بار اۆتوموبيل جولدارىنىڭ بويىندا 108 كوپىر ورنالاسقان. ونىڭ ىشىندە 15 كوپىر اپاتتى دەپ تانىلعان بولاتىن. ولاردى كوپىردى رەكونسترۋكتسيالاۋ جانە كۇردەلى جوندەۋ ماقساتىندا جوبالاۋ-سمەتالىق قۇجاتتامالار ازىرلەندى. بۇگىنگى كۇندە 5 كوپىردىڭ كۇردەلى جوندەۋ جۇمىستارى تولىعىمەن اياقتالىپ، پايدالانۋعا بەرىلدى، سەگىزى بويىنشا قايتا جاڭعىرتۋ جۇمىستارى بيىل كۇزدە تولىق اياقتالادى. جالپى، اپاتتى كوپىرلەر تولىقتاي بيىل رەكونسترۋكتسيادان جانە كۇردەلى جوندەۋدەن سوڭ پايدالانۋعا بەرىلەدى دەپ جوسپارلانىپ وتىر، - دەدى ب. يساباەۆ.

جەتىسۋ وبلىسى اكىمىنىڭ ءباسپاسوز قىزمەتى.

Abai.kz