بوكستان سەمسەرلەسۋگە دەيىن: قازاقستان سپورتشىلارى دەمالىس كۇندەرىن 19 حالىقارالىق مەدالمەن قورىتىندىلادى. 

وتكەن دەمالىس كۇندەرى وتاندىق سپورتشىلار وليمپيادالىق سپورت تۇرلەرىنەن ءىرى حالىقارالىق جارىستاردا تابىستى ونەر كورسەتىپ، جالپى سانى 19 مەدال يەلەندى.

سۋرەت:قر مادەنيەت جانە اقپارات مينيستىرلىگىنەن الىندى.

الەمدىك جانە قۇرلىقتىق دودالاردا ەل نامىسىن قورعاعان بىرنەشە ۇلتتىق قۇراما جوعارى ناتيجە كورسەتىپ، ەل سپورتىنىڭ حالىقارالىق ارەناداعى باسەكەگە قابىلەتتىلىگىن تاعى ءبىر مارتە دالەلدەدى.

سۋرەت:قر مادەنيەت جانە اقپارات مينيستىرلىگىنەن الىندى.

ەڭ تابىستى ناتيجە قىتايدىڭ گۋيان قالاسىندا وتكەن World Boxing الەم كۋبوگىنىڭ ەكىنشى كەزەڭىندە تىركەلدى. قازاقستان بوكسشىلارى قورجىنعا 5 التىن جانە 3 قولا مەدال سالىپ، جالپى سەگىز جۇلدە جەڭىپ الدى. تۋرنير چەمپيونى اتانعاندار: سانجار تاشكەنباي، ابىلايحان ءجۇسىپوۆ، ايبەك ورالباي، نازىم قىزايباي جانە ۆيكتوريا گرافەەۆا.

يندونەزيانىڭ بالي ارالىندا وتكەن WKF كاراتەدەن ازيا چەمپيوناتىندا دا قازاقستان قۇراماسى جوعارى ناتيجە كورسەتتى. وتانداستارىمىز 2 التىن، 2 كۇمىس جانە 3 قولا مەدال جەڭىپ الىپ، قۇرلىقتىڭ ۇزدىك كوماندالارىنىڭ قاتارىنان كورىندى.
ازيا چەمپيونى اتانعاندار - جولامان بيعابىل مەن ولجاس التىنبەك.

جەڭىل اتلەتيكادان قازاقستان قۇراماسى دا ەل قورجىنىنا التىن مەدال سالدى. قىتايدىڭ شاوسين قالاسىندا وتكەن ازيا ەستافەتالىق چەمپيوناتىندا ۇلتتىق قۇراما ارالاس قۇرامداعى 4×400 مەترلىك ەستافەتادا جەڭىمپاز اتاندى. قۇراما ساپىنان ەلنور مۇحيتدينوۆ، ماريا شۋۆالوۆا، اندرەي سوكولوۆ جانە ادەلينا زەمس جۇگىردى.

نيۋ-دەليدە وتكەن ازيا چەمپيوناتىندا وتاندىق سەمسەرلەسۋشىلەر تاريحي جەتىستىككە قول جەتكىزدى. يرينا باكالدينا ايەلدەر اراسىنداعى جەكە شپاگا سايىسىندا ازيا چەمپيوناتىنىڭ التىن جۇلدەسىن جەڭىپ العان العاشقى قازاقستاندىق سپورتشى اتاندى. ال رۋسلان قۇربانوۆ ەرلەر اراسىنداعى جەكە شپاگا باسەكەسىندە قولا مەدال يەلەندى.

نىسانا كوزدەۋدەن دە ەل قورجىنىنا جۇلدە ءتۇستى. گەرمانيادا ءوتىپ جاتقان جاسوسپىرىمدەر اراسىنداعى الەم چەمپيوناتىندا رينات كازاچەنكو 50 مەتر قاشىقتىقتا ءۇش قالىپتان كىشى كاليبرلى ۆينتوۆكامەن اتۋ سايىسىندا كۇمىس مەدال جەڭىپ الدى. بۇل - قازاقستان قۇراماسىنىڭ اتالعان الەم بىرىنشىلىگىندەگى العاشقى جۇلدەسى.

وتكەن دەمالىستاعى ناتيجەلەر وتاندىق سپورتشىلاردىڭ جوعارى دايىندىق دەڭگەيىن جانە ەلىمىزدە وليمپيادالىق سپورت تۇرلەرىن دامىتۋ باعىتىنداعى جۇيەلى جۇمىستىڭ جەمىستى ەكەنىن تاعى ءبىر مارتە كورسەتتى.

Abai.kz