ءۇمىت پەن ارمان العا جەتەلەيتىن بۇل تىرلىكتە كوڭىلگە كەيدە كۇدىك تە كىرەدى. اينالاداعى جاعدايدى پايىمداي، پارىقتاي كەلە الدەبىر ءىستىڭ سوڭى قالاي بولار ەكەن دەگەن ويعا امالسىز بەرىلەسىڭ.

جۋىردا استانادا ايتۋلى سپورت شولۋشىسى، جالپى قازاقتىڭ جامپوز ءجۋرناليستى بولعان امانگەلدى سەيىتحاندى ەسكە الۋعا ارنالعان تۋرنير وتەتىنى جاريالانعان. بيلياردتان. ءبىر ايداي بۇرىن ارنايى شاقىرتۋ العانبىز.

شاقىرتۋ قولعا ءتيىپ، ارماندا كەتكەن امانگەلدى ءىنىمىز تۋرالى ايتار ءسوزىمىزدى كوكەيگە جۇپتاپ جۇرگەنىمىزدە قازاقستاننىڭ ساياسي ومىرىندە ەلەۋلى وقيعا بولدى. نەگىزى ساياسات باسقا دا، سپورت باسقا، ەكەۋى توقايلاساتىن ورتاق كەڭىستىك جوق سياقتى كورىنەتىن. بۇل جولى توقايلاستى.

ويتكەنى، ءتۋرنيردى ءداستۇرلى تۇردە «اقجول» دەموكراتيالىق پارتياسى ۇيىمداستىراتىن. بىزگە دە شاقىرتۋ سول پارتيانىڭ اتىنان كەلگەن. بۇعان دەيىنگى ءتورت تۋرنيرگە پارتيانىڭ جەتەكشىسى، ساياسي كەڭەسىنىڭ توراعاسى ازات پەرۋاشەۆ ءوزى كەلىپ، ادەمىلەپ اشىپ بەرەتىن. تۋرنير سوڭىنان سالتاناتتى ءراسىم جاساپ، جەڭىمپازداردى جاقسىلاپ ماراپاتتايتىن. ەندى سونداي تۋرنيرگە بىرەر كۇن قالعاندا «اقجول» پارتيانىڭ جەتەكشىسى اۋىستى. سوڭعى سەزدە ازات تۇرلىبەكۇلى تىزگىندى دانيا ەسپاەۆاعا تاپسىرادى.

ارينە، ساياسي جەتەكشىنىڭ اۋىسىپ تۇرۋى – العا قاراي جىلجۋدىڭ العىشارتى. «ءبىر ءوزىم بيلەي بەرەمىن» دەگەن ۇردىستەن زارداپ شەككەن مەملەكەتتەردىڭ قاتارىندامىز. بىراق ەلىمىزدىڭ ىشىندە ءوز ەركىمەن جانە دەر كەزىندە تىزگىندى تاپسىراتىندار از. ازات سول ازدىڭ ءبىرى بولدى.

وسى اۋىس-تۇيىستەن كەيىن كوڭىلگە كۇدىك كىرگەن. ەندى تۋرنير بولا ما، بولا قالسا ازات پەرۋاشەۆ كەلىپ، باسى-قاسىندا جۇرە مە؟!  «مەن قىزمەتتەن كەتتىم، ەندى مازالاماڭدار» دەي سالسا، وعان ءۋاج ايتۋ قيىن. تۇسىنىستىكپەن قاراعان سىڭاي تانىتار ەدىك. كىلەڭ «مەن اتايىن، سەن تۇر» دەيتىن جۋرناليستەر جيىلاتىن جەردە باسى ارتىق سوزدەن قاشتى، ىڭعايسىز قويىلاتىن سۇراقتان سىرعاقتادى دەپ ويلار ەدىك.

وسىنداي ساياسي كەزەڭدە تۋرنير وتپەي دە قالۋى مۇمكىن-اۋ دەگەندەر شىقتى. الماتىدان استاناعا بيلەت الىپ قويعان ءتىلشى ىنىشەك ءتىپتى، قاتتى الاڭدادى.

جوق، ازات پەرۋاشەۆ ازامات ەكەن. ءتۋرنيردى ۋاقتىلى  وتكىزدى. ءوزى كەلىپ اشىپ بەردى. ءماندى سويلەدى. امانگەلدىنىڭ تىكەلەي رەپورتاجدارىندا ايتىلعان قاناتتى سوزدەردى دە ۇمىتپاپتى. سپورت ءجۋرناليسى بولايىن دەيتىن ءاربىر جاس ءۇشىن ونىڭ ماڭگىلىك كۋمير بولىپ قالارىن ايتتى. جارىسقا قاتىسۋشىلاردىڭ بارشاسىنا تابىس تىلەدى.

پارتياداعى باسشىلىقتىڭ اۋىسۋى – كۇيىنەتىن دە، كۇڭىرەنەتىن دە ءجايت ەمەس، كادىمگى ساياسي دامۋ باعىتى ەكەنىنە توقتالدى. «اقجول» پارتياسىنداعى ىسكەرلىك احۋال ساقتالا بەرەدى. ءوزى دە وسى پارتيا قاتارىندا قازاقستاننىڭ بارلىق سالادا دامىعان مەملەكەت بولۋىنا قولدان كەلگەنشە ۇلەسىن قوسادى. ۋاقىتىن، ساياسي كۇرەستە جيناعان تاجىريبەسىن، بىرنەشە جوعارى وقۋ ورىندارىنان العان ءبىلىمىن وسى پارتيانىڭ قاتارىندا بارلىق ازاماتتاردىڭ يگىلىگى ءۇشىن جۇمساي بەرەدى.

ەركىن، ساليقالى، سالماقتى ءسوزىنىڭ سونىندا بۇل جولى قالام ەمەس، كي ۇستاپ كەلگەن قاۋىمنىڭ كوڭىلىن كۇپتى ەتكەن ساۋالدى قويعىزباي-اق جاۋابىن ايتتى. «جۋرناليستەر اراسىنداعى امانگەلدى سەيىتحان اتىنداعى بيليارد ءتۋرنيرى ەشقاشان توقتاماي، جىلما-جىل وتكىزىلە بەرەدى!» دەدى.

جينالعان جۋرناليستەر بۇل مالىمدەمەگە ريزا بولدى. ازاتتىڭ ازاماتتىعىنا دا بارشا قالام ۇستاعان قاۋىم تاعى ءبىر مارتە كوز جەتكىزگەنى انىق.

قاينار ولجاي

Abai.kz