قىرعىز رەسپۋبليكاسى مەملەكەتتىك حاتشىسىنىڭ شاقىرۋىمەن قازاقستان رەسپۋبليكاسى پارلامەنتى سەناتىنىڭ دەپۋتاتى دارحان قىدىرالى 18–21 ماۋسىم ارالىعىندا بىشكەك قالاسى مەن ىستىقكول جاعالاۋىندا وتكەن مەرەيتويلىق ىستىقكول حالىقارالىق فورۋمىنا قاتىستى.

فورۋم بارىسىندا سەناتور قازاقستان رەسپۋبليكاسى پارلامەنتى سەناتىنىڭ توراعاسى ماۋلەن اشىمباەۆتىڭ قاتىسۋشىلارعا ارنالعان قۇتتىقتاۋ حاتىن جەتكىزدى. جولداۋدا قازىرگى جاعدايدا مەملەكەتتەر اراسىنداعى مادەنيەتارالىق ديالوگتى نىعايتۋدىڭ، جالپىادامزاتتىق قۇندىلىقتاردى ىلگەرىلەتۋدىڭ جانە حالىقارالىق ىنتىماقتاستىقتى دامىتۋدىڭ ماڭىزى ەرەكشە ەكەنى اتاپ ءوتىلدى.

فورۋمدا ءسوز سويلەگەن دارحان قىدىرالى شىڭعىس ايتماتوۆ شىعارماشىلىعىنىڭ حالىقتار اراسىنداعى رۋحاني جانە مادەني بايلانىستاردى نىعايتۋداعى ەرەكشە رولىنە توقتالدى.

«ىستىقكول فورۋمىنىڭ العاشقى وتىرىسىنان بەرى الەمدە اۋقىمدى وزگەرىستەر ورىن الدى. الايدا شىڭعىس ايتماتوۆ جازعان باستى ماسەلە – ادامگەرشىلىكتى ساقتاۋ – وزگەرىسسىز وزەكتى بولىپ قالا بەرەدى. ونىڭ يدەيالارى بىزگە شىنايى رۋحاني قۇندىلىقتار مەن گۋمانيستىك مۇراتتاردىڭ ۋاقىت پەن جاعدايعا قاراماستان ءوز ماڭىزىن جوعالتپايتىنىن ەسكە سالادى», – دەدى سەناتور.

«وركەنيەتتەر توعىسىنداعى الەم: بولاشاققا بىرگە» تاقىرىبىنداعى حالىقارالىق فورۋم مەملەكەت جانە قوعام قايراتكەرلەرىن، عالىمداردى، جازۋشىلاردى جانە حالىقارالىق ۇيىم وكىلدەرىن بىرىكتىردى. قاتىسۋشىلار وركەنيەتارالىق ديالوگ، مادەني ديپلوماتيا، حالىقارالىق ىنتىماقتاستىق جانە رۋحاني مۇرانى ساقتاۋ ماسەلەلەرىن تالقىلادى.

فورۋم اياسىندا چولپون-اتا قالاسىندا مۇحتار اۋەزوۆتىڭ ءۇي-مۇراجايىندا بەلگىلى قوعام قايراتكەرى ءارى مادەنيەتتانۋشى مۇرات اۋەزوۆتىڭ ءبيۋستىن اشۋ ءراسىمى ءوتتى. اتالعان ەستەلىك شاراعا قىرعىز رەسپۋبليكاسىنىڭ مەملەكەتتىك حاتشىسى ارسلان كويچيەۆ، نوبەل سىيلىعىنىڭ لاۋرەاتى مو يان، زيفا-الۋا اۋەزوۆا جانە عىلىمي-شىعارماشىلىق ينتەلليگەنتسيا وكىلدەرى قاتىستى.

سالتاناتقا قاتىسۋشىلار ىستىقكول جاعاسىنداعى مۇحتار اۋەزوۆتىڭ ءۇي-مۇراجايىنىڭ قازاقستان مەن قىرعىزستان اراسىنداعى رۋحاني بىرلىكتىڭ سيمۆولدارىنىڭ ءبىرى رەتىندەگى ەرەكشە ماڭىزىن اتاپ ءوتتى. مۇرات اۋەزوۆتىڭ ءبيۋستىنىڭ اشىلۋى ۇرپاقتار ساباقتاستىعىنىڭ جانە ەكى باۋىرلاس حالىقتىڭ ورتاق مادەني مۇراسىنا دەگەن قۇرمەتتىڭ كورىنىسى ەكەنى باسا ايتىلدى.

Abai.kz