گەرمانيانىڭ شتادە قالاسىنداعى اتىس سالدارىنان قازا تاپقاندار سانى التى ادامعا جەتتى. پوليتسيانىڭ الدىن الا مالىمەتى بويىنشا، شابۋىلدى تۇرىك تەكتى 45 جاستاعى گەرمانيا ازاماتى جاساعان.

نەمىس باق-تارىنىڭ حابارلاۋىنشا، قازا بولعانداردىڭ بارلىعى بالا كۇتىمى ورتالىعىندا جۇمىس ىستەگەن.

قۇقىق قورعاۋ ورگاندارى قىلمىس، ەڭ الدىمەن، جەكە ارازدىق نەگىزىندە جاسالعان دەپ ەسەپتەيدى. تەرگەۋ وقيعادان ساياسي استار نەمەسە ۇيىمداسقان قىلمىسپەن بايلانىس بەلگىلەرىن انىقتاعان جوق.

تەرگەۋ امالدارى جالعاسۋدا. پوليتسيا وقيعانىڭ بارلىق ءمان-جايى مەن شابۋىلداۋشىنىڭ ناقتى موتيۆتەرىن انىقتاپ جاتىر.

گامبۋرگكە جاقىن ورنالاسقان گەرمانيانىڭ شتادە قالاسىندا جاستاردى قولداۋ جانە جاس انالارعا باسپانا بەرەتىن مەكەمەدە كەشە اتىس بولدى.

قۇقىق قورعاۋ ورگاندارىنىڭ مالىمەتىنشە، وقيعا ورنىندا ەكى ادام ۇستالدى، ونىڭ ءبىرى - شابۋىل جاسادى دەگەن كۇدىكتى.

پوليتسيا قازىرگى ۋاقىتتا تۇرعىندارعا ەشقانداي قاۋىپ ءتونىپ تۇرماعانىن جانە جاعداي تولىق باقىلاۋدا ەكەنىن مالىمدەدى.

Abai.kz