رەسەي ۇكىمەتىنەن قازاقستانعا وتىن ساتىپ الۋ نەمەسە ونى گۋمانيتارلىق كومەك رەتىندە جەتكىزۋ جونىندە رەسمي ءوتىنىش ازىرگە تۇسكەن جوق. بۇل تۋرالى قازاقستان رەسپۋبليكاسى ەنەرگەتيكا مينيسترلىگىنىڭ ءباسپاسوز قىزمەتى ءمالىم ەتتى، دەپ حابارلايدى Qaz365.kz.

ۆەدومستۆو تاراتقان حابارلامادا مۇنداي سۇرانىس تۇسكەن جاعدايدا، ەلىمىز ءوزارا ءتيىمدى كوممەرتسيالىق شارتتار نەگىزىندە جانار-جاعارماي ماتەريالدارىن جەتكىزۋ مۇمكىندىگىن قاراستىرۋعا دايىن ەكەنى اتاپ وتىلگەن.

مينيسترلىكتىڭ تۇسىندىرۋىنشە، ەكسپورتتىق تاسىمالدار تەك ىشكى نارىقتا تاپشىلىق تۋىنداماعان جاعدايدا عانا جۇزەگە اسىرىلۋى مۇمكىن. مەملەكەت ءۇشىن نەگىزگى باسىمدىق – وتاندىق تۇتىنۋشىلاردى ۇزدىكسىز قامتاماسىز ەتۋ بولىپ قالا بەرەدى.

“قازاقستاننىڭ ىشكى نارىعىن تولىق ءارى ۇزدىكسىز قامتاماسىز ەتۋ – ءسوزسىز باسىمدىق بولىپ قالا بەرەدى. ەكسپورتتىق جەتكىزىلىمدەر ازاماتتار مەن ەل ەكونوميكاسىنىڭ قاجەتتىلىكتەرىن قامتاماسىز ەتۋگە قاۋىپ تونبەگەن جاعدايدا عانا جۇزەگە اسىرىلۋى مۇمكىن”، – دەپ جازىلعان ەنەرگەتيكا مينيسترلىگىنىڭ حابارلاماسىندا.

بۇعان دەيىن Reuters حالىقارالىق اقپارات اگەنتتىگى سالاداعى جەكە دەرەككوزدەرىنە سۇيەنىپ، قازاقستان شىلدە-تامىز ايلارىندا رەسەيگە 50 مىڭ توننا بەنزيندى گۋمانيتارلىق كومەك رەتىندە جەتكىزۋگە كەلىستى دەپ حابارلاعان ەدى. اگەنتتىك دەرەگىنشە، اي-95 جانە اي-92 ماركالى بەنزين كولەمدەرى باتىس قازاقستان وبلىسىنداعى "كوندەنسات" زاۋىتىنان جانە پاۆلودار مۇناي-حيميا زاۋىتىنان جونەلتىلۋى ءتيىس بولاتىن.

دەگەنمەن، ەنەرگەتيكا مينيسترلىگى رەسەيدىڭ "تاتنەفت" مۇناي كومپانياسى جەتكىزەتىن شيكىزاتتى (نافتانى) وڭدەيتىن باتىس قازاقستان وبلىسىنداعى "كوندەنسات" زاۋىتى ارقىلى جانارماي جونەلتۋ مۇمكىندىگىن تولىق جوققا شىعارمادى.

""كوندەنسات" جشس وندىرەتىن اۆتوكولىك بەنزينىن جاقىن ارادا رەسەيگە جەتكىزۋ مۇمكىندىگى قازاقستاننىڭ ىشكى نارىعىنداعى مۇناي ونىمدەرىنىڭ جەتكىلىكتىلىك دەڭگەيىنە بايلانىستى بولماق. مۇنداي جەتكىزىلىم جۇزەگە اسىرىلسا، اۆتوكولىك بەنزينى رەسەيدىڭ "تاتنەفت" كومپانياسى بەرەتىن شيكىزاتتان وندىرىلەدى", – دەلىنگەن اگەنتتىك سۇرانىسىنا بەرىلگەن رەسمي جاۋاپتا.

Abai.kz