قازاقستاندا كىتاپ وقۋعا قىزىعۋشىلىق ارتىپ كەلەدى

قازاقستاندا مەملەكەتتىك تىلدەگى ادەبيەتكە قىزىعۋشىلىق ارتىپ كەلەدى. كەيىنگى ءبىر جىلدا كوپشىلىك كىتاپحانالارىنان وقىرماندارعا 88,9 ملن باسىلىم بەرىلسە، ونىڭ 53,4 ميلليونى نەمەسە 60,1 پايىزى قازاق تىلىندەگى ادەبيەتتەر بولدى.

بۇل ءۇردىس كىتاپحانا قورلارىنىڭ تولىعۋىنان دا كورىنەدى. ءبىر جىل ىشىندە كوپشىلىك كىتاپحانالارىنا 906,5 مىڭ جاڭا باسىلىم ءتۇسىپ، سونىڭ 662,3 مىڭىن قازاق تىلىندەگى كىتاپتار قۇرادى.

بۇگىندە ەلىمىزدىڭ كوپشىلىك كىتاپحانالارىنداعى قازاق تىلىندەگى ادەبيەتتەر قورى 30,3 ملن داناعا جەتتى. بۇل – جالپى كىتاپحانا قورىنىڭ 41,7 پايىزى.

وقىرماندار اراسىندا كوركەم ادەبيەتكە دەگەن سۇرانىس ءداستۇرلى تۇردە جوعارى. كوركەم شىعارمالارعا، ءتىل ءبىلىمى مەن ادەبيەتتانۋ سالاسىنداعى ەڭبەكتەرگە جالپى بەرىلگەن كىتاپتاردىڭ 57,6 پايىزى نەمەسە 51,3 ملن داناسى تيەسىلى. بۇل باعىتتاعى باسىلىمدار جاڭا تۇسىمدەر اراسىندا دا باسىمدىققا يە. ءبىر جىلدا كىتاپحانا قورلارى وسىنداي مازمۇنداعى 577,7 مىڭ باسىلىممەن تولىقتى. بۇل بارلىق جاڭا ءتۇسىمنىڭ 63,7 پايىزىن قۇرايدى.

كوپشىلىك كىتاپحانالارى وقىرماندارىنىڭ ەلەۋلى بولىگىن بالالار مەن جاستار قۇرايدى. ولاردىڭ اراسىندا 15 جاسقا دەيىنگى 1,75 ملن بالا مەن 1,38 ملن جاس بار. ەرەسەك وقىرمانداردىڭ سانى 2,4 ملن ادامدى قۇرايدى.

وڭىرلەر بويىنشا كىتاپ وقيتىن تۇرعىنداردىڭ ەڭ جوعارى ۇلەسى پاۆلودار وبلىسىندا تىركەلگەن – 47 پايىز. ودان كەيىنگى ورىنداردا سولتۇستىك قازاقستان وبلىسى – 45 پايىز جانە باتىس قازاقستان وبلىسى – 42 پايىز كورسەتكىشپەن تۇر.

بۇل دەرەكتەر كوپشىلىك كىتاپحانالارىنىڭ ەلدىڭ مادەني-اعارتۋشىلىق كەڭىستىگىندەگى ورنى نىعايىپ كەلە جاتقانىن اڭعارتادى. قازاق تىلىندەگى كىتاپتارعا سۇرانىستىڭ ارتۋى، كوركەم ادەبيەتتىڭ كەڭىنەن وقىلۋى جانە بالالار مەن جاستاردىڭ بەلسەندىلىگى ەلىمىزدە كىتاپ وقۋ مادەنيەتىن ودان ءارى دامىتۋعا بەرىك نەگىز قالىپتاستىرادى.

Abai.kz