الماتىدا «جاستار قاتىساتىن بيۋدجەت» جاڭا جوباسىنا ءوتىنىم قابىلداۋ باستالادى. قازاقستاندا العاش رەت جاستار قالا دامۋىنا قاتىستى باستاماسىن ۇسىنىپ، ولاردى جۇزەگە اسىرۋ ءۇشىن مەملەكەتتىك قارجىلاندىرۋعا يە بولادى. بۇل تۋرالى جوبانى قولداپ وتىرعان الماتى قالاسىنىڭ جاستار ساياساتى باسقارماسىنىڭ وكىلدەرى مالىمدەدى.

جوبانىڭ باستى ماقساتى – الماتىلىق جاستارعا يدەياسىن ۇسىنىپ قانا قويماي، ولاردى ءوز كۇشىمەن جۇزەگە اسىرۋعا مۇمكىندىك بەرۋ.

«“جاستار قاتىساتىن بيۋدجەت” مەملەكەت پەن جاستار اراسىنداعى ءوزارا ءىس-قيمىلدىڭ جاڭا تەتىگىنە اينالادى. بۇل جوبا ءاربىر بەلسەندى الماتىلىققا يدەياسىن ناقتى قالالىق جوباعا اينالدىرۋعا مۇمكىندىك بەرەدى. قوعامدىق كەڭىستىكتەردى كورىكتەندىرۋدەن باستاپ ەكولوگيالىق باستامالارعا، تسيفرلىق سەرۆيستەرگە، ءبىلىم بەرۋ باعدارلامالارى مەن مادەني ءىس-شارالارعا دەيىن جاستاردىڭ وزدەرى الماتىنى ودان ءارى زاماناۋي، جايلى ءارى تارتىمدى قالاعا اينالدىراتىن ۇسىنىستارىن جۇزەگە اسىرا الادى»، – دەدى الماتى قالاسى جاستار ساياساتى باسقارماسىنىڭ باسشىسى ازيز كاجدەنبەك.

جوباعا الماتىدا تۇراتىن 18 بەن 35 جاس ارالىعىنداعى قازاقستان ازاماتتارى قاتىسا الادى. ءوتىنىمدى جەكە ءوزى نەمەسە باستاماشىل توپ، جاستار ۇيىمى نە قوعامدىق بىرلەستىك قۇرامىندا بەرۋگە بولادى.

وتىنىمدەر jasalmaty.kz پورتالى ارقىلى ەلەكتروندىق فورماتتا قابىلدانادى. قاتىسۋشىلار پورتالعا تىركەلىپ، ءوتىنىمدى تولتىرۋى، سونداي-اق جوبا سيپاتتاماسىن، شىعىن سمەتاسىن، كۇنتىزبەلىك جوسپاردى، تانىستىرىلىمدى جانە وزگە دە قاجەتتى قۇجاتتاردى جۇكتەۋگە ءتيىس.

بايقاۋعا قالالىق ورتانى كورىكتەندىرۋ، ينفراقۇرىلىمدى دامىتۋ، ەكولوگيا، مادەنيەت، سپورت، ءبىلىم بەرۋ، تسيفرلىق تەحنولوگيا، جاستار كاسىپكەرلىگى، تۋريزم، مەديا، ينكليۋزيا، پسيحولوگيالىق دەنساۋلىق جانە وزگە دە الەۋمەتتىك ماڭىزى بار باعىتتار بويىنشا باستامالار قابىلدانادى.

ىرىكتەۋ بىرنەشە كەزەڭنەن تۇرادى. الدىمەن قۇجاتتار تەحنيكالىق تەكسەرۋدەن وتەدى. كەيىن ءوتىنىمدى قۇرامىنا جاستار ساياساتى باسقارماسىنىڭ وكىلدەرى، ءماسليحات دەپۋتاتتارى، قوعامدىق كەڭەس مۇشەلەرى، عىلىمي جانە ساراپشىلىق قاۋىمداستىق وكىلدەرى كىرەتىن كونكۋرستىق كوميسسيا قارايدى.

جوبانىڭ نەگىزگى كەزەڭدەرىنىڭ ءبىرى – اشىق ونلاين داۋىس بەرۋ. ساراپتامالىق ىرىكتەۋدەن وتكەن جوبالار ارنايى پلاتفورماعا ورنالاستىرىلادى. قازاقستان تۇرعىندارى ولارعا ەلەكتروندىق تسيفرلىق قولتاڭبا نەمەسە SMS ارقىلى راستاۋ ارقىلى داۋىس بەرە الادى. ءاربىر پايدالانۋشى ءۇش جوبادان ارتىق داۋىس بەرە المايدى.

ءبىر جوباعا بولىنەتىن قارجىلاي قولداۋ كولەمى 500 مىڭنان 5 ميلليون تەڭگەگە دەيىن بولادى. باعدارلامانىڭ جالپى بيۋدجەتى – 90 ميلليون تەڭگە. 12-دەن 60-قا دەيىن جاستار باستاماسىن قولداۋ جوسپارلانعان. ءار جوبانى جۇزەگە اسىرۋ مەرزىمى ءبىر ايدان ءۇش ايعا دەيىن سوزىلادى.

جوبا اياسىندا ونداعان جاستار باستاماسى جۇزەگە اسىرىلىپ، 500-دەن استام الماتىلىق جاس قاتىسپاق. سونىمەن قاتار جاستاردىڭ ازاماتتىق بەلسەندىلىگى ارتىپ، قالانىڭ دامۋىنا ۇلەس قوسۋعا دايىن جاڭا بۋىن جاستار كوشباسشىلارى قالىپتاسادى دەپ جوسپارلانىپ وتىر.

Abai.kz