الەمدىك سپورتتىڭ ورتالىعىنا اينالىپ كەلە جاتقان قازاقستان 2026-2027 جىلدار ارالىعىندا جەتى بىردەي الەم چەمپيوناتىن وتكىزۋ قۇقىعىنا يە بولىپ، تاريحي جەتىستىككە قول جەتكىزدى. بيىلعى قازان ايىندا كۇرەس تۇرلەرىنەن الەم چەمپيوناتى وتەتىن بولسا، 2027 جىلى ەلىمىز بوكس، دزيۋدو، ۇستەل تەننيسى، تاەكۆوندو، شورت-ترەك جانە كيبەرسپورت سىندى سپورت تۇرلەرىنەن جاھاندىق دودالاردى قابىلدايدى.

ەلىمىزدە مۇنداي ءىرى حالىقارالىق جارىستاردىڭ ۇيىمداستىرىلۋى – مەملەكەت باسشىسىنىڭ سپورت سالاسىن دامىتۋ، مەملەكەتىمىزدىڭ حالىقارالىق بەدەلىن ارتتىرۋ جانە قازاقستاندى ايماقتاعى ماڭىزدى سپورت ورتالىعىنا اينالدىرۋ جونىندەگى تاپسىرمالارىنىڭ جۇيەلى تۇردە ورىندالىپ جاتقانىنىڭ ناتيجەسى.

2027 جىلى وتەتىن الەم چەمپيوناتتارىنىڭ بارلىعى استانا قالاسىندا ۇيىمداستىرىلادى. ناقتىراق ايتساق، قاڭتاردىڭ 28-ءى مەن 31-ءى ارالىعىندا شورت-ترەكتەن جاسوسپىرىمدەر اراسىندا الەم چەمپيوناتى وتسە، ءساۋىردىڭ 10-26 كۇندەرى بوكستان، مامىردىڭ 22-30 ارالىعىندا ۇستەل تەننيسىنەن، ماۋسىمنىڭ 7-14 كۇندەرى دزيۋدودان، ال شىلدەنىڭ 7-13 كۇندەرى تاەكۆوندودان الەم چەمپيوناتتارى وتەدى. كيبەرسپورت بويىنشا ءدۇبىرلى دودانىڭ ۋاقىتى كەيىنىرەك بەلگىلى بولادى.

تاۋەلسىز قازاقستان تاريحىندا ەكى جىل ىشىندە جەتى الەم چەمپيوناتىن وتكىزۋ قۇقىعىنا يە بولۋ – ەلىمىزدىڭ سپورتتىق ينفراقۇرىلىمى مەن ۇيىمداستىرۋشىلىق الەۋەتىنىڭ جوعارى ەكەنىن كورسەتەتىن ايرىقشا كورسەتكىش. بۇل ءوز كەزەگىندە الەمدىك سپورت قاۋىمداستىعى الدىنداعى زور جاۋاپكەرشىلىكتى دە ارقالايدى.

الەمدىك دەڭگەيدەگى ۇزدىك سپورتشىلاردىڭ قاتىسۋىمەن وتەتىن مۇنداي ءىرى جارىستار وتاندىق سپورتتىڭ دامۋىنا سەرپىن بەرىپ، سالاۋاتتى ءومىر سالتىن قالىپتاستىرۋعا جانە جاستاردىڭ سپورتقا دەگەن ىنتاسىن ارتتىرۋعا مول مۇمكىندىك تۋعىزادى. سونىمەن بىرگە، حالىقارالىق جارىستار وقيعالىق تۋريزم مەن قوناقۇي بيزنەسىنىڭ وركەندەۋىنە، قىزمەت كورسەتۋ سالاسى مەن ينفراقۇرىلىمنىڭ جاقسارۋىنا وڭ اسەر ەتىپ، ەلىمىزدىڭ حالىقارالىق ءيميدجىن ودان ءارى نىعايتادى.

قازاقستاننىڭ بۇگىندە حالىقارالىق ستاندارتتارعا ساي ەڭ ءىرى سپورتتىق ءىس-شارالاردى ءوز دەڭگەيىندە ۇيىمداستىرا الاتىن مەملەكەتتەر قاتارىنا سەنىمدى تۇردە قوسىلعانىن ايتا كەتكەن ءجون. بۇل جەتىستىكتىڭ بارلىعى – سپورت ينفراقۇرىلىمىن جۇيەلى دامىتۋ، ۇيىمداستىرۋ ساپاسىن كوتەرۋ جانە حالىقارالىق فەدەراتسيالارمەن تىعىز ىنتىماقتاستىق ورناتۋ جولىنداعى كەشەندى جۇمىستاردىڭ جەمىسى.

Abai.kz