بيىل قاڭتار-ءساۋىر ايلارىندا قازاقستاننىڭ سىرتقى ساۋدا اينالىمى 44,9 ملرد اقش دوللارىن قۇرادى. بۇل بىلتىرعى سايكەس كەزەڭىمەن سالىستىرعاندا 7,9%-عا جوعارى.

ۇلتتىق ستاتيستيكا بيۋروسىنىڭ مالىمەتىنشە, ەسەپتى كەزەڭدە ەكسپورت كولەمى 24 ملرد اقش دوللارىنا، ال يمپورت كولەمى شامامەن 20,9 ملرد اقش دوللارىنا جەتتى.

اتاپ ايتقاندا، ەلىمىزدىڭ نەگىزگى ەكسپورتتىق نارىعى — قىتاي. ەسەپتى كەزەڭدە بۇل ەلگە 4,9 ملرد اقش دوللارى كولەمىندە تاۋار جونەلتىلدى. سونداي-اق يتالياعا — 4 ملرد دوللار، رەسەيگە — 2 ملرد دوللار، تۇركياعا — 1,7 ملرد دوللار جانە وزبەكستانعا — 1,4 ملرد دوللار كولەمىندە ءونىم ەكسپورتتالدى.

ال يمپورت بويىنشا قازاقستاننىڭ باستى سەرىكتەسى — رەسەي. اتالعان ەلدەن جەتكىزىلگەن تاۋار كولەمى 6,6 ملرد اقش دوللارىن قۇرادى. ودان كەيىن قىتاي — 6 ملرد دوللار، گەرمانيا — 1 ملرد دوللار، اقش — 0,9 ملرد دوللار جانە كورەيا رەسپۋبليكاسى — 0,5 ملرد دوللار كورسەتكىشپەن ورنالاسقان.

سونىمەن قاتار ۆەدومستۆو دەرەگىنە سۇيەنسەك، 2026 جىلعى قاڭتار–ساۋىر ايلارىندا قازاقستاننىڭ ەۋرازيالىق ەكونوميكالىق وداق (ەاەو) ەلدەرىمەن ءوزارا ساۋدا كولەمى ءوسىپ، 9,87 ملرد اقش دوللارىنا جەتكەن. وتكەن جىلدىڭ سايكەس كەزەڭىمەن سالىستىرعاندا 13,3%-عا ارتتى.

ونىڭ ىشىندە ەكسپورت كولەمى 2,7 ملرد دوللاردى قۇراپ، 7,9%-عا ازايسا، يمپورت كولەمى 7,16 ملرد دوللارعا جەتىپ، 24,1%-عا ءوستى.

وسىعان بايلانىستى قازاقستاننىڭ ەاەو ەلدەرىمەن ساۋدا اينالىمىندا رەسەيدىڭ باسىم ۇلەسى ساقتالىپ تۇر — 87,6%. قىرعىز رەسپۋبليكاسىنىڭ ۇلەسى — 8%، بەلارۋس رەسپۋبليكاسىنىڭ ۇلەسى — 4,1%، ارمەنيا رەسپۋبليكاسىنىڭ ۇلەسى — 0,3%.

بۇدان بولەك، ەكسپورتتا مۇناي مەن مەتالل ونىمدەرى باسىم. 2026 جىلدىڭ العاشقى ءتورت ايىندا قازاقستان ەكسپورتىنىڭ نەگىزگى بولىگىن بيتۋمينوزدى مينەرالداردان الىنعان شيكى مۇناي جانە شيكى مۇناي ونىمدەرى قۇرادى. ونىڭ ۇلەسى 44%-عا جەتتى.
ەكسپورت قۇرىلىمىندا تازارتىلعان مىس پەن وڭدەلمەگەن مىس قورىتپالارى — 7,5%، مىس كەندەرى مەن كونتسەنتراتتارى — 6,3%، فەرروقورىتپالار — 3,2%، بيداي جانە مەسلين — 3% ۇلەسكە يە بولدى.

يمپورتتىڭ نەگىزگى تاۋارلارى قاتارىندا جەڭىل اۆتوموبيلدەر جانە وزگە دە موتورلى كولىك قۇرالدارى (3,1%), مۇناي گازدارى مەن وزگە دە گاز تارىزدەس كومىرسۋتەكتەر (2,7%), دارىلىك زاتتار (2,6%), تەلەفون اپپاراتتارى (2,5%), ەلەكتر گەنەراتورلىق قوندىرعىلار مەن ەلەكتر تۇرلەندىرگىشتەرى (2,5%) بار.

جالپى، 2026 جىلدىڭ قاڭتار–ساۋىر ايلارىنداعى كورسەتكىشتەر قازاقستاننىڭ سىرتقى ساۋدا اينالىمىنىڭ وڭ ديناميكاسىن ساقتاپ وتىرعانىن جانە نەگىزگى حالىقارالىق سەرىكتەستەرمەن ەكونوميكالىق بايلانىستاردىڭ نىعايعانىن كورسەتەدى.

Abai.kz