قاراپايىم حالىقتىڭ قۇرمەتى - جۇمىسىما بەرىلگەن ەڭ جوعارى باعا!

بىزگە، پارلامەنتكە، مەنىڭ اتىما كۇنىگە قاپتاعان حاتتار تولاستاماي، كەيدە ءتىپتى 50 حاتقا دەيىن كەلەتىن بولعان سوڭ، كومەكشىم جاسۇلان يسا ەكەۋمىزدىڭ سۋرەتكە تۇسۋگە ۋاقىتىمىز بولمايتىن! ەندى 2026 جىلدىڭ 30 ماۋسىمى كۇنى، كەشكى ساعات 18:00-دە پارلامەنتتەگى ەڭ سوڭعى حاتقا جاۋاپتى جىبەرىپ، ۇلگەرىپ بولعاسىن عانا، ۋاقىت تاۋىپپىز.

بۇل تاۋەلسىزدىگىنە 35 جىل بولعان قازاق مەملەكەتىندە 30 جىل بەس اي جۇمىس ىستەگەن پارلامەنتتىڭ ەڭ العاشقى حاتىن كىم جولداعانىن بىلمەيمىن، ال پارلامەنتتىڭ ەڭ سوڭعى حاتىن مەن جولدادىم.

ول حاتتىڭ كىمنەن كەلگەنىن، كىمنىڭ ۇستىنەن ارىز ايتىپ كەلگەنىن، ول ارىزعا بايلانىستى دەپۋتاتتىق ساۋالحات قانداي ءتيىستى ورگانعا، كىمنىڭ اتىنا كەتكەنىن ەندى ەكى ايدان كەيىن ايتاتىن شىعارمىن… ەگەر سول كەزدە سۇراعاندار بولسا…

وتكەن اپتادا Kursiv.Media سايتى زەرتتەۋ جاساپ، 2026 جىلعى 20 مامىرعا دەيىنگى دەپۋتاتتار ساۋالىن ساناپ شىعىپتى، ءبىز ءوزىمىز بىلمەيمىز، ساناپ جۇرگەن جوقپىز…

ءيا، پارلامەنتتەگى ەڭ كوپ دەپۋتاتتىق ساۋال جاساپ، ۇكىمەت پەن قۇزىرەتتى ورگاندارعا تىنىم بەرمەگەن دەپۋتاتتاردىڭ ەڭ الدىندا ءۇش جىلدا 321 دەپۋتاتتىق ساۋال جاساعان ءبىزدىڭ اتىمىزدى اتاپتى.

ەڭ بەلسەندى دەپۋتاتتار قاتارىندا ءۇشىنشى ورىندا تۇرعان دەپۋتات تاڭساۋلە سەرىكوۆ 249 ساۋال جولداعان.

“اق جول” پارتياسى فراكتسياسىنىڭ 70 پايىزى، ياعني، 6 دەپۋتاتتىڭ 4-ەۋى العاشقى ورىندارعا، سەركە سەگىزدىككە كىرىپتى.

6-ورىنداعى ازات پەرۋاشەۆ 226, 7-ورىنداعى دانيا ەسپاەۆا 217, 8-ورىنداعى ەرلان بارلىباەۆ 215 دەپۋتاتتىق ساۋال جاساعان.

باسقا قىزمەتكە اۋىسىپ نەمەسە وكىلەتتىگى توقتاپ دەپۋتاتتىق مەرزىمدى سوڭىنا دەيىن جەتكىزە الماسا دا ۇزدىكتەر قاتارىنا ەنگەن ەكس-دەپۋتاتتار دا بار. ايتالىق، 2026 جىلعى 11 اقپاندا پرەزيدەنت اكىمشىلىگى ىشكى ساياسات ءبولىمى مەڭگەرۋشىسى بولىپ اۋىسقان ەلنۇر بەيسەنباەۆ 243 ساۋال جولداپ ۇلگەرگەن ەكەن.

جالپى، 200-دەن كوپ ساۋال جولداعان دەپۋتاتتار سانى – 12. ولاردى شارتتى تۇردە ەڭ بەلسەندى توپ دەۋگە بولادى. ال 100-دەن جوعارى ساۋال جىبەرگەندەر سانى – 40.

رەداكتسيا سونىمەن قاتار ساۋال جاساۋدا ەڭ تومەن كورسەتكىش كورسەتكەن دەپۋتاتتار قاتارىندا كىمدەر بار ەكەنىن كورسەتىپ، ولاردى «ۇندەمەستەر» دەپ اتاپتى.

سول جاساعان ساۋالدارىمىزدىڭ باسىم بولىگى حالىقتىڭ مۇڭ-مۇقتاجىن وتەپ، ماسەلەسىن شەشىپ جاتقانىن كورگەندە، كوڭىلىڭ ءوسىپ، قاناتتانىپ قالاسىڭ. شەشىلمەي قالعان ماسەلەلەر شيرىقتىرا تۇسەدى.

قوش بول، پارلامەنت!

قۇرىلتايعا اق جول!

تاكسيستىڭ قۇرمەتى ءتانتى ەتتى

“جۇمىسىڭا باعانى تاكسيستەر بەرىپتى!

4 شىلدە كۇنى الماتىدا ۇشاق ادەتتەگىدەي ءوز ۋاقىتىندا ۇشپاي، استاناعا كەشىگىپ كەلىپ، تۇنگى 12-لەردە اۋەجايدان شىققاسىن سىرتتا كولىك كۇتىپ ءبىراز تۇرىپ قالدىم.

جاسى الپىستى القىمداعان، ۇقىپتى كيىننەن موسقال كىسى كەلىپ امانداسىپ، جاعدايىمدى سۇرادى.

"سىزگە ريزامىن قازەكە! ۇنەمى ءسىزدىڭ ساۋالدارىڭىزدى تىڭدايمىن، ريزا بولىپ وتىرامىن", -  دەدى.

راحمەت ايتىپ، ءىلتيپات ءبىلدىردىم.

- كولىگىڭىز كەشىگىپ جاتىر ما؟ ءجۇرىڭىز مەن-اق جەتكىزىپ سالايىن ءسىزدى؟

- وي، راحمەت سىزگە. قازىر 15 مينۋتتا كەلۋ كەرەك.

شىن ريزاشىلىعىمدى ءبىلدىرىپ جاتىرمىن.

ول كولىگىنە قاراي ءجۇرىپ كەتتى دە، 5-10 مينۋتتا قايتا اينالىپ كەلدى.

- ءالى كەلمەدى مە كولىگىڭىز؟ ءجۇرىڭىز مەن-اق اپارىپ تاستايىن. وزىڭىزدەي قازاقتىڭ ءسوزىن سويلەپ جۇرگەن دەپۋتاتقا ءبىر ريزالىعىمدى بىلدىرگەنىم بولسىن، تەگىن جەتكىزىپ سالامىن! - دەيدى.

تاكسيست تاعى دا جىك-جاپار بولىپ جاتىر.

مەن ىڭعايزىزدانىپ، قىسىلىپ بارا جاتىرمىن. كولىگى قۇرعىر دا كەلە قويمايدى...

"كوپ راحمەت سىزگە! ىقىلاسىڭىزعا ىرزامىن. مەنى تاسىعاندا ءبارىبىر ۋاقىتىڭىز كەتەدى عوي، ودان دا ونىڭ ورنىنا بۇل ۋاقىتقا باسقالاردى تاسىپ، اقشا تاپقانىڭىز پايدالى عوي", - دەدىم.

"ازار بولسا، 5-6 مىڭ تەڭگە كەم تاپقاندا تۇرعان ەشتەڭە جوق، سىزگە ريزا بولعاندىقتان قىزمەت ەتەيىن دەپ تۇرمىن", - دەيدى.

تاكسيستىڭ قۇرمەتىنە ريزا بولىپ، ءبىراز سويلەسىپ قالدىق. اتى شارداربەك، وڭتۇستىك وڭىردەن، 60 جاستا كورىنەدى. 2000 جىلدان بەرى استانادا تۇرادى ەكەن. ءوزىنىڭ ماماندىعى تاريح ءپانى مۇعالىمى. 5-6 جىل مەكتەپتە مۇعالىم بولعان. استاناداعى "رەگيون" كومپانياسىنان 2021 جىلى ارەنداعا "كيا ريو" ماركالى كولىك الىپ، جولاۋشىلار تاسىمالداپ ءجۇر. قۇداي قالاسا، قىركۇيەكتە مەرزىمى ءبىتىپ، كولىك وزىنىكى بولادى

كۇندەلىكتى جوسپارى 13 مىڭ تەڭگە. تۇندە شىعادى تاكسيگە. اۋەجايدا جولاۋشىلاردىڭ ايتقانىنا كەلىسىپ كەتە بەرەدى.

تۇندە جۇمىس ىستەگەننىڭ ءبىر جاقسىسى كەپتەلىس جوق! ءارى، تاسكيستەردىڭ كليەنتتەرىنىڭ كوبىسىن تارتىپ العان "تارلان" جەڭىل رەلستى ترانسپورتى دا توقتايدى.

- وندا سىزبەن سۋرەتكە ءتۇسىپ الايىق.

ەكەۋمىز سۋرەتكە تۇستىك. اينالامىزدا سۋرەتكە تۇسىرۋگە ىڭعايلى ادام بولا قويمادى دا، سەلفي جاسادىق.

سول ارادا كولىگىم دە كەلىپ، جىلى قوشتاسىپ كەتتىك.

قاراپايىم حالىقتىڭ وسىنداي رياسىز ىقىلاسىن كورگەندە ريزا بولىپ، قاناتتانىپ قالاسىڭ. ونىڭ ۇستىنە پارلامەنت تاراپ كەتكەسىن، ۋاقىتشا جۇمىسسىز اتانىپ، مارتەبەمىز وزىمەن بىردەي بولىپ تۇرعاندا كورسەتكەن قۇرمەت ءتىپتى كۇشتى اسەر ەتەدى ەكەن.

پارلامەنتتە بەس جىل بوسقا جۇرمەگەن ەكەنبىز عوي دەپ، كوڭىلىم كوتەرىلىپ شىعا كەلدى.

2021 جىلى ءۇش پارتيا بولعان پارلامەنتتىڭ 7 شاقىرىلىمىندا دا جانە 2023 جىلى 100-دەي دەپۋتات ( 6 پارتيانىڭ 69 دەپۋتاتى مەن ءبىر مانداتتى 29 دەپۋتات) باس قوسقان 8 شاقىرىلىمدا دا قاتارىنان ەكى ەكى رەت “جىلدىڭ ۇزدىك دەپۋتاتى” اتانعانىمىز بوس ەمەس ەكەن عوي دەپ، مارقايىپ قالدىم.

سول ارادا “جاقسى جەتتىڭ بە؟” - دەپ، اۋىلدان حابارلاسىپ قالعان ءبىر قادىرلى اعامىزعا اۋەجايداعى اڭگىمەنى ايتىپ بەرىپ ەدىم، “پارلامەنتتەگى جۇمىسىڭا باعانى تاكسيستەر بەرىپتى!

"قاراپايىم حالىقتىڭ قۇرمەتى - ەڭ جوعارى باعا", - دەپ كوڭىلىمدى ودان ءارى كوتەرىپ تاستادى.

الدا تاعى الامان سايلاۋ! قۇرىلتايدىڭ ءدۇبىرى باستالىپ كەتتى!؟. اللا جار بولسىن! اق جول!

قازىبەك يسا

Abai.kz