قر پرەزيدەنتى اكىمشىلىگى باسشىسىنىڭ ءبىرىنشى ورىنباسارى ەرلان قارين قازاقستان تاريحىنىڭ كوپتومدىق اكادەميالىق باسىلىمىن ازىرلەۋ جونىندەگى رەداكتسيالىق القانىڭ قورىتىندى وتىرىسىندا ەلىمىزدە التىن وردانى زەرتتەيتىن دەربەس عىلىمي-تاريحي مەكتەپ قالىپتاسىپ كەلە جاتقانىن ايتتى.

«2019 جىلى پرەزيدەنت ۇلىتاۋعا ارنايى بارىپ، العاش رەت التىن وردا تۋرالى تاقىرىپتى كوتەردى. 2020 جىلى جوشى حان تاريحي-مادەني كەشەنى مەن ۆيزيت ورتالىقتىڭ قۇرىلىسى باستالدى. 2021 جىلى جوشى ۇلىسىن زەرتتەۋ ينستيتۋتى قۇرىلدى. 2023 جىلى قازاقستان تاريحىنىڭ كوپتومدىق اكادەميالىق باسىلىمىنداعى بولەك ءبىر تومدى التىن ورداعا ارناۋ تۋرالى شەشىم قابىلداندى. 2026 جىلى يۋنەسكو دەڭگەيىندە التىن وردا تاقىرىبىنا ارنالعان حالىقارالىق سيمپوزيۋم ۇيىمداستىرىلدى. مەملەكەت باسشىسى ءبىر عانا تاقىرىپتىڭ ءوزىن نازاردان شىعارماي، تاباندى ءارى تياناقتى، كەزەڭ-كەزەڭىمەن جۇمىس جۇرگىزىپ كەلەدى. ال وسىنداي قانشاما باستامالار مەن باعىتتار بار. تۇپتەپ كەلگەندە، وسىنىڭ بارلىعى قازاقستاندا التىن وردانى زەرتتەيتىن دەربەس عىلىمي-تاريحي مەكتەپ قالىپتاسىپ كەلە جاتقانىن كورسەتەدى»، – دەدى ەرلان قارين رەداكتسيالىق القانىڭ قورىتىندى 14-ءشى وتىرىسىندا.

ونىڭ ايتۋىنشا، كوپتومدىقتىڭ 3-ءشى تومىندا التىن وردا تاريحى تەك جورىقتار مەن شايقاستاردىڭ جىلناماسى عانا ەمەس، الەمدىك تاريحتاعى بىرەگەي وركەنيەتتىك مودەل رەتىندە جاڭاشا پايىمدالعان.

«كوپتومدىقتا التىن وردانىڭ وزىندىك مەملەكەتتىك باسقارۋ ينستيتۋتتارى، ديپلوماتيالىق قىزمەتى، بايلانىس جانە كەدەن جۇيەسى، حالىقارالىق دەڭگەيدە مويىندالعان ۆاليۋتاسى، ءوز داۋىرىنە ءتان وزىق تەحنولوگيالارى بولعانى عىلىمي تۇرعىدان نەگىزدەلىپ كورسەتىلدى»، – دەدى ەرلان قارين.

Abai.kz