كىتاپ وقيتىن قوعام – ويلانا الاتىن قوعام!
قازاقستان جازۋشىلار وداعى عيماراتىندا «قازاقستان جازۋشىلار وداعى» رقب مەن «كىتاپ وقيتىن ۇلت – چيتايۋششايا ناتسيا» قوعامدىق قورى اراسىندا ىنتىماقتاستىق تۋرالى مەموراندۋمعا قول قويىلدى.
كەلىسىم مەملەكەت باسشىسىنىڭ كىتاپ وقۋ مادەنيەتىن دامىتۋ، زەردەلى ۇلت قالىپتاستىرۋ جانە شىعارماشىل، باسەكەگە قابىلەتتى تۇلعا تاربيەلەۋ جونىندەگى باستامالارىن ىسكە اسىرۋعا جاڭا سەرپىن بەرىپ، جازۋشى مەن وقىرمان اراسىنداعى بايلانىستى نىعايتۋدى كوزدەيدى.
مەموراندۋمعا قازاقستان جازۋشىلار وداعى باسقارماسىنىڭ توراعاسى مەرەكە ابدەشۇلى قۇلكەنوۆ پەن «كىتاپ وقيتىن ۇلت – چيتايۋششايا ناتسيا» قوعامدىق قورىنىڭ توراعاسى باقىتجان جۇماعاليۇلى تۇرلىبەكوۆ قول قويدى.
قۇجات اياسىندا تاراپتار ۇلتتىق ادەبيەتتى كەڭىنەن ناسيحاتتاۋ، كىتاپ وقۋ مادەنيەتىن دامىتۋ، جازۋشىلار مەن وقىرماندار اراسىنداعى بايلانىستى نىعايتۋ، ادەبي-اعارتۋشىلىق ءىس-شارالاردى بىرلەسىپ ۇيىمداستىرۋ جانە جاستاردىڭ كىتاپقا قىزىعۋشىلىعىن ارتتىرۋ باعىتىندا ۇزاق مەرزىمدى ىنتىماقتاستىق ورناتۋعا كەلىستى.
الداعى ۋاقىتتا رەسپۋبليكا كولەمىندە جازۋشىلارمەن كەزدەسۋلەر، شىعارماشىلىق كەشتەر، شەبەرلىك ساعاتتارى، كىتاپحانالارداعى تاعىلىمدى جۇزدەسۋلەر، مەكتەپتەر مەن جوعارى وقۋ ورىندارىنداعى ادەبي كەزدەسۋلەر، سونداي-اق ۇلتتىق ادەبيەتتى دارىپتەۋگە باعىتتالعان بىرلەسكەن جوبالار جۇزەگە اسىرىلادى. بۇل جۇمىستارعا قازاقستان جازۋشىلار وداعىنىڭ وڭىرلىك فيليالدارى مەن ادەبي قاۋىمداستىق وكىلدەرى دە بەلسەندى قاتىساتىن بولادى.
- ۇلتتىڭ رۋحاني دەڭگەيى ەڭ الدىمەن ونىڭ كىتاپقا دەگەن كوزقاراسىمەن ولشەنەدى. كىتاپ وقيتىن قوعام – ويلانا الاتىن قوعام. سوندىقتان «كىتاپ وقيتىن ۇلت» باستاماسى جاي عانا جوبادان گورى ەلدىڭ ينتەللەكتۋالدىق الەۋەتىن ارتتىرۋعا باعىتتالعان ماڭىزدى قوعامدىق قوزعالىس بولىپ وتىر. قازاقستان جازۋشىلار وداعى وسى يگى ىسكە ءوز قالامگەرلەرىنىڭ شىعارماشىلىعى مەن تاجىريبەسىن جۇمىلدىرىپ، جازۋشى مەن وقىرمان اراسىنداعى التىن كوپىردى ودان ءارى نىعايتۋعا ۇلەس قوسادى، - دەدى قازاقستان جازۋشىلار وداعى باسقارماسىنىڭ توراعاسى مەرەكە قۇلكەنوۆ.
«كىتاپ وقيتىن ۇلت – چيتايۋششايا ناتسيا» قوعامدىق قورىنىڭ توراعاسى باقىتجان تۇرلىبەكوۆ: «باستى ماقساتىمىز – كىتاپ وقۋدى كۇندەلىكتى ءومىردىڭ اجىراماس مادەنيەتىنە اينالدىرۋ»، - دەيدى.
- بۇل مەموراندۋم – سونىڭ ناقتى كورىنىسى. قازاقستان جازۋشىلار وداعىنىڭ جوباعا قوسىلۋى ارقىلى ءبىز ادەبيەتتىڭ قوعامداعى ءرولىن كۇشەيتىپ، قالامگەرلەر مەن وقىرمانداردىڭ ەركىن سۇحبات الاڭىن كەڭەيتەمىز. ءار وڭىردە ۇيىمداستىرىلاتىن كەزدەسۋلەر مەن بىرلەسكەن باستامالار جاستاردىڭ كىتاپقا قىزىعۋشىلىعىن ارتتىرىپ، ۇلتتىق قۇندىلىقتاردى ناسيحاتتاۋعا تىڭ مۇمكىندىك بەرەدى، - دەيدى ول.
مەموراندۋمعا سايكەس قازاقستان جازۋشىلار وداعى رەسپۋبليكالىق جوبانىڭ سەرىكتەستەرىنىڭ ءبىرى رەتىندە وڭىرلىك فيليالدارىن، قالامگەرلەردى، ادەبيەتتانۋشىلاردى جانە مادەنيەت قايراتكەرلەرىن جوبا جۇمىسىنا تارتۋعا قولداۋ كورسەتەدى.
تاراپتار سونداي-اق رەسپۋبليكانىڭ بارلىق وڭىرىندە كىتاپ وقۋ مادەنيەتىن دامىتۋعا، قازاق ادەبيەتىن كەڭىنەن ناسيحاتتاۋعا، جاستاردىڭ كىتاپ وقۋعا قىزىعۋشىلىعىن ارتتىرۋعا جانە قوعامدا ءبىلىم مەن رۋحانيات قۇندىلىقتارىن نىعايتۋعا باعىتتالعان جاڭا باستامالاردى جۇيەلى تۇردە جۇزەگە اسىراتىن بولادى.
بۇل مەموراندۋم كىتاپتى قوعامنىڭ باستى قۇندىلىقتارىنىڭ بىرىنە اينالدىرۋعا باعىتتالعان ۇزاق مەرزىمدى سەرىكتەستىكتىڭ باستاۋى بولماق.
Abai.kz
