استانادا وتەتىن جي-فيلمدەر فەستيۆالىنە اقش پەن ءۇندىستانتان كوبىرەك قىزىعۋشىلىق تانىتتى.

(سۋرەت:https://baq.kz)

استانادا 1900-دەن استام ءوتىنىم تۇسكەن حالىقارالىق جي-فيلمدەر فەستيۆالى وتەدى.

استانادا جاساندى ينتەللەكت كومەگىمەن تۇسىرىلگەن فيلمدەردىڭ حالىقارالىق فەستيۆالى – Astana AI Film Festival شاراسىنا دايىندىق جالعاسۋدا.

بۇگىنگى تاڭدا كونكۋرسقا الەمنىڭ 90-نان استام ەلىنەن 1900-دەن استام ءوتىنىم تۇستى.

فەستيۆالدى ۇيىمداستىرۋ جانە دايىنداۋ ماسەلەلەرى Astana AI Film Festival قورىنىڭ قامقورشىلىق كەڭەسىنىڭ وتىرىسىندا تالقىلاندى.

قاتىسۋشىلار كونكۋرستىق باعدارلامانى، Astana Digital Bridge اياسىندا وتەتىن شارانىڭ ءوتۋ فورماتىن، سونداي-اق قاتىسۋشىلار مەن حالىقارالىق قوناقتاردى قابىلداۋ ماسەلەلەرىن قاراستىردى.

وتىنىمدەر سانى بويىنشا قاي ەلدەر كوش باستاپ تۇر؟

فەستيۆالگە ەڭ ۇلكەن قىزىعۋشىلىقتى اقش، ءۇندىستان جانە قازاقستان كينەماتوگرافيستەرى تانىتتى.

ۇيىمداستىرۋشىلاردىڭ مالىمەتىنشە، وتىنىمدەر ۇلەسى تومەندەگىدەي ءبولىندى:

اقش – 17%;

ءۇندىستان – 10%;

قازاقستان – 8%;

وڭتۇستىك كورەيا مەن قىتاي – 5%-دان;

ۇلىبريتانيا – 4%;

رەسەي مەن گونكونگ – 3%-دان.

ۇيىمداستىرۋشىلاردىڭ ايتۋىنشا، وتىنىمدەردىڭ مۇنداي گەوگرافياسى الەمدىك كينويندۋستريانىڭ فيلم جاساۋدا جاساندى ينتەللەكتىنى قولدانۋعا دەگەن قىزىعۋشىلىعىنىڭ ارتىپ كەلە جاتقانىن كورسەتەدى.

حالىقارالىق ءادىل قازىلار القاسىنا كىمدەر كىردى؟

فەستيۆالدىڭ حالىقارالىق قازىلار القاسىنىڭ قۇرامىنا مادەنيەت، كينو جانە تەحنولوگيا سالاسىنىڭ تانىمال وكىلدەرى ەندى.

ولاردىڭ قاتارىندا يۋنەسكو-نىڭ بۇرىنعى باس ديرەكتورى ودرە ازۋلە, China Film Group وكىلى ما پين جانە بەيجىڭ كينواكادەمياسىنىڭ وكىلى ۆان حاو بار.

Astana AI Film Festival فەستيۆالىنىڭ باس سەرىكتەسى – Freedom Holding Corp.

فەستيۆال قالاي وتەدى؟

Astana AI Film Festival استانادا 2026 جىلدىڭ 1–3 قازانى ارالىعىندا Astana AI Week شەڭبەرىندە وتەدى.

باعدارلامادا مىناداي شارالار جوسپارلانعان:

جۇلدە قورى 1 ميلليون اقش دوللارىن قۇرايتىن جي-فيلمدەردىڭ حالىقارالىق كونكۋرسى;

جاساندى ينتەللەكت جانە كينو تاقىرىبىنداعى كونفەرەنتسيا;

جوبالار پيتچينگى;

كوپشىلىككە ارنالعان كينوكورسەتىلىمدەر;

جي، كينو جانە تسيفرلىق شىعارماشىلىق سالاسىنداعى ساراپشىلارمەن كەزدەسۋلەر.

كونكۋرستىڭ باستى تاقىرىبى – «The future worth living in» («ءومىر سۇرۋگە تۇرارلىق بولاشاق»).

سونداي-اق بەس نوميناتسيانى قامتيتىن اشىق كونكۋرستىق سەكتسيا قاراستىرىلعان. ءوتىنىم قابىلداۋ 2026 جىلدىڭ تامىز ايىنىڭ سوڭىنا دەيىن جالعاسادى.

قاتىسۋشىلاردىڭ فيلمدەرى قايدا كورسەتىلەدى؟

فەستيۆالدىڭ رەسمي باعدارلاماسىنا ەنگەن تۋىندىلار العاش رەت كورەرمەندەرگە ۇلكەن ەكراندا – استاناداعى Chaplin كينوتەاترىندا ۇسىنىلادى.

ىسكەرلىك باعدارلاما Digital Bridge فورۋمى اياسىندا ءوتىپ، حالىقارالىق مامانداردىڭ قاتىسۋىمەن وتەتىن پلەنارلىق جانە پانەلدىك سەسسيالاردى، شەبەرلىك ساباقتارى مەن ۆوركشوپتاردى قامتيدى.

ۇيىمداستىرۋشىلاردىڭ پىكىرىنشە، Astana AI Film Festival وتكىزۋ كينەماتوگرافتىڭ جاڭا باعىتىن دامىتۋعا ارنالعان الاڭعا اينالادى، وندا جاساندى ينتەللەكت فيلم ءتۇسىرۋ پروتسەسىن عانا ەمەس، كونتەنت ءوندىرىسىنىڭ وزىنە دەگەن كوزقاراستى وزگەرتەدى.

Abai.kz