ەربول مىرزابوسىنوۆ استانادا ءوتىپ جاتقان «بولاشاق ويىندارى 2026» حالىقارالىق ءتۋرنيرى اياسىنداعى فيدجيتال-فۋتبول جارىسىن تاماشالاپ، قازاقستاندىق كوماندالارعا قولداۋ كورسەتتى.

ەسكە سالايىق، قازاقستاندا الەمنىڭ 50 ەلىنەن 800 سپورتشىنىڭ باسىن قوسقان ءىرى حالىقارالىق تۋرنير ءوتىپ جاتىر. جارىسقا ەلىمىزدىڭ اتىنان بارلىق سەگىز سپورتتىق باعىت بويىنشا 11 كوماندا قاتىسۋدا.

جارىستى تاماشالاۋ بارىسىندا مينيستر «بولاشاق ويىندارى 2026» ءتۋرنيرىن وتكىزۋدىڭ ەلىمىز ءۇشىن ماڭىزدى وقيعا ەكەنىن اتاپ ءوتتى.

«مەملەكەت باسشىسى قاسىم-جومارت توقاەۆتىڭ باستاماسىمەن جاريالانعان تسيفرلاندىرۋ جانە جاساندى ينتەللەكت جىلىندا بۇل ءتۋرنيردىڭ ءوتۋىنىڭ ءمانى ەرەكشە. «بولاشاق ويىندارى» سپورت پەن زاماناۋي تەحنولوگيالاردى بىرىكتىرىپ، ەلىمىزدىڭ يننوۆاتسيالىق دامۋ باعىتىن ايقىن كورسەتەدى.

تۋرنيرگە الەم بويىنشا قىزىعۋشىلىق ارتىپ كەلەدى. بۇگىندە ترانسلياتسيالاردى كورۋ سانى 185 ميلليونعا جەتتى. جارىستار 16 تىلدە كورسەتىلىپ، ونداعان حالىقارالىق مەدياسەرىكتەس پەن 100-دەن استام ستريمەر اقپارات تاراتۋدا. بۇل تۋرنيرگە دەگەن حالىقارالىق قىزىعۋشىلىقتىڭ جوعارى ەكەنىن كورسەتىپ، قازاقستاننىڭ الەمدىك دەڭگەيدەگى جارىستاردى ۇيىمداستىرۋشى ەل رەتىندەگى بەدەلىن نىعايتا تۇسەدى.

ءتۋرنيردىڭ وتۋىنە ۇلەس قوسىپ جاتقان سپورتشىلار مەن ۆولونتەرلەرگە العىسىمدى بىلدىرەمىن. كوماندالارىمىزعا ءساتتى ونەر كورسەتىپ، جاڭا جەڭىستەرگە جەتۋلەرىن تىلەيمىن»، – دەدى ەربول مىرزابوسىنوۆ.

Abai.kz