كەڭەستىك داۋىردەن قالعان ءبىر ماتەل بار ەدى: «ايتا-ايتا «التايدى»، جامال اپاي قارتايدى» دەگەن. سول سياقتى سويلەۋشىلەر سانى ارتقانىمەن كسرو-لىق كەرتارتپالىق كەجەگەمىزدەن تارتىپ، قازاق ءتىلىنىڭ باسىم ءتىل بولماۋى جانە ونىڭ باسىم بولۋىن ايتا-ايتا شارشاۋشىلىق بەلەڭ العانى جاسىرىن ەمەس.

بار ماسەلە بەسىنشى دوڭعالاقتاي بولعان سولتۇستىك كورشىمىزدىڭ ءتىلىنىڭ ءوز تۇعىرىنان مىزعىماۋى. جانە ونى مىزعىتۋعا دەگەن بيلىكتىڭ تىزگىنىن ۇستاعانداردىڭ ساياسي ساقتىعىنىڭ ىرىق بىرمەۋى. بىراق، قازاقتىڭ ۇزاق جىل ءارى رۋحاني، ءارى مادەني ەلورداسى بولعان الماتى كوشەلەرى: ۇلتتىق ساۋلەت پەن تىلدىك بىرەگەيلىكتىڭ ايناسىنا اينالدىراتىن كەز كەلگەن سياقتى.

وسى ورايدا ءبىزدىڭ ايتپاعىمىز: كەز كەلگەن الەمدىك مەگاپوليستىڭ وزىندىك كەيپى، تاريحي تامىرى جانە مادەني كودى بولادى. توكيو، پاريج نەمەسە ىستامبۇل كوشەلەرىنە قادام باسقاندا، ءسىز بىردەن قاي ەلدە جۇرگەنىڭىزدى ولاردىڭ كورنەكى اقپارات پەن كوشە اتاۋلارىنان-اق سەزىنەسىز. وسى تۇرعىدان العاندا، قازاقستاننىڭ رۋحاني ءارى مادەني ورتالىعى — الماتى قالاسىنىڭ كوشە اتاۋلارى مەن باعىتتاۋىشتارىن تەك قازاق تىلىندە جازۋ — ۋاقىت تالابى ءارى ۇلتتىق قاجەتتىلىك بولىپ تابىلادى.

بىرىنشىدەن، كوشە اتاۋى — جاي عانا مەكەنجايدى كورسەتەتىن تەحنيكالىق بەلگى ەمەس. ول — مەملەكەتتىك ءتىلدىڭ مارتەبەسىن ايشىقتايتىن يدەولوگيالىق قۇرال بولىپ سانالادى. مەگاپوليس ورتالىعىندا تۇرعان تاقتاشالاردىڭ مەملەكەتتىك تىلدە تولىق ءارى ساۋاتتى ورىندالۋى تۇرعىندار مەن قالا مەيماندارىنىڭ ساناسىندا قازاق تىلىنە دەگەن قۇرمەتتى ارتتىرادى. قوس تىلدە نەمەسە وزگە تىلدە جازىلعان اقپاراتتىڭ باسىم بولۋى قالانىڭ وزىندىك كولوريتىن كومەسكىلەپ، ونىڭ تاريحي بولمىسىنا كولەڭكە تۇسىرەدى.

ەكىنشىدەن، كورنەكى اقپاراتتى ءبىرتۇتاس قازاق تىلىنە كوشىرۋ — تىلدىك ورتانى تابيعي تۇردە قالىپتاستىرۋدىڭ توتە جولى ەكەنىن ەستە ۇستاعنانىمىز دا ءجون. كۇندەلىكتى تۇرمىستا، كوشەدە، قوعامدىق كولىكتە قازاقشا جازۋلاردى كورىپ وسكەن ۇرپاقتىڭ انا تىلىنە دەگەن ميلەتشىلدىگى جوعارى بولادى. بۇل رەتتە لاتىن گرافيكاسىن نەمەسە تولىقتاي قازاق ءالىپبيىن قولدانۋ قالا ينتەرەرىن زاماناۋي ديزاينعا سايكەستەندىرۋگە دە مۇمكىندىك بەرەدى.

توقسان اۋىز ءسوزدىڭ توبىقتاي ءتۇيىنى، الماتىنىڭ ءاربىر كوشەسى — ۇلتتىق رۋح پەن ءتىلدىڭ قورعانى بولۋى ءتيىس. كوشە جازۋلارىن تەك قازاق تىلىندە بىرىزدەندىرۋ — انا ءتىلىمىزدىڭ ءوز جەرىندە تولىققاندى قوجا ەكەنىن كورسەتەتىن باستى قادام ەكەنىن بۇقارا دا، بيلىك تە سەزىنۋگە ءتيىس.

Abai.kz