وتىز جىل بويى «ينفورمبيۋرو» ەلدەگى  باستى وقيعالاردى باقىلاپ، سارالاپ، كورەرمەندەرىن اقيقات حابارلارىمەن  اقپاراتتاندىرىپ، كۇردەلى ۇدەرىستەردى ءتۇسىندىرىپ، ادامداردىڭ تاعدىرىنا قاتىستى ماسەلەلەردى نازاردان تىس قالدىرماي، باعدارلاپ كەلەدى.

ەندى مىنە، «31 ارنانىڭ» باستى اقپاراتتىق باعدارلاماسى ءوزىنىڭ مەرەيتويىنا وراي مەرەكەلىك ەفيرمەن عانا شەكتەلمەي، الماتىعا جاڭا شاحمات الاڭىن سىيعا تارتۋدى شەشتى.

جاڭا شاحمات الاڭى  قالا تۇرعىندارىنىڭ سەرۋەندەۋگە جانە دەمالۋعا ارنالعان سۇيىكتى ورىندارىنىڭ ءبىرى – تەرەڭقۇردا ورنالاسادى. مۇندا تۇرعىندار ۇيگە قايتار جولدا جىلدام بليتس-شاحمات  ويناپ، وتباسىلىق تۋرنير ۇيىمداستىرا الادى  نەمەسە بەيتانىس قارسىلاسپەن شارشى تاقتادا جەكپە-جەك وتكىزۋىنە بولادى.

الاڭنىڭ اشىلۋىن قازاقستاندىق شاحمات فەدەراتسياسى قولدادى.

الاڭنىڭ اشىلۋىندا بالالار مەن شاحمات اۋەسقويلارى ءۇشىن كاسىبي سپورتشىلار – ايەلدەر گروسسمەيستەرى، قازاقستاننىڭ بىرنەشە دۇركىن چەمپيونى، دۇنيەجۇزىلىك شاحمات وليمپياداسىنىڭ قولا جۇلدەگەرى، ازيا چەمپيوناتىنىڭ التىن يەگەرى، قازاقستان شاحمات فەدەراتسياسىنىڭ اتقارۋشى ديرەكتورى گۇلميرا داۋلەتوۆا، سونداي-اق قازاقستان تاريحىنداعى ەڭ جاس گروسسمەيستەر، 16 جاسقا دەيىنگى جاسوسپىرىمدەر اراسىنداعى چەمپيون ەدگار مامەدوۆ ءبىر مەزگىلدە ويىن سەانسىن وتكىزەدى.

«الماتى ءۇشىن مۇنداي شاحمات كەڭىستىگىنىڭ پايدا بولۋى – شىن مانىندە ماڭىزدى وقيعا. قالاعا بالالار،  اتا-انالار، اۋەسقويلار جانە بولاشاق چەمپيوندار ءۇشىن شاحمات ويىنى كۇندەلىكتى ءومىردىڭ ءبىر بولىگىنە اينالاتىن ورىندار اسا  قاجەت. بۇگىنگى تاڭدا قازاقستاندا شاحماتتىڭ پرايم-ءداۋىرى ورلەپ تۇر: شاحمات ونەرىنە دەگەن قىزىعۋشىلىق ارتىپ، جاڭا ەسىمدەر تانىلىپ، ولاردىڭ حالىقارالىق دەڭگەيدە بەدەلى ارتىپ كەلەدى. ءدال وسىنداي كوزقاراس اۋلا مەن قالا الاڭدارىنان باستاپ ۇلكەن كاسىبي تاقتاعا دەيىنگى باعدارلار بولاشاق جەڭىستەر ءۇشىن بەرىك ىرگەتاس بولماق»، - دەيدى قازاقستان شاحمات فەدەراتسياسىنىڭ اتقارۋشى ديرەكتورى، ايەلدەر گروسسمەيستەرى گۇلميرا داۋلەتوۆا.

«الماتى – مادەنيەت پەن يدەيالار قالاسى، وندا بوس ۋاقىتتىڭ ءوزى ۇلكەن مۇمكىندىكتەرگە جول اشادى. شاحمات جانە باسقا دا زياتكەرلىك ويىندار قالا تۇرعىندارىنىڭ ومىرىندە ەرەكشە ورىن الادى. ءبىز جاستار مەن اعا ۇرپاقتى بىرىكتىرەتىن جانە شابىتتاندىراتىن سانالى دەمالىس ءداستۇرىن دامىتۋعا ءوز ۇلەسىمىزدى قوسقىمىز كەلەدى»، - دەدى  «31 ارنانىڭ» باس ديرەكتورى ايگۇل اقسامبيەۆا.

«ينفورمبيۋرونىڭ» 30 جىلدىعى تەك تەلەديدار تاريحىنداعى ماڭىزدى بەلەس رەتىندە عانا ەمەس، سونداي-اق  الماتى تورىندە  كۇن سايىن شاحمات الەمىنىڭ جاڭا پارتيالارى وينالىپ، قىزىقتى دا تارتىمدى ناعىز حالىقتىق باسەكەلەر وتكىزىلەتىن سپورت الاڭىنىڭ اشىلۋىمەن دە ەستە قالادى.

Abai.kz