نەپالدىڭ ۇلتتىق اپاتتاردىڭ زارداپتارىن جويۋ جونىندەگى باسقارماسىنىڭ مالىمەتىنشە، ەلدە تابيعي اپاتتان قازا تاپقاندار سانى 903 ادامعا جەتتى. بۇل تۋرالى BBC حابارلايدى.

سونىمەن قاتار نەپالدا 4200-دەن استام ادام حابار-وشارسىز كەتكەندەر تىزىمىندە تۇر. مەملەكەتتىك باق-تىڭ مالىمەتى بويىنشا، كورشىلەس قىتايدا 16 ادام قازا تاۋىپ، تاعى 546 ادام ءىز-ءتۇزسىز جوعالعان.

وتكەن اپتادا سۋ تاسقىنى باستالعان ايماقتان تومەنىرەك ورنالاسقان نەپالدىڭ چيتۆان اۋدانىنىڭ بيلىگى جاعالاۋدان تابىلعان بەلگىسىز مايىتتەردى جەرلەۋگە كوشتى. مايىتتەردى قويماس بۇرىن، كەيىن مارقۇمنىڭ جەكە باسىن تۋىستارىنىڭ گەنەتيكالىق دەرەكتەرىمەن سالىستىرىپ انىقتاۋ ءۇشىن دنق ۇلگىلەرى الىنىپ جاتىر.

تابىلعان 272 ءمايىتتىڭ 200-گە جۋىعى جەكسەنبى كۇنى جەرلەندى. شەنەۋنىكتەردىڭ ايتۋىنشا، قالعان مايىتتەر دە بۇگىن جەرگە تاپسىرىلۋى ءتيىس. بۇعان دەيىن چيتۆان بيلىگى دەنەنىڭ قاتتى زاقىمدانۋىنا بايلانىستى مارقۇمداردىڭ اتى-ءجونىن انىقتاۋ وتە قيىنعا سوعىپ جاتقانىن حابارلاعان ەدى.

نەپال پوليتسياسى ءاربىر جەرلەۋ پروتسەسىنىڭ مۇقيات قۇجاتتالاتىنىن جەتكىزدى. قابىرلەرگە ارنايى رەتتىك نومىرلەر بەكىتىلىپ، دنق ۇلگىلەرى مەن مارقۇمداردى تانۋعا كومەكتەسەتىن بارلىق قولجەتىمدى اقپارات ساقتالادى.

ەسكە سالساق، 26 تامىزدا نەپال مەن قىتاي شەكاراسى ماڭىندا كەنەتتەن باستالعان سۋ تاسقىنى جويقىن كوشكىنگە ۇلاسقان بولاتىن. سۋ، بالشىق پەن تاس ارالاس جويقىن اعىن اڭعارلار مەن ەلدى مەكەندەردى شايىپ كەتىپ، ۇيلەردى، جولداردى، كوپىرلەر مەن وزگە دە ينفراقۇرىلىمدى تالقاندادى.

بۇعان دەيىن نەپالداعى سۋ تاسقىنى سالدارىنان 794 ادامنىڭ قازا تاپقانى حابارلانعان ەدى.

Abai.kz