قالا كوشەلەرى مەن الاڭدارىندا بوي كوتەرگەن ەسكەرتكىشتەر – حالىقتىڭ تاريحي زەردەسىن ايقىندايتىن، وتكەننىڭ ونەگەسىن بۇگىنمەن جالعايتىن جانە كەلەر ۇرپاققا رۋحاني باعدار بەرەتىن مادەني قۇندىلىق. ءاربىر ەسكەرتكىش بەلگىلى ءبىر ءداۋىردىڭ تىنىسىن، ەل تاعدىرىندا ءىز قالدىرعان وقيعالار مەن تۇلعالاردىڭ ماڭىزىن ءوز بويىنا جيناقتايدى. سول ارقىلى ولار ۋاقىت شەكاراسىنان اسىپ، قوعامدىق سانانىڭ اجىراماس بولىگىنە اينالادى. ەسكەرتكىشتەر ۇلتتىڭ كىم ەكەنىن، نەنى قاستەرلەيتىنىن، قانداي قۇندىلىقتاردى بولاشاققا امانات ەتەتىنىن تانىتاتىن تاريحي تاڭبا قىزمەتىن دە اتقارادى.

تاريح بەتتەرىنە زەر سالساق، ەسكەرتكىشتەر قاشاندا ەل ومىرىندەگى ماڭىزدى وقيعالاردى، ۇلى جەتىستىكتەردى جانە حالىق جادىندا ساقتالۋعا ءتيىس كورنەكتى تۇلعالاردى ۇلىقتاۋ ماقساتىندا ورناتىلعان. ولار – وتكەننىڭ ءۇنسىز شەجىرەسى، حالىقتىڭ رۋحاني تامىرى مەن تاريحي ساباقتاستىعىن ساقتايتىن بەلگى. وسىنداي مۇرالار ارقىلى قوعام ءوز تاريحىمەن بايلانىسىن ۇزبەي، ۇلتتىق بولمىسىن تەرەڭىرەك سەزىنەدى. سونىمەن قاتار ەسكەرتكىشتەر قوعامدىق سانانى قالىپتاستىرۋدا دا ەرەكشە ءرول اتقارادى. ولار بەلگىلى ءبىر كەڭىستىكتى تاريحي ماعىنامەن تولىقتىرىپ، ادامداردى ورتاق جادى مەن ورتاق قۇندىلىق توڭىرەگىندە توعىستىرادى. سوندىقتان ەسكەرتكىش ورناتۋ – حالىقتىڭ ءوز تاريحىنا، ۇلى تۇلعالارىنا جانە رۋحاني مۇراسىنا دەگەن قۇرمەتىنىڭ كورىنىسى.

الەم كەڭىستىگىنە كوز جۇگىرتسەك، ءاربىر مەملەكەت ءوز تاريحىندا وشپەس ءىز قالدىرعان ۇلى تۇلعالارىن ۇلىقتاۋعا ەرەكشە ءمان بەرەدى. حالقىنىڭ تاعدىرىنا ىقپال ەتكەن قايراتكەرلەرگە ارنالعان ەڭسەلى ەسكەرتكىشتەر ەلدىڭ ءار وڭىرىندە بوي كوتەرىپ، ولاردىڭ تاريحي ورنىن ايشىقتاپ تۇرادى. بۇل – بەلگىلى ءبىر حالىقتىڭ ءوز رۋحاني كوشباسشىلارىنا دەگەن قۇرمەتىنىڭ، ۇلتتىق ساناسىنىڭ كەمەلدىگىنىڭ كورىنىسى. كوپتەگەن ەلدەردە مەملەكەت تاعدىرىن وزگەرتكەن تۇلعالاردىڭ ەسىمى ساۋلەت كەڭىستىگىن جايلاپ تۇر. ماسەلەن، رەسەيدە ءى پەترگە، تۇركيادا مۇستافا كەمال اتاتۇرىككە، ءۇندىستاندا ماحاتما گانديگە ارنالعان سانسىز ەسكەرتكىشتەر ولاردىڭ ەل تاريحىنداعى ءرولىن تانىتادى. رەسەي حالقى ءۇشىن ءى پەتر – ەل تاريحىنداعى اسا ماڭىزدى بەتبۇرىستاردىڭ باستاۋىندا تۇرعان، مەملەكەتتىڭ ساياسي قۇرىلىمىن جاڭعىرتىپ، ونىڭ حالىقارالىق بەدەلىن كۇشەيتكەن كورنەكتى رەفورماتور. ول – رەسەيدىڭ اسكەري قۋاتىن ارتتىرىپ، جاڭا باسقارۋ جۇيەسىن قالىپتاستىرىپ، مەملەكەتتىڭ دامۋىنا كەڭ جول اشقان تۇلعا. وسى تاريحي قۇرمەتتىڭ بەلگىسى رەتىندە رەسەيدىڭ وزىندە ءى پەترگە ارنالعان وننان استام ەسكەرتكىش بوي كوتەرگەن. سانكت-پەتەربۋرگتەگى ايگىلى ەسكەرتكىشىنەن باستاپ، وزگە ايماقتارداعى مۇسىندەرگە دەيىن ءى پەتردىڭ بەينەسى رەسەيدىڭ تاريحي كەڭىستىگىندە كەڭىنەن كورىنىس تاپقان. بۇل مونۋمەنتتەر ونىڭ مەملەكەت الدىنداعى ەڭبەگىن دارىپتەپ قانا تۇرعان جوق، تاريحي تۇلعاسىن قوعامدىق سانادا بەرىك ورنىقتىرۋعا دا قىزمەت ەتەدى. بۇل – حالىقتىڭ ءوز مەملەكەتىن جاڭا دەڭگەيگە كوتەرگەن قايراتكەرگە دەگەن ايرىقشا قۇرمەتىنىڭ ايعاعى. ياعني، ەل تاعدىرىنا زور ىقپال ەتكەن تۇلعانى ۇلىقتاۋ ماقساتىندا رەسەي ونىڭ ەسىمىن تەك تاريح بەتتەرىندە عانا ەمەس، ساۋلەت پەن مادەنيەت كەڭىستىگىندە دە جان-جاقتى دارىپتەپ وتىر.

وزگە حالىقتار ءوز مەملەكەتىنىڭ تاعدىرىن ايقىنداعان ۇلى تۇلعالارىن تاريحي ساناسىنىڭ تورىنە شىعارىپ، ولاردىڭ ەسىمىن كەڭ كولەمدە ۇلىقتاپ جاتسا، قازاق حالقى ءۇشىن مۇنداي بيىك مارتەبەگە ابدەن لايىق تۇلعا –  اقىمەت بايتۇرسىنۇلى. ۇلت رۋحانياتىنىڭ شامشىراعىنا اينالعان اقاڭنىڭ تاريحي بولمىسىن ءبىر عانا قىرىمەن باعالاۋ مۇمكىن ەمەس. ونىڭ تۇلعالىق دەڭگەيى تۋرالى جازۋشى جانە قوعام قايراتكەرى ءابىش كەكىلباەۆ: «اقىمەت بايتۇرسىنۇلى – ۇلتتىق تاريحىمىزدا ەشكىممەن سالىستىرۋعا بولمايتىن ەرەكشە تۇلعا. بالكىم، بىرەۋلەرگە بۇل ورىنسىز تامسانۋ بوپ كورىنەر. وعان دەيىن دە بۇل دالادا فارابي، ياسساۋي، قورقىت، اسانقايعى، ىبىراي، شوقان، ابايلار دا ءوتتى عوي دەسەر. ول راس. بىراق، اقىمەت بايتۇرسىنۇلى ولارعا ۇقسايدى دا، ۇقسامايدى دا. ۇقسايتىنى: ول دا اتالمىش الىپتار سياقتى ۇلتتىق دامۋىمىزدىڭ ءۇردىسى مەن قارقىنى قالعان دۇنيەدەگى دامۋ ءۇردىسى مەن قارقىنىنا سايكەس كەلمەي كەندە قالىپ، كورەر كوزگە تىعىرىققا تىرەلگەن حالقىنا اداستىرماس جول ىزدەدى. ۇقسامايتىنى: اقىمەت بايتۇرسىنۇلى ونداي جول قورقىت پەن اسان قايعىداي ۇيرەنشىكتى ءۇردىستى امان ساقتاپ قالاتىنداي جاڭا قونىس ىزدەۋمەن تابىلادى دەپ تۇسىنبەدى; فارابي مەن ياسساۋيدەي ءوز تۇسىنداعى كەڭ جايىلعان انتيكالىق نەمەسە يسلامدىق دۇنيەتانىمعا ۋاقىتىلى كوشۋ ارقىلى بارلىق ماسەلەنى شەشۋگە بولادى دەپ ۇقپادى; اباي، شوقان، ىبىرايلارداي تەڭدىككە جەتۋدىڭ جولىندا تەك اعارتۋشىلىقپەن شەكتەلگىسى كەلمەدى. (اقاڭ تەك اعارتۋشىلىقپەن شەكتەلمەدى دە.) ونىڭ ۇستىنە، بۇلاردىڭ ەشقايسىسىن دا اقىمەت بايتۇرسىنۇلىنىڭ رۋحاني قالىپتاسۋىنا تىكەلەي اسەر ەتتى دەۋ تىم اسىرا ايتقاندىق بولار ەدى. ول كەزدە جۇرتتىڭ كوبى فارابي مەن ءياسساۋيدىڭ زاتى تۇگىلى، اتىنا قانىق ەمەس ەدى» دەگەن بولاتىن.

ءيا، اقاڭ تەك اعارتۋشى ەمەس. ءالىپبي ءتۇزدى، ونىسى ماڭگىلىك جارامدى بولىپ تۇر. الىپپە جازدى، ونىسىن 110 جىلدان سوڭ قايتا قولدانباقشى بولىپ جاتىرمىز، بىراق تۇسىنە الماي جاتىرمىز. تەرمين جاساۋداعى، سىرتتان ءسوز الۋداعى ۇستانىمدارى بۇگىن دە وزەكتى. جاساعان ءپان سوزدەرىن قولدانىپ كەلەمىز، قولدانا دا بەرەمىز. عالىم رەفورماتور، ۇلت ازاتتىق قوزعالىستىڭ كوسەمى، مەملەكەت جانە قوعام قايراتكەرى. اقىمەت بايتۇرسىنۇلى – سەگىز قىرلى ەمەس، سەكسەن قىرلى تۇلعا.

• ونەر ادامى (اقىن، اۋدارماشى، كۇيشى، ءانشى);
• سالاۋاتتى ءومىر سالتىن ۇستانۋشى;
• قازاقتىڭ ءبىلىم بەرۋ جۇيەسىن قۇرۋشى;
• ءبىلىم مازمۇنىن قالىپتاستىرۋشى;
• نەنى كىمگە قالاي وقىتۋدى بىلەتىن ادىسكەر;
• قازاق عىلىمىنىڭ ء(تىل ءبىلىمى، ادەبيەتتانۋ) نەگىزىن سالعان عالىم;
• العاش ۇلتتىق ءالىپبي مەن ەملە جاساۋشى رەفورماتور;
• مەملەكەت قايراتكەرى (حالىق اعارتۋ كوميسسارى، اكادەميالىق ورتالىقتى قۇرۋشى);
• مادەنيەتتانۋشى («مادەنيەت تاريحى» دەگەن زەرتتەۋ كىتابىنىڭ اۆتورى)
• سىنشى (ادەبيەت جانە ونەر تۋىندىلارىنا باعا بەرىپ، پىكىر جازعان);
• باسپا ءىسىن ۇيىمداستىرۋشى («قازاق» گازەتىن قۇرىپ، تارالىمىن 8 مىڭ داناعا جەتكىزگەن);
• كوسەمسوزشى (جۋرناليست) (العاشقى ۇلتتىق گازەتتىڭ باس رەداكتورى);
• حالىق مۇراسىن جيناقتاۋشى («ەرسايىن» جىرى، «23 جوقتاۋ»، قازاقتىڭ ءانى مەن كۇيىن جيناۋعا مۇرىندىق بولعان);
• الاشوردا ۇكىمەتىن قۇرۋشى (الاش پارتياسىنىڭ باعدارلاماسىن جازعان);
• قازاق راديوسىن قۇرۋشىلاردىڭ ءبىرى جانە ت.ب.

ۇلت ۇستازىنىڭ وسىنداي مول مۇراسى ونىڭ ەسىمىن ۇلىقتاۋ كەرەكتىگىن دالەلدەيدى. الەم ەلدەرى ءوز رەفورماتورلارىن ونداعان ەسكەرتكىشپەن دارىپتەپ وتىرعان كەزدە، اقىمەتتەي الىپتىڭ ناسيحاتىنىڭ كەمشىن ءتۇسۋى تۇسىنىكسىز. ءيا، بۇگىندە اقىمەت بايتۇرسىنۇلىنا ارنالعان ەسكەرتكىشتەر ەلىمىزدىڭ بىرنەشە وڭىرىندە بار. ۇلت ۇستازىنىڭ تاريحي تۇلعاسىنا تاعزىم رەتىندە ورناتىلعان مۇنداي نىساندار قازاقستانمەن عانا شەكتەلمەي، شەتەل كەڭىستىگىندە دە كورىنىس تاپقان. اتاپ ايتقاندا، الماتى قالاسىنداعى اقىمەت بايتۇرسىنۇلى مۋزەي-ءۇيى جانىندا 2022 جىلى ورناتىلعان ەسكەرتكىش، قوستاناي قالاسىندا 2000 جىلى اشىلعان ۋنيۆەرسيتەت الدىنداعى مونۋمەنت، سونداي-اق تۇركيا استاناسى انكاراداعى ەسكەرتكىش – سونىڭ ايقىن دالەلى. بۇل، ءسوزسىز، اقاڭ مۇراسىنىڭ حالىقارالىق دەڭگەيدە دە مويىندالعانىن اڭعارتادى.

الايدا ماسەلە ەسكەرتكىشتىڭ بار-جوعىندا عانا ەمەس، ونىڭ سانى مەن ورنالاسۋ اۋقىمىنىڭ ۇلت الدىنداعى تاريحي ەڭبەكپەن قانشالىقتى سايكەس كەلەتىنىندە. اقىمەت بايتۇرسىنۇلى – قازاقتىڭ جازۋىن تۇزەگەن، ءتىل عىلىمىنىڭ نەگىزىن قالاعان، ۇلتتىق ءباسپاسوزدى ۇيىمداستىرعان، ەلدىك سانانى وياتقان بىرەگەي تۇلعا. اقاڭنىڭ ايتقاندارىنىڭ بارلىعى بۇگىنگىگە دە ۇستانىم بولا الادى. الەمدىك تاجىريبەدە ۇلت تاعدىرىن وزگەرتكەن تاريحي كوشباسشىلاردىڭ ەسىمى ەڭ ءىرى قالالاردا، ورتالىق الاڭداردا، مەملەكەتتىك ماڭىزى بار ورىنداردا كەڭىنەن ۇلىقتالادى. ال اقىمەت بايتۇرسىنۇلى سىندى ۇلت ۇستازىنىڭ ەسكەرتكىشتەرى دە قازاق ەلىنىڭ تاريحي-مادەني كەڭىستىگىندە الدەقايدا كەڭ ءارى لايىقتى دەڭگەيدە كورىنىس تابۋعا ءتيىس. بۇل – بولاشاق ۇرپاقتىڭ تاريحي ساناسىن قالىپتاستىرۋ جولىنداعى ماڭىزدى قادام.

اسىرەسە، اقىمەت بايتۇرسىنۇلىنىڭ ءومىر جولى مەن اعارتۋشىلىق قىزمەتىنە تىكەلەي قاتىستى تاريحي ورىندارعا ەسكەرتكىش ورناتۋ اسا ماڭىزدى. ماسەلەن، الماتىداعى قازىرگى قازاق ۇلتتىق پەداگوگيكالىق ۋنيۆەرسيتەتى – اقاڭنىڭ ۇستازدىق قىزمەتىمەن، اعارتۋ سالاسىنداعى ەڭبەگىمەن ساباقتاس كەڭىستىك. ول وسى ءبىلىم ورداسىندا قازىرگى پەداگوگيكا جانە پسيحولوگيا فاكۋلتەتىنىڭ عيماراتىندا ءدارىس وقىپ، قازاق جاستارىنىڭ ءبىلىم كوكجيەگىن كەڭەيتۋگە ۇلەس قوستى. دەمەك، ءدال وسىنداي تاريحي ءارى رۋحاني ماڭىزى بار ورىندا اقىمەت بايتۇرسىنۇلىنا قاتىستى ەسكەرتكىشتىڭ بولۋى – زاڭدى.

ونىڭ ۇستىنە، مۇنداي باستامانىڭ نەگىزسىز ەمەستىگىن سول اۋماقتاعى ارنايى تاقتايشانىڭ ورناتىلۋىنىڭ ءوزى اڭعارتادى. ياعني، بۇل ورىننىڭ اقاڭ تۇلعاسىمەن بايلانىسى مويىندالعان. الايدا سوعان قاراماستان، ءتۇرلى دەڭگەيدەگى شەشىم قابىلداۋشىلار تاراپىنان «الماتىدا اقىمەتكە ارنالعان ەسكەرتكىشتەر جەتكىلىكتى»، «ءبىر تۇلعاعا ءۇشىنشى ەسكەرتكىش ارتىق» دەگەن سىڭايداعى ۋاجدەرىن ەستىدىك. ۇلت ۇستازىنىڭ ەل تاريحىنداعى ورنىنا ساندىق ولشەممەن قاراۋ قانشالىقتى ورىندى؟ ماسەلە ەسكەرتكىشتىڭ سانى ەمەس، ونىڭ تاريحي ورنى مەن تاربيەلىك ماڭىزىندا ەمەس پە؟ ەگەر بەلگىلى ءبىر كەڭىستىك اقىمەت بايتۇرسىنۇلىنىڭ ءومىرى مەن قىزمەتىنە تىكەلەي قاتىستى بولسا، وندا سول جەردە ەسكەرتكىش ورناتۋ تاريحي ساباقتاستىقتىڭ ناقتى بەلگىسى بولار ەدى. ۇلت ۇستازىنا قاتىستى مۇنداي ماسەلەدە تار اۋقىمدى ەسەپتەن گورى، ۇلتتىق سانا مەن تاريحي تاعزىم بيىگىنەن قاراۋ الدەقايدا ماڭىزدى.

مۇنداي ماسەلەگە الەمدىك تاريحي قالالاردىڭ تاجىريبەسى تۇرعىسىنان قاراپ كورەلىك. ماسەلەن، سانكت-پەتەربۋرگ سەكىلدى تەرەڭ تاريحىمەن ەرەكشەلەنەتىن قالالاردا ۇلتقا، مەملەكەتكە قىزمەت ەتكەن تۇلعالاردىڭ ءىزى تەك مۇراجايلار مەن ارحيۆتەردە عانا ساقتالمايدى. قالانىڭ ءار كوشەسىندە، ءار الاڭىندا، بەلگىلى ءبىر عيماراتتىڭ ماڭىندا «مۇندا پالەن تۇلعا تۇرعان»، «وسى جەردە ەڭبەك ەتكەن»، «وسىندا ماڭىزدى تاريحي وقيعا وتكەن» دەگەن مازمۇنداعى ەسكەرتكىش تاقتالار، بەلگىلەر مەن مونۋمەنتتەر ورناتىلعان. ساياحاتشىلارعا سونىڭ ءبارىن كەرەمەتتەي عىپ بايانداپ تۇرعاندا تۇلعاعا تابىنۋشىلار الگى جانسىز زاتتارعا قۇرمەتپەن قاراپ، ەرەكشە كوڭىل كۇيگە تۇسەدى. بۇل – تاريحي جادتى كۇندەلىكتى ءومىر كەڭىستىگىنە ەنگىزۋدىڭ، حالىققا ءوز تاريحىن ۇمىتتىرماۋدىڭ ءتيىمدى جولى. ياعني، تاريحي تۇلعانىڭ ەل ومىرىندەگى ورنى قانشالىقتى ماڭىزدى بولسا، ونىڭ ءىزى قالعان مەكەندەردىڭ دە سونشالىقتى دارىپتەلۋى زاڭدى قۇبىلىس.

ونسىز دا ۇستاعان زاتتارى مەن قولجازبالارى جويىلىپ، تۇلدانعان اقاڭنىڭ تابانى تيگەن تابالدىرىقتىڭ الدىنداعى ورىندىقتا وتىرعان ەسكەرتكىشىن نەگە قويدىرماعان، كىم قويدىرماعان؟ ونداي ەسكەرتكىش الماتىدا شامشىگە قويىلعان، كەرەمەت! قىرعىزستان عىلىم اكادەمياسىنىڭ الدىندا شىڭعىسقا (ايتماتوۆ) قويىلعان. جارايسىڭ، قىرعىز ەلى! ونداي ەسكەرتكىش الماتىداعى كوك بازاردىڭ تومەنگى جاعىنداعى جۇرگىنشىلەر جولىندا ا.س.پۋشكينگە قويىلعان. قازاق ءۇشىن پۋشكين كىم؟ اقاڭ كىم؟ پۋشكينگە ءبىر كوشەنىڭ بويىندا ەكى ەسكەرتكىش ورناتىلعان. ءبىرى – عىلىم اكادەمياسىنىڭ عيماراتى جانىندا...

ەگەر اقىمەت بايتۇرسىنۇلى بەلگىلى ءبىر وقۋ ورنىندا ءدارىس بەرسە، ناقتى ءبىر عيماراتتا قىزمەت ەتسە نەمەسە ۇلتتىق اعارتۋشىلىققا قاتىستى تاريحي ەڭبەك اتقارسا، سول ورىنداردىڭ بارلىعى ۇلتتىق تاريحتىڭ بولشەگى رەتىندە قاراستىرىلۋى ءتيىس. سوندىقتان ونداي ورىنداردا ەسكەرتكىش، مەموريالدىق تاقتا نەمەسە تاريحي بەلگى ورناتۋ – وركەنيەتتى ەلدەرگە ءتان تاريحي سانا مادەنيەتى. ۇلت ۇستازىنىڭ ءىزى قالعان كەڭىستىكتەردى وسىلايشا ناقتىلاپ، قوعامدىق جادقا ەنگىزۋ ارقىلى ءبىز تۇتاس ۇلتتىڭ رۋحاني تاريحىن ۇلىقتايمىز.

قورىتا ايتقاندا، اقىمەت بايتۇرسىنۇلىنا ەسكەرتكىش ورناتۋ ماسەلەسى – تاس ءمۇسىن كوبەيتۋ نەمەسە قالا كەڭىستىگىن تولىقتىرۋ ەمەس. بۇل – ۇلتتىڭ ءوز تاريحي ساناسىنا، رۋحاني تامىرىنا جانە بولاشاعىنا دەگەن كوزقاراسىنىڭ ولشەمى. اقاڭ وزىنە ماڭگىلىك ەسكەرتكىشتى الدەقاشان جاساپ كەتكەن – ول قازاقتىڭ ءتىلى، ءالىپبيى، عىلىمى، ۇلتتىق ويى، ازاتتىق جولىنداعى رۋحى. اقىمەت بايتۇرسىنۇلىنىڭ ەسىمى حالىق جادىندا ونسىز دا وشپەيدى.

اقاڭدى ۇلىقتاۋ رۋحانياتتىڭ، ءبىلىمنىڭ، عىلىمنىڭ جولىنداعى ۇستاعان جولىمىزدىڭ دۇرىس-بۇرىستىعىن باعامداپ وتىرۋ ءۇشىن الدىمەن بىزگە كەرەك. اقاڭنىڭ ءار قىرىن تەرەڭ زەرتتەۋىمىز كەرەك. بۇعان ءار قايسىمىز شامامىز كەلگەنشە ۇلەس قوسۋىمىز كەرەك. اقاڭداي الىپقا استانا مەن الماتى قالالارىندا ابايدىڭ، قانىشتىڭ، كەنەسارىنىڭ ءتىپتى پەتەربورداعى I پەترگە، موڭعولياداعى شىڭعىس حانعا قويىلعانداي الىپ ەسكەرتكىش كەرەك. ورتا ءبىلىم جۇيەسىنە اقاڭ تانۋ كۋرستارىن جاپپاي ەنگىزۋ كەرەك. اقاڭنىڭ ۇستانىمدارىن جالپى الاش جولىن تۇراقتى تۇردە قاراستىرىپ، تۇجىرىمدارىن بۇگىنگى ومىرگە ەنگىزەتىن ۇلكەن عىلىمي زەرتتەۋ ينستيتۋتى (عزي) اشىلۋى كەرەك.

اقاڭنان بۇرىن دا اقاڭمەن قاتار دا، كەيىن دە، تاۋەلسىزدىك كەزدىڭ وزىندە دە بىرنەشە الىپپە شىعىپتى. بىرەۋى دە اقاڭنىڭ الىپپەسىنە تاتىمايدى. اقاڭنىڭ الىپپەسى قولدانۋعا بۇگىن دە جارامدى. وزىق قۇرال، تەڭدەسسىز الىپپە تۇرعاندا قايتا-قايتا جۇرمەيتىن بەلەسەبەت جاساپ اقىماق بولىپ ءجۇرىپپىز. اقاڭنىڭ الىپپەسىن قولدانىسقا قايتا اكەلۋىمىز كەرەك.

قايتالاپ ايتامىن، ەسكەرتكىش اقاڭ ءۇشىن ەمەس، ءبىز ءۇشىن قاجەت. ولار – ءبىزدىڭ كىمگە تاعزىم ەتەتىنىمىزدى، قانداي قۇندىلىقتاردى قادىرلەيتىنىمىزدى، ۇلت رەتىندە كىمنىڭ الدىندا قارىزدار ەكەنىمىزدى ۇمىتتىرمايتىن رۋحاني باعدار. بىزگە اقىمەت بايتۇرسىنۇلىنىڭ تاس مۇسىنىنەن بۇرىن، ونىڭ يدەياسى، قايراتى، ۇلت ءۇشىن جانكەشتى قىزمەتى ۇلگى ءۇشىن قاجەت. بىراق سول ۇلى مۇراتتى كەلەر ۇرپاقتىڭ ساناسىنا ءسىڭىرۋ ءۇشىن ونىڭ ءىزى قالعان جەرلەرىن سويلەتۋ، تاريحي كەڭىستىكتى تانىمعا اينالدىرۋ ماڭىزدى.

سوندىقتان ماسەلە «اقاڭعا تاعى ءبىر ەسكەرتكىش كەرەك پە؟» دەپ ونى قويدىرماعان شەنەۋنىك ويىنىڭ تار قۇرساۋىندا ەمەس، «اقىمەت بايتۇرسىنۇلىن قانشالىقتى تەرەڭ تانۋىمىز كەرەك، ونىڭ مۇراسىن قانشالىقتى بيىك دەڭگەيدە ۇستانا الامىز؟» دەگەن دەڭگەيدە شەشىلۋى كەرەك. سەبەبى اقىمەت بايتۇرسىنۇلى تاس مۇسىنگە مۇقتاج ەمەس. كەرىسىنشە، اقاڭداي ۇلت ۇستازىن ۇمىتپاۋعا، ونىڭ رۋحىمەن رۋحتانۋعا، ەلدىك سانامىزدى بەكەمدەۋگە مۇقتاج – ءبىز.

دينارا مەيرامبەكقىزى

Abai.kz