جەتىسۋ وبلىسىندا بيىل پايدالانۋعا بەرۋ جوسپارلانعان ءۇش ەكوپاركتىڭ سوڭعى - ءۇشىنشىسى اشىلدى. جالپى، ەكوپاركتەر مەملەكەت باسشىسىنىڭ تاپسىرماسىن ورىنداۋ جانە «تازا قازاقستان» جالپىۇلتتىق باعدارلاماسىن ىسكە اسىرۋ اياسىندا قۇرىلعان. تەكەلى قالاسىندا اشىلعان جاڭا «سەركەساي» ەكوپاركى تابيعات اياسىنداعى دەمالىس پەن بەلسەندى ءومىر سالتىن ۇشتاستىرىپ، وڭىردەگى ءتۋريزمدى دامىتۋعا ىقپال ەتپەك، – دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.

ءىس-شاراعا تەكەلى قالاسىنىڭ تۇرعىندارى مەن قوناقتارى، جەرگىلىكتى بيزنەس وكىلدەرى، ۇلتتىق قولونەر شەبەرلەرى، سپورتشىلار، تۋريزم سالاسىنىڭ وكىلدەرى، جالپى تابيعات اياسىندا بەلسەندى دەمالىستى ۇناتاتىن تۇرعىندار قاتىستى.

ءوڭىر باسشىسىنىڭ اتىنان جينالعانداردى وبلىس اكىمىنىڭ ورىنباسارى مارلەن كولباەۆ قۇتتىقتادى:

– مەملەكەت باسشىسىنىڭ تاپسىرماسىنا سايكەس جەتىسۋ وبلىسىندا ءۇش ەكوپارك اشىلدى، ولار - سارقان اۋدانىنداعى «قويتاس»، تالدىقورعان قالاسىنداعى «تاسباقا» جانە تەكەلى قالاسىنداعى «سەركەساي» ەكوپاركتەرى. وبلىس اكىمىنىڭ قولداۋىمەن ءۇش ەكوپارككە دە جايلى دەمالىس ءۇشىن قاجەتتى ينفراقۇرىلىم تارتىلدى. ولاردى دامىتۋ جۇمىستارى جالعاسادى. «سەركەساي» پاركىندە ءوز بەتىنشە دەمالۋعا ارنالعان ورىندار قۇرۋ، جارىقتاندىرۋ جۇيەسىن جانە بەينەباقىلاۋ كامەرالارىن ورناتۋ، ينتەرنەت جەلىسىن جۇرگىزۋ كەزەڭ-كەزەڭىمەن جوسپارلانۋدا. بۇل جەرگە كەلگەن ءار ادامنىڭ جايلى ءارى جاقسى دەمالىسى ءۇشىن بارلىق جاعداي جاسالادى. سونىمەن بىرگە ەكوپاركتىڭ تازالىعى مەن تابيعاتىن ساقتاۋ ارقايسىمىزعا بايلانىستى ەكەنىن ەستە ۇستاۋىمىز كەرەك. دەمالعاننان كەيىن قوقىس قالدىرماي، تابيعاتقا ۇقىپتى قارايىق. بۇل ورىنداردى بالالارىمىز بەن كەلەر ۇرپاق ءۇشىن وسىنداي كورىكتى قالپىندا ساقتاپ جەتكىزەيىك، – دەدى ول.

اشىلۋ باعدارلاماسى بىرنەشە تاقىرىپتىق باعىتتى قامتىدى. نەگىزگى الاڭداردىڭ ءبىرى جەرگىلىكتى تاۋار وندىرۋشىلەر، شەبەرلەر مەن قولونەرشىلەردىڭ ونىمدەرى ۇسىنىلعان «تابيعاتتان تۋعان ونەر» كورمەسى بولدى. كەلۋشىلەر ومارتاشىلىق ونىمدەرىمەن، شوپتەر مەن مايلار نەگىزىندە دايىندالعان تابيعي كوسمەتيكالىق ونىمدەرمەن، ۇلتتىق زەرگەرلىك بۇيىمدارمەن تانىسىپ، تەكەلىنىڭ تانىمال پراندىگىنەن ءدام تاتتى.

ۇلتتىق ەتنومادەني مۇراعا ارنالعان كورمە دە كوپشىلىكتىڭ قىزىعۋشىلىعىن تۋدىردى. مۇندا بۇركىتشىلىك ونەرى، تازى ءوسىرۋ ءداستۇرى، سونداي-اق ۇلتتىق قولونەر بۇيىمدارىن جاساۋ ۇلگىلەرى تانىستىرىلدى.

باعدارلامانىڭ شىعارماشىلىق بولىگى «ونەر الەمى» كورمەسىمەن جانە جەرگىلىكتى بالالار شىعارماشىلىق ورتالىعىنىڭ ونەرى كورسەتۋىمەن جالعاستى. قوناقتار جاس سۋرەتشىلەردىڭ تۋىندىلارىن تاماشالاپ، دومبىرا، قوبىز، جەتىگەندە ورىندالعان مۋزىكالىق شىعارمالاردى تىڭدادى.

تەكەلى كاسىپتىك كوللەدجى تۋريستىك باعىتتاردى تانىستىردى. «تۋريستىك قورجىن» كورمەسى اياسىندا تۋريستىك قۇرال-جابدىقتار مەن ساياحاتقا قاجەتتى كەرەك-جاراقتار ۇسىنىلدى. تۋريستىك ورتالىق ماماندارى تۋريستىك كوپسايىس پەن سپورتتىق الپينيزم كورسەتىلىمدەرىن ۇيىمداستىردى. ءىس-شارا باعدارلاماسى سكانديناۆيالىق جۇرىستەن وتكەن جارىسقا قاتىسۋشىلاردى ماراپاتتاۋ راسىمىمەن قورىتىندىلاندى.

ەكوپاركتىڭ اشىلۋىنا دەيىن «سەركەسايدى» اباتتاندىرۋدىڭ ءبىرىنشى كەزەڭى تولىق اياقتالدى. اۋماقتا اۆتوتۇراق جاسالىپ، دەمالۋعا ارنالعان بەس شاتىر ورناتىلدى. سونىمەن قاتار 10 جەكە ورىندىق، شاتىرلاردىڭ ىشىنە 10 ورىندىق جانە بەس ۇستەل قويىلعان. «تاۋتەكە» ەكى شاعىن ساۋلەت نىسانى جاسالىپ، ورناتىلدى. سانيتارلىق توراپ تا تولىق جابدىقتالدى. بۇدان بولەك، تەڭىز دەڭگەيىنەن 1700 مەتر بيىكتىكتە تاۋلاردىڭ كوركەم كورىنىسى اشىلاتىن شولۋ الاڭى ورنالاستىرىلدى.

وسى كەزەڭگە جوسپارلانعان جۇمىستار تولىق كولەمدە ورىندالدى. وسىلايشا بۇل اباتتاندىرىلعان اۋماق تەكەلى تۇرعىندارى مەن قوناقتارىنىڭ دەمالۋىنا، سپورتتىق، مادەني جانە تۋريستىك ءىس-شارالار وتكىزۋگە ارنالعان جاڭا ورىنعا اينالماق.

ءىس-شاراعا قاتىسقان ازاماتتار پىكىر ءبىلدىردى. سولاردىڭ ءبىرى – تالدىقورعان قالاسىنىڭ تۇرعىنى اننا حوحارينا:

– بۇگىن «سەركەساي» ەكوپاركىنىڭ اشىلۋىنا ارنايى كەلدىك. مۇندا كىشكەنتاي سابيىممەن كەلدىم. ول «كەنگۋرۋ» سومكەسىندە مەنىمەن بىرگە تاۋدىڭ ەڭ بيىك بولىگىنە دەيىن كوتەرىلدى. تەكەلىگە ءجيى كەلىپ، وسىندا سەرۋەندەپ تۇرامىن. ەندى سوقپاق اباتتاندىرىلىپ، دەمالۋعا ارنالعان شاتىرلار ورناتىلىپ، ورىندىقتار قويىلعانىن كورىپ قۋانىپ قالدىق. قازىر كۇزدىڭ ادەمى مەزگىلى باستالدى. سوندىقتان مۇنداي مەزگىلدە ۇيدە وتىرماي، وسىلاي تابيعاتقا شىققان دۇرىس. تاۋعا كەلىڭىزدەر! – دەدى ول.

– مەن الماتىدان تەكەلىگە قوناققا كەلدىم. مۇندا نەگىزىنەن پاراپلانمەن ۇشۋعا ارنايى كەلدىك. ەكوپاركتىڭ اشىلاتىنىن ءبىلىپ، وسىندا كەلىپ تاماشالاۋدى ءجون كوردىك. اۋا رايى تاماشا، تابيعاتى دا كەرەمەت. بۇعان دەيىن دە وسى جەردە بولعانمىن، دەگەنمەن بارعان سايىن بۇل جەر قاتتى ۇناي باستادى. مۇندا كەلگەن سايىن بويىڭا كۇش-قۋات الىپ قايتاسىڭ. ونىڭ ۇستىنە اۋماقتى وتە ۇقىپتى ءارى جاقسى اباتتاندىرعان، – دەدى الماتى قالاسىنىڭ تۇرعىنى بالتاباي ساۋساقوۆ.

جەرگىلىكتى تۇرعىندار دا پىكىر قوستى:

– ءبىزدىڭ قالادا ەكوپاركتىڭ اشىلعانىنا وتە قۋانىشتىمىز. جوعارىعا كوتەرىلىپ، تازا اۋامەن تىنىستادىق، كادىمگىدەي تىنىسىمىز اشىلدى. مۇندا ءبارى وتە ادەمى جاسالعان. ەندى وسىعان ۇقىپتى قاراپ، قوقىس تاستاماي، اركىم وزىنەن كەيىن جيناپ جۇرسە دەيمىز. ويتكەنى مۇنىڭ ءبارى ارقايسىمىزدىڭ يگىلىگىمىز ءۇشىن جاسالىپ وتىر.

– ەكوپاركتىڭ اشىلۋىمەن قۇتتىقتايمىن! تابيعات اياسىندا بەلسەندى دەمالىپ، تازا اۋادا سەرۋەندەۋ دەنساۋلىققا پايدالى، دەنەنى شىنىقتىرادى. ەندى مۇندا تەكەلىكتەرگە  دەمالۋعا قولايلى جاعداي جاسالدى، قالا قوناقتارىن دا قىزىقتىرادى دەپ ويلايمىن، - دەدى ولار.

وسىلايشا، «سەركەساي» ەكوپاركىنىڭ اشىلۋىن وڭىردەگى تۋريزم مەن تۋريستىك ينفراقۇرىلىمدى دامىتۋ جولىنداعى كەزەكتى قادام دەۋگە بولادى.

Abai.kz