جاپونيا تاياۋ شىعىسقا تاۋەلدىلىكتى ازايتادى: ەلدەگى ءموز-دەر باسقا ايماقتاردىڭ مۇنايىن قابىلداۋعا كوشۋدە...

جاپونيا ۇكىمەتى ۇلتتىق ەنەرگەتيكالىق قاۋىپسىزدىكتى نىعايتۋ ماقساتىندا وتاندىق مۇناي وڭدەۋ زاۋىتتارىن ء(موز) قايتا جابدىقتاۋعا شۇعىل تۇردە قارجىلاي قولداۋ كورسەتەتىنىن حابارلادى. نەگىزگى ماقسات — مۇناي وڭدەۋ ءوندىرىسىن تاياۋ شىعىستان تىس ايماقتاردان جەتكىزىلەتىن شيكىزات تۇرلەرىن قابىلداۋعا بەيىمدەۋ.

Kyodo اگەنتتىگىنىڭ تاراتقان مالىمەتىنە سۇيەنسەك، جاپون بيلىگى وسى باعىتتاعى قايتا جاڭعىرتۋ جۇمىستارىنا باستاپقى كەزەڭدە 95 ميلليون دوللار (شامامەن 41,9 ميلليارد تەڭگە) ءبولۋدى جوسپارلاپ وتىر. سالا ماماندارىنىڭ ايتۋىنشا، كەيىننەن بۇل قارجىلاندىرۋ كولەمى ودان ءارى ۇلعايۋى مۇمكىن.

قازىرگى تاڭدا جاپونيادا 19 مۇناي وڭدەۋ زاۋىتى جۇمىس ىستەيدى. الايدا ولاردىڭ باسىم بولىگى تەحنيكالىق تۇرعىدان تەك تاياۋ شىعىس مۇنايىن وڭدەۋگە ىڭعايلاستىرىلعان. وسىعان دەيىن كۇنشىعىس ەلى تۇتىناتىن مۇناي يمپورتىنىڭ 90%-عا جۋىعى ءدال وسى ايماققا تيەسىلى بولىپ كەلگەن ەدى.

ءارتۇرلى كەن ورىندارىنان شىعاتىن شيكى مۇنايدىڭ قۇرامىنداعى كۇكىرت مولشەرى مەن تۇتقىرلىعى بىردەي ەمەس. سوعان بايلانىستى باسقا ايماقتاردىڭ شيكىزاتىن وڭدەۋ ءۇشىن زاۋىتتارداعى وندىرىستىك جابدىقتاردى تەرەڭ تەحنولوگيالىق جاڭعىرتۋ تالاپ ەتىلەدى.

ەنەرگەتيكالىق لوگيستيكاداعى بەتبۇرىسقا گەوساياسي جاعدايلار، اسىرەسە ورمۋز بۇعازىنىڭ جابىلۋى تۇرتكى بولدى. اتالعان تەڭىز جولىنىڭ بۇعاتتالۋى جاپوندىق ەنەرگەتيكالىق كومپانيالاردى بالامالى باعىتتاردى جەدەل ىزدەستىرۋگە ءماجبۇر ەتتى.

بۇگىندە جاپونيا شيكىزاتتى سولتۇستىك امەريكا مەن وڭتۇستىك سۋدان سياقتى بالامالى وڭىرلەردەن تاسىمالداۋعا باسىمدىق بەرە باستادى. نارىقتى ءارتۇرلى كوزدەر ارقىلى ديۆەرسيفيكاتسيالاۋدىڭ ارقاسىندا جاپونيا مۇناي يمپورتىنداعى تاياۋ شىعىستىڭ ۇلەسىن بۇرىنعى 90%-دان 62%-عا دەيىن تومەندەتە الدى.

وسى اپتادا ساۋد ارابياسى «شىعىس — باتىس» مۇناي قۇبىرىنىڭ جۇمىسىن قايتا جانداندىرعانىن مالىمدەدى. بۇل تاياۋ شىعىستاعى شيكىزات تاسىمالىن ءىشىنارا قالپىنا كەلتىرۋگە مۇمكىندىك بەرگەنىمەن، توكيونىڭ ەنەرگەتيكالىق تاۋەلسىزدىكتى قامتاماسىز ەتۋگە باعىتتالعان ستراتەگيالىق جوسپارىن وزگەرتپەيدى. توقاۋسىز جەتكىزىلىمدەردى ساقتاۋ ءۇشىن جاپونيا ينفراقۇرىلىمدى قايتا قۇرۋ جۇمىستارىن ۇزدىكسىز جالعاستىرا بەرمەك.

Abai.kz