قازاقستاننىڭ ۆيتسە-پرەزيدەنتى ەرلان قارين ۇكىمەتتىك كوميسسيا قايعىلى وقيعانىڭ سەبەپتەرىن تەرگەپ جاتقانىن ايتتى. 

— مەملەكەت باسشىسى قاسىم-جومارت توقاەۆتىڭ وكىمىمەن ەلىمىزدە جالپىۇلتتىق ازا تۇتۋ كۇنى جاريالاندى. قارالى كۇنگە بايلانىستى بارلىق مەملەكەتتىك تۋلار تومەن ءتۇسىرىلدى. ويىن-ساۋىق شارالارىنا تىيىم سالىندى. تەلەارنالار مەن راديولاردىڭ باعدارلاماسىنا وزگەرىستەر ەنگىزىلدى. اقپاراتتىق سايتتار مەن مەرزىمدى باسىلىمدار اق-قارا ءتۇستى رەجيمگە كوشىرىلدى. بەلگىلەنگەن تارتىپكە سايكەس، مەملەكەتتىك دەڭگەيدەگى رەسمي وتىرىستار مەن ءىس-شارالار قازا تاپقانداردى ۇنسىزدىكپەن ەسكە الۋدان باستالىپ جاتىر، — دەپ جازدى ۆيتسە-پرەزيدەنت.

ول قۇقىق قورعاۋ ورگاندارى تاراپىنان ءتيىستى تەرگەۋ جۇمىستارى جۇرگىزىلىپ جاتقانىن ايتتى.

— قايتىس بولعان اسكەري قىزمەتشىلەردىڭ وتباسىلارىنا تاعى دا قايعىسىنا ورتاقتاسىپ كوڭىل ايتامىن. جاۋىنگەرلەر وتان الدىنداعى اسكەري بورىشىن ادال اتقاردى.

ارنايى ۇكىمەتتىك كوميسسيا قۇرىلىپ، جۇمىسىن باستاعانى بەلگىلى. قۇقىق قورعاۋ ورگاندارى تاراپىنان ءتيىستى تەرگەۋ جۇمىستارى جۇرگىزىلىپ جاتىر.

مەملەكەت باسشىسى قازا تاپقان ازاماتتاردىڭ تۋعان-تۋىستارىنا جان-جاقتى كومەك پەن قولداۋ كورسەتۋدى تاپسىردى. ودان بولەك ەلىمىزدىڭ بەلگىلى كاسىپكەرلەرى مارقۇمداردىڭ وتباسىلارىن ماتەريالدىق تۇرعىدان قولدايتىندارىن مالىمدەپ جاتىر.

حالقىمىز وسىناۋ قيىن ساتتە تاعى دا وزىنىڭ بەرەكە-بىرلىگىن كورسەتىپ، اۋىر قايعىنى بولىسۋدە. جۇرتتىڭ ىنتىماعى، مەملەكەتتىڭ بەرىكتىگى وسىنداي قىسىلتاياڭ شاقتا بىلىنەدى. سول سەبەپتى بارشامىز سابىر ساقتاپ، ءبىر-بىرىمىزگە قامقورلىق تانىتىپ، ەلدىگىمىزدى ءبىلدىرىپ، اۋىر سىناقتان بىرلەسىپ شىعايىق. كوك بايراعىمىز ءاردايىم بيىكتە جەلبىرەسىن، تۇعىرىنان تۇسپەسىن، — دەپ جازدى ەرلان قارين.

Abai.kz