مۇستافا شوقاي:

بۇگىن قازاقستان، قىرعىزستان، قاراقالپاقستان، وزبەكستان، تۇركمەنستان، تاجىكستان دەپ جاس ۇكىمەت كۇشىن التى جۇمحۇرياتقا ءبولىپ تۇرعان تۇركىستان بولىنبەس ايرىلماس ءبىر ولكە.

حالقىنىڭ قانى ءبىر، ءتىلى ءبىر، ءدىنى ءبىر، ماقساتى ءبىر. تۇركىستاننىڭ ماقساتى: ءوزىنىڭ كۇتىلۋى، ۇلتتىق ۇكىمەتىن قۇرىپ تاۋەلسىز بولىپ ءوز الدىنا ءبىر ۇكىمەت بولىپ تۇرۋى. حالقى كوپتەن بۇل جۇمىسقا جانتالاسىپ جۇمىس ىستەپ، قان توگىپ سوعىسىپ كەلەدى. ءۇمىتىمىز زور، مەملەكەتىمىزدىڭ كەلەشەگىنە سەنەمىز.

تۇركىستان جاستارى اسىرەسە بۇل ماقساتىمىزعا جەتكىزۋگە تالاسىپ تىرمىسىپ جاتىر. ءبىزدىڭ ماقساتىمىز تەك تۇركىستاننىڭ عانا ەمەس، بۇكىل تۇرىك ولكەلەرىنىڭ، بۇكىل تۇرىك حالىقتارىنىڭ دوس بولىپ ءوزارا بىرلىك باۋىرلاستىقپەن جاساپ سىرتقى دۇشپاندارعا قارسى ءوزىنىڭ كۇشىن، ۇكىمەتىنىڭ كۇشىن ءبىلدىرىپ كويۋ. ويىمىزعا جەتەمىز، تالابىمىزدى ورىنىنا كەلتىرەمىز دەگەن يمانىمىز زور جانە كۇشتى.

حالقىمىز بەن جاس ۇكىمەتتىڭ جۇگى قانشا اۋىر بولسا، ءبىزدىن شىعىسىمىز سونشا قاتتى، سونشا كۇشتى بولماق. الىستا ءجۇرىپ ەل قايعىسىن ويلاپ، الىستا ءجۇرىپ ەل قامىن ويلاپ ەۋروپانىڭ ءار تاراپىندا جۇرگەن، بۇگىنگى تۇركيادا تۇرعان تۇركىستان جاستارى بىرلەسىندەر!

سەندەردىڭ بىرلىكتەرىڭ، سەندەردىڭ ءبىر-بىرلەرىڭە كۇش قوسۋلارىڭ، ەلىمىزدىڭ باقىتىنا قىزمەت ەتپەك. مۇنى ۇمىتپاڭدار! ءبارىمىزدىن قۇبىلامىز ءوزىمىزدىڭ اتاجۇرتىمىز، ولكەمىز تۇركىستان بولماق. تۇركىستان ءۇشىن ءولۋ، تۇركىستان ءۇشىن جان بەرۋ بارىمىزگە ءبىر ماقسات، ءبىر كيەلى مىندەت بولماق. مۇنى ۇمىتپاۋ كەرەك.

تۇرىك حالقى باتىر حالىق، تۇرىك حالقى ارىستان، ەر حالىق.

كىمنەن تاياق جەگەندەي، ءبىزدىڭ تۇرىكتىڭ بالاسى،

الدىرىپ جۇرگەن دۇشپانعا اۋزىنىڭ الاسى.

بۇل ناقىل ءسوزدى ۇمىتپاۋىمىز كەرەك. ءبارىمىز ءبىر بولساق، ءبىزدىڭ جەڭبەيتىن جاۋىمىز بولمايدى.

ماقساتىمىزعا جەتەمىز، ونسىز ءبىزدىڭ كۇنىمىز جوق. قۇرىپ كەتەمىز. بوسىپ كەتەمىز. قۇرىماس ءۇشىن، بوسپاس ءۇشىن، كۇشىمىزدى بىرىكتىرىپ ءيىن تىرەستىرىپ ءبىر-بىرىمىزگە جاردەم بەرىپ ءجۇرۋىمىز كەرەك. ونسىز ءبىزدىڭ كۇنىمىز كاراڭ. مۇنى ۇمىتپاۋ كەرەك.