قازاقستان رەسپۋبليكاسىنىڭ

پرەمەر-ءمينيسترى

ك.ق.ماسىموۆكە

قۇرمەتتى كارىم قاجىمۇقانۇلى!

مەن 2006-جىلى قحر-دان قازاقستانعا كەلگەم. العاشقى بەس جىلىم وسىندا وقۋمەن ءوتتى. 2011-جىلى ى.التىنسارين اتىنداعى ارقالىق مپي-دىڭ ءبىتىردىم. 2010-جىلى راسول مانارعا كۇيەۋگە شىقتىم. اقمولا وبلىسى، ەرەيمەنتاۋ اۋدانى، ولجاباي باتىر اۋىلىنا قونىستاندىق. 2011-جىلى 16-جەلتوقساندا تۇڭعىش قىزىم جىبەك، 2013-جىلى 6-قازاندا ۇلىم قاناتبەك دۇنيەگە كەلدى. كۇيەۋىم، اتا-ەنەم – ءبارى قازاقستان رەسپۋبليكاسىنىڭ ازاماتتارى.

2012-جىلى ماۋسىم ايىندا انامنىڭ قايتىس بولۋىنا بايلانىستى شىعۋ ۆيزاسىمەن قحر-عا باردىم. ۆيزانىڭ كەزەگىن كۇتىپ وندا التى اي جاتتىم. ۇرىمجىدەن ءۇش ايعا ءبىر مارتە ۆيزا اشتىرىپ، 12-جەلتوقساندا قازاقستانعا زايسان وتكەلى ارقىلى زورعا ورالدىم.

كەلە سالىپ، 14-جەلتوقسان كۇنى ەرەيمەنتاۋ اۋدانى كوشى-قون پوليتسياسىنا باردىم.  بۇرىنعى اۋدارتقان قۇجاتتارىم ۇرىمشىدەگى قر-دىڭ ەلشىلىگىندە قالعان ەدى. ەندى ونداعى قىزمەتكەر زۇلپىقار ءجۇمادىلوۆ ايتۋى بويىنشا، ۋاقىتشا تىركەۋگە تۇرۋ ءۇشىن، قۇجاتتارىمدى ەرەيمەنتاۋ اۋدانىندا قايتا اۋدارتتىم، كۋالاندىردىم. وسى بارىستا اۋا رايىنىڭ قولايسىزدىعىنا بايلانىستى ەكى كۇن جول جابىلىپ قالىپ، كوشى-قون پوليتسياسىنا بارا المادىم. وعان جالعاس تاۋەلسىزدىك مەرەكەسى كەلدى. كوشى-قون پوليتسياسى مەنىڭ ءۋاجىمدى، اۋا رايىنىڭ قولايسىزدىعىن ەسكەرمەستەن، 17 مىڭ تەڭگە ايىپپۇل تولەۋگە بۇيىردى. تولەدىم. ايىپپۇل تولەگەنىڭ ءۇشىن، ءبىر جىل كۇتەسىڭ دەدى. ءبىر جىلعا تاياۋ كۇتتىم.

2014-جىل جاڭا جىل مەرەكەسى وتە سالىپ، زۇلپىقارعا تاعى باردىم. ول ءساۋىر ايىنا دەيىن كۇتەسىڭ دەدى. ءساۋىر ايىندا بارىپ ەم، تۇراقتى تىركەۋگە قۇجات جينا دەدى. قاجەتتى قۇجاتتاردى جيىپ، اپاردىم. زۇلپىقار قابىلدامادى. سەبەبى، مەن ماناعى 17 مىڭ تەڭگە ايىپتىڭ ورىنسىز ەكەنىن ايتىپ، ەرەيمەنتاۋ اۋداندىق پروكۋراتۋراسىنا ارىز جازعام. زۇلپىقار مەنىڭ ۇستىمنەن ارىز جازدىڭ دەپ، ەرەگەستى. ءسويتىپ، قۇجاتىمدى قابىلداماعان سوڭ، ەرەيمەنتاۋ اۋداندىق سوتىنا ارىز جازدىم. سوت اكىمشىلىك جازادان بوساتىلسىن دەپ، 02.06.2014ج قاۋلى ء(ىس، №3-256/2014) شىعاردى. وسى قاۋلىنى الىپ، تاعى دا زۇلپىقارعا باردىم. ول مەنى كوكشەتاۋدان قىتايعا شىعۋ ۆيزاسىن اشتىرىپ كەلۋگە جىبەردى. 20 كۇنگە شىعۋ ۆيزاسىن اشتىرىپ كەلىپ، تۇراقتى تىركەۋگە قۇجاتتارىمدى تاعى اپاردىم. قىسقاسى، وسى 20 كۇن ىشىندە زۇلپىقاردىڭ جانىنداعى كومەكشى قىز كامشاتقا قۇجاتتارىمدى تولىق وتكىزدىم. سوسىن ۇيدە جاتىپ كۇتتىم. ءبىر اپتادان سوڭ، كامشات شاقىرىپ، مەنى كوكشەتاۋعا بارۋعا، ۆيزا اشتىرىپ كەلۋگە بۇيىردى. قانداي ۆيزا ەكەنىن ايتپادى. كوكشەتاۋعا بارىپ ەم، ولار ۆيزانىڭ ۋاقىتى ءبىتىپ كەتىپتى، قايدا جۇرگەنسىڭ دەپ ۇرىستى. مەن ەمشەكتە بالام بار ەكەنىن، قىتايدا ۆيزانىڭ كەزەگى جاقىن ارادا تيمەيتىنىن ايتتىم. كوكشەتاۋدا دينارا دەگەن قىز ماعان: جاقىندا زۇلپىقار وتچەت تاپسىرۋعا كوكشەتاۋعا كەلەدى. سول كىسىمەن بىرگە كەلەسىڭ دەدى. زۇلپىقار ماعان حابارلاسپادى. ۋاقىت وتە بەردى. قۇجاتتارىمدى ەرەيمەنتاۋ اۋداندىق كوشى-قون پوليتسياسىنا تاپسىرىپ تاستاعان سوڭ، مەن الاڭسىز جۇرە بەردىم. وسى شىلدە ايىنىڭ 31-كۇنى كامشاتقا تەلەفون شالىپ، تۇراقتى تىركەۋدىڭ جاعدايىن سۇرادىم. ول ماعان ەرتەڭنەن قالماي كوكشەتاۋعا بار، مەن ەشتەڭە بىلمەيمىن دەدى. تامىزدىڭ 1-كۇنى كوكشەتاۋعا بارىپ ەم، وبلىستىق كوشى-قون پوليتسياسى 15 كۇنگە تاعى قحر-عا شىعۋ ۆيزاسىن اشىپ بەردى. ول ۆيزانىڭ ۋاقىتى 2014-جىل، 15-تامىز بىتەدى.

دەمەك، مەن تۇراقتى تىركەۋگە تۇرۋعا قاجەتتى قۇجاتتارىمدى ۋاعىندا تاپسىردىم. ەرەيمەنتاۋ اۋداندىق كوشى-قون پوليتسياسى ونى تۇگەل قابىلداپ الدى. سوت ارقىلى ايىپتان دا بوساتىلعام. ورالمان مارتەبەسىن دە العام. ەندى نە ءۇشىن قىتايعا بارىپ، ۆيزا اشتىرىپ كەلۋىم كەرەك؟! ەگەر ۋاعىندا وتكىزبەدى دەسە، وعان ورىنسىز ايىپپۇل تولەتكەن، ءبىر كۇتتىرگەن زۇلپىقار ءجۇمادىلوۆ جاۋاپتى. كەشە ول «31» ارناعا بەرگەن سۇحباتىندا «مەن كومەكتەسكەم. كوكشەتاۋمەن سويلەسىپ، بىلاي ىستەيىك دەپ. سوتتىڭ توراعاسىمەن سويلەسىپ، "كوكە مىنانى وتكازنوي قىلىپ بەرىڭىزشى. مەن تاياق جەسەم تاياق جەيىن" دەپ. قالدىرايىق وسى جەردە دەپ. كەتۋ ۆيزاسىمەن بولمايدى دەپ، مەنىڭ ينسپەكتورىما سوگىس جاريالادى»- دەپتى ۇيالماي (http://www.31.kz/video/show/id/3391 ).

ا، سوندا زۇلپىقار كومەكتەسسە، سونشا ۋاقىتتان بەرى مەن نە ءۇشىن تۇراقتى تىركەۋگە تۇرا الماي ءجۇرمىن؟ قايتا ول مەنى «باۋىرساق» دەپ كەلەمەجدەدى. اۋدان اكىمىنىڭ ورىنباسارى بالالارىڭدى باعا الماساڭ، بالالار ۇيىنە تاپسىر دەپ قايداعى جوقتى ايتىپ ۇرىستى. مەن بالامدى باعا المادىم دەپ بارعام جوق، تۇراقتى تىركەۋگە تۇرا الماعان سوڭ بارعام. بۇل مەن ءۇشىن قورلاۋ. قۇدايعا شۇكىر، جاعدايىمىز جاقسى. تابىسىمىز بار...

سوندىقتان، قۇرمەتتى كارىم قاجىمۇقانۇلى، مەن ەندىگى جەردە ولسەم دە قىتايعا قايتپايمىن! ەمشەكتە بالام بار. ءسىزدىڭ ماعان كومەكتەسىپ، تۇراقتى تىركەۋگە تۇرعىزۋىڭىزدى وتىنەم. قۇزىرلى ورگاندارعا تاپسىرما بەرىپ، زۇلپىقار ءجۇمادىلوۆتى جازاعا تارتۋىڭىزدى، مەنەن كەشىرىم سۇراتۋىڭىزدى سۇرايمىن!

ەگەر، قىتايعا قايتۋعا ماجبۇرلەپ، تولقۇجاتىما قارا تاڭبا باسامىز دەسە، مەن باق وكىلدەرىن جيىپ، تولقۇجاتىمدى پوچتا ارقىلى سىزگە جىبەرەم. سىزدەن بوسقىن مارتەبەسىن نەمەسە بەز گراجداندىق سۇرايمىن! ولسەم، سۇيەگىم كەتۋى مۇمكىن قىتايعا!!!

قۇرمەتپەن

قادىربەك گۇلجاينا

06.08.2014

مەكەن-جايىم:

اقمولا وبلىسى، ەرەيمەنتاۋ اۋدانى،

ولجاباي باتىر اۋىلى، بايتۋاروۆ كوشەسى 14/2.

Abai.kz