وتكەن 2013 جىلدىڭ ءساۋىر ايىنىڭ باسىندا  پاۆلودار قالاسىنىڭ گەربى مەن تۋىنىڭ ۇزدىك سىزباسىنا، ءانۇرانىنىڭ ءسوزى مەن سازىنا كونكۋرس جاريالاندى.  

سەبەبى بەلگىلى: قالانىڭ تۋى مەن ءانۇرانى جوق،  گەربى ۋاقىت تالابىنا ساي ەمەس.

تارقاتىپ ايتساق، لوگوتيپتىڭ ءتۇسى  شىمقاي قىزىل، كەڭەس تۋىنىڭ تۇسىنە سايكەس بەلگىلەنگەن.  پاۆلودار تراكتور زاۋىتىنىڭ نىشانى ىسپەتتەس تەگەرشىك (شەستەرنيا) سۋرەتى – كەيىنگى ونجىلدىقتاردا ءمان-ماعىناسىنان ايرىلىپ،  انشەيىن كەدىرلى-بۇدىرلى دوڭگەلەك سىزىققا اينالعان. ويتكەنى اتالعان وندىرىستىك بىرلەستىك وتكەن عاسىردىڭ 90-شى جىلدارى بانكروتقا ۇشىراپ، جۇمىسىن توقتاتقان بولاتىن.

سونداي-اق، لوگوتيپتەگى «ەرتىس وزەنىنىڭ نىشانى» دەلىنەتىن ۇستىنگى جاعى يرەكتەلگەن كوك جولاق جانە شاعالا سۇلباسى پاۆلوداردىڭ  وزىندىك ەرەكشەلىگىن كورسەتە المايدى. بۇلار  –  جالپى وزەن اتاۋلىنى بەينەلەيتىن بەلگىلەر، ەرتىس بويىندا ورنالاسقان وسكەمەن مەن سەمەيدىڭ، سونىمەن قاتار سىر بويىنداعى يا جايىق جاعاسىنداعى قالالاردىڭ دا تاڭباسىندا  پايدالانۋعا جاراي بەرەدى، ءتىپتى رەسەيدىڭ ومبى قالاسىنىڭ گەربىنە ەنگىزىلسە، ۇيلەسىپ كەتەدى.  ونىڭ ۇستىنە شاعالا – قىران بۇركىت، اققۋ، قاز ءتارىزدى قازاق حالقىنىڭ تانىم-تۇسىنىگى بويىنشا قۇرمەتتەلىنەتىن، قازاق ادەبيەتى مەن ونەرىندە اسپەتتەلىنەتىن قۇس ەمەس.

ءبىر سوزبەن ايتقاندا، قالا گەربىندە حالىقتىڭ بولمىس-ءبىتىمى مەن رۋحاني، مادەني قۇندىلىقتارى نازاردان تىس قالعان. سونداي-اق، قالانىڭ نەگىزى تۇركى قاعاناتى كەزەڭىنەن بەرى «كەرەكۋ» اتالعان جەرگە سالىنعانى، ياعني ءوڭىر تاريحى ەسكەرىلمەگەن.

ايتا كەتەتىن جايت، ايماقتى باقىتجان ساعىنتاەۆ باسقارعان كەزدە، 2011 جىلى وبلىس ءماسليحات دەپۋتاتتارى بەكىتكەن وبلىس تاڭباسىندا ايماقتىڭ وزىندىك كەسكىن-كەلبەتى ءساتتى شەشىمىن تاپقان.

قالا گەربىنە كونكۋرس جاريالانعاندا كەرەكۋدىڭ زيالى قاۋىمى  جاڭا لوگوتيپتە الگىندەي كەمشىلىكتەر ورىن المايدى، مەملەكەتتىك رامىزدەردىڭ ءتۇر-ءتۇسى، بەلگى-نىشاندارى  كورىنىس تاۋىپ، جاس ۇرپاقتىڭ ساناسىنا وتانشىلدىق، تۋعان جەردى ءسۇيۋ سەزىمدەرىن دارىتادى دەپ پايىمدادى. الايدا سودان بەرى ءبىر جىلدان استام ۋاقىت وتسە دە، كونكۋرس قورىتىندىسى  شىعارىلعان جوق، سەبەبى بەلگىسىز.

ءبىز ەگەمەندىك كەزەڭىندە تالاي ۇلى  وزگەرىستەردى باستان وتكەردىك: قوعامدىق قۇرىلىس جاڭارتىلدى، قازاقستان رەسپۋبليكاسىنىڭ اتاۋى مەن اتا زاڭى قابىلداندى، مەملەكەتتىك گەرب، تۋ، گيمن وزگەرتىلدى.  سولاي بولا تۇرا،  1969 جىلى قازاقستان كومپارتياسى پاۆلودار قالالىق كوميتەتى ماقۇلداپ، ەڭبەكشىلەر دەپۋتاتتارى  قالالىق  كەڭەسى اتقارۋ كوميتەتىنىڭ شەشىمىمەن بەكىتىلگەن قالا تاڭباسى ءباز-باياعى قالپىندا قالدى...

«ەگەمەن ەلدىڭ ەجەلگى قونىستارىنىڭ ءبىرىنىڭ ورنىنا سالىنعان كەرەكۋدە كەڭەستىك زامانداعى كوممۋنيستىك قوعامنىڭ رامىزدەرى مەن يدەولوگياسىنا نەگىزدەلگەن قالا گەربى قاشانعا دەيىن قۇرمەتتەلە بەرەدى؟»

جۇرشىلىقتىڭ كوڭىلىن تولعاندىرعان وسى ساۋال پاۆلودار قالاسى اكىمدىگى باسشىلارى مەن ء ماسليحات دەپۋتاتتارىن ويلاندىرىپ، دۇرىس شەشىم شىعارىلار دەگەن ۇمىتتەمىز.

***

PS: پاتشازادا پاۆەل رومانوۆتىڭ قۇرمەتىنە قويىلعان پاۆلودار قالاسىنىڭ  اتاۋى، رەسەي يمپەرياسىنىڭ قولباسشىلارى: كۋتۋزوۆ، سۋۆوروۆ، كازاكتار اتامانى ەرماك، بولشەۆيكتەر پارتياسىنىڭ  قايراتكەرلەرى: لەنين،  كرۋپسكايا، ليۋكسەنبۋرگ، لۋناچارسكي،  دەريباس سەكىلدىلەردىڭ ەسىمدەرىن ۇلىقتايتىن كوشە اتاۋلارىن وزگەرتۋ ماسەلەسى ەلىمىز ەگەمەندىككە قول جەتكىزگەن كەزدەن بەرى قازاقستاندىق بۇقارالىق اقپارات قۇرالدارى ارقىلى سان مارتە كوتەرىلدى. ايتسە دە  دۇرىس شەشىمىن تاپقان جوق، سوندىقتان وزەكتىلىگى جويىلماعان بۇل ماسەلە ءالى دە كوتەرىلە بەرەدى.

ارمان قاني،

اقىن، جۋرناليست،

قازاقستاننىڭ ەڭبەك سىڭىرگەن قايراتكەرى.

پاۆلودار قالاسى.

Abai.kz