تۇركياداعى كىشى قۇرىلتاي قالاي ەكى قۇرىلتايعا اينالدى؟
تالعات ماماشەۆ مىرزا باسشىلىق ەتكەلى دۇنيەجۇزى قازاقتارى قاۋىمداستىعىنىڭ باسىنان داۋ ارىلماي كەلەدى. ماماشەۆ مىرزانىڭ ۋاجىنە سۇيەنسەك، قوعامدىق ۇيىم بولعاندىقتان قاۋىمداستىقتىڭ كوش ماسەلەسىمەن اينالىسۋعا قۇزىرەتى جوق. نەگىزگى جۇمىستارى – شەتەلدەگى قازاقتارمەن بايلانىس. دەگەنمەن، سوڭعى جىلدارى شەتەلدەگى قازاقتار دا بۇل مەكەمەنىڭ جۇمىسىنا سىن ايتىپ باعۋدا. (قاراڭىز: http://old.abai.kz/content/parizhde-otken-kyryltai-aikyn-gazetine-ashyk-khat, http://old.abai.kz/node/40115). مىنە، تۇركيادا تۇراتىن تانىمال عالىم ابدۋاقاپ قارا مىرزا رەداكتسيامىزعا: «تۇركياداعى كىشى قۇرىلتاي قالاي ەكى قۇرىلتايعا اينالدى؟» دەگەن ماقالاسىن جولداپ وتىر. ءبىز ءباسپاسوزدىڭ قالىپتاسقان قاعيداسىنا ساي اتالعان ماقالامەن قوسا دۇنيەجۇزى قازاقتارى قاۋىمداستىنىڭ ۇيىمداستىرۋ ءبولىمىنىڭ جەتەكشىسى بوتاكوز ۋاتقاننىڭ «تۇركىستان» گازەتىنە بەرگەن سۇحباتىن قوسا جاريالاپ وتىرمىز.
ابدۋاقاپ قارا: تۇركياداعى كىشى قۇرىلتاي قالاي ەكى قۇرىلتايعا اينالدى؟
ىستامبۇلداعى قازاق مادەني ورتالىعى قازاق تۇركىلەرى ۋاكفى (تۇركيا قازاقتارى قورى) بيىل جىل باسىندا 29-31 شىلدە كۇندەرى كىشى قۇرىلتاي وتكىزۋدى جوسپارلاعان بولاتىن. الماتىداعى دۇنيەجۇزى قازاقتارى قاۋىمداستىعى دا قۇرىلتايعا 16 ادامدىق دەلەگاتسيامەن قاتىساتىنىن مالىمدەگەن ەدى. بىراق قۇرىلتاي مەزگىلى جاقىنداعان ۋاقىتتا قور مەن قاۋىمداستىق اراسىندا كەلىسپەۋشىلىك پايدا بولدى. سول كەلىسپەۋشىلىك سالدارىنان قاۋىمداستىق باسقارماسى تۇركيا قازاقتارى قورى ۇيىمداستىرعان قۇرىلتايعا قاتىسپاۋ جانە ونىڭ ورنىنا ءوزىنىڭ ىستامبۇلدا جەكە قۇرىلتايىن وتكىزۋ تۋرالى شەشىم قابىلداعان.
سونىمەن تۇركيادا 29-31 شىلدە كۇندەرى ءبىر مەزگىلدە ەكى قۇرىلتاي وتەتىن بولىپ وتىر.ونىڭ ءبىرىنشىسى، تۇركيا قازاقتارى قورىنىڭ كىشى قازاق قۇرىلتايى، ەكىنشىسى، دۇنيەجۇزى قازاقتارى قاۋىمداستىعىنىڭ كىشى قازاق قۇرىلتايى.
وسىلايشا بىرلىك-بەرەكەگە، ىنتىماقتاستىققا دانەكەر بولاتىن كىشى قۇرىلتايدىڭ ورازا ايت كۇندەرىنە ءدوپ كەلەتىن 29-31 شىلدە كۇندەرىندە جىكتەلۋشىلىككە سەبەپ بولاتىنى ايتىلۋدا. وعان تۇركيا قازاقتارى قورىنىڭ قاۋىمداستىقتان 10 مىڭ دوللار كولەمىندەقارجىلاي دەمەۋشىلىك سۇراۋى سەبەپ بولىپ وتىر.
قور توراعاسى پازىل توپلى “قاۋىمداستىق ەۋروپادا وتكەن كىشى قۇرىلتايلارعا 7000-8000 ەۋرودان قارجىلاي كومەك بەرگەنى ءۇشىن ءبىز دە سونداي كومەك سۇراعان ەدىك. سوندا بىزگە “2500 دوللاردان ارتىق كومەك بەرمەيمىز، وسىعان قاناعات ەتىڭدەر، ەتپەسەڭدەر باسقا قوعاممەن جۇمىس جاسايمىز” دەپ جاۋاپ قايتارىلدى” دەيدى.
ءسويتىپ قاۋىمداستىق ىستامبۇلدا ەكىنشى ءبىر قۇرىلتاي وتكىزەتىن ءبىر قوعام ىزدەي باستاعان، تابا الماعاننان كەيىن “كازاك تۇركلەرى ەگىتىم ۋە اراشتىرما دەرنەگى” (تۇركيا قازاقتارى ءبىلىم جانە زەرتتەۋ قوعامى) دەگەن اتپەن جاڭا ءبىر قوعام قۇرعىزعان. سونىمەن قاۋىمداستىق ىستامبۇلدا ءوزىنىڭ جەكە قۇرىلتايىن وتكىزۋ ءۇشىن زاڭدى سەرىكتەستىگىن پايدا ەتكەن.
قاۋىمداستىق پەن قور اراسىنداعى دەمەۋشىلىك تۋرالى كەلىسپەۋشىلىك ەلباسى نۇرسۇلتان نازارباەۆتىڭ 2011 جىلعى قازاق قۇرىلتايىندا «سامۇرىق-قازىنا» ۇلتتىق ءال-اۋقات قورىنىڭ كىشى قۇرىلتايلارعا قارجىلاي كومەك بەرۋى جونىندەگى تاپسىرماسىمەن تىكەلەي بايلانىستى. ەستەرىڭىزگە سالا كەتسەك، ەلباسى 2011 جىلى، 25-26 مامىر كۇنى استانادا وتكەن قۇرىلتايدا بىلاي دەگەن ەدى:
«ءبىز شەتەلدەردەگى كىشى قۇرىلتايدىڭ وتكىزىلۋىن قۇپتايمىز. وسىعان بايلانىستى بۇل قۇرىلتايلارعا «سامۇرىق-قازىنا» ۇلتتىق ءال-اۋقات قورى قولداۋ كورسەتەتىن بولادى. قازاقستان دۇنيەدەگى ءار قازاقتىڭ قاستەرلى قۇبىلاسى. قازاقستان –الەمدەگى بارشا قازاقتىڭ قۇتتى قارا شاڭىراعى. قازاق بالاسى دۇنيەنىڭ قاي تۇكپىرىندە جۇرسە دە، قازاق حالقىنىڭ ءبىر بولشەگى ەكەنىن ۇمىتپاۋى كەرەك»
ەلباسىنىڭ وسى سوزدەرى بۇعان دەيىن كىشى قۇرىلتايلاردى ءوز مۇمكىنشىلىكتەرىمەن قارجىلاندىرۋعا كۇش جۇمساپ كەلگەن شەتەل قازاقتارىنىڭ بارلىق دەلەگاتتارى تاراپىنان قولداندى. ويتكەنى، كىشى قۇرىلتايلاردا قىسقا ءجىپ كۇرمەۋگە كەلمەيدى دەگەندەي كەيدە قارجى تاپشىعىلىنان كەمشىلىكتەربولىپ قالاتىن. ماسەلەن ەۋروپادا مىڭنان اسا ادام قاتىساتىن قۇرىلتايلاردى ۇيىمداستىرۋ بارىسىندا ۇلكەن كونفەرەنتسيا نەمەسە كونتسەرتتىك زالدارعا قارجىلاي كۇش جەتپەگەندىكتەن، سپورتتىق زالداردا باس قوسۋعا تۋرا كەلەتىن. ونداي زالداردا ايتىلعان ءسوزدىڭ دە، ءاننىڭ دە ءسانى كەلمەيتىنى بەلگىلى. مىنە كىشى قۇرىلتايلارداعى مۇنداي قيىندىقتاردى ەسكەرگەن ەلباسى الەمنىڭ بارشا بىرەگەي تاۋەلسىز مەملەكەتى قازاقستاننىڭ ارقاسىندا كىشى قۇرىلتايلارىن قينالماي وتكىزۋىنە، ءجيى باس قوسىپ قازاقتىق بولمىستارىن ساقتاپ قالۋىنا جاناشىرلىق تانىتىپ ۇلكەن قولقابىس ەتكەن ەدى.
استانا قۇرىلتايىنان كەيىن شەتەل قازاقتارى دۇنيەجۇزى قازاقتارى قاۋىمداستىعىنان كىشى قۇرىلتايلاردىڭ دايىندىعىنا زور ۇلەس قوساتىنىن ءۇمىت ەتكەن ەدى. اتاپ ايتقاندا قاۋىمداستىق كىشى قۇرىلتايلاردى ۇيىمداستىرۋ ۇدەرىسىنە قاتىسىپ،وعان قانشا شىعىن جۇمسالاتىنىن بەلگىلەپ بۇكىل شىعىنداردى قارجىلاندىرۋى ءۇشىن «سامۇرىق-قازىنا» ۇلتتىق ءال-اۋقات قورىنان دەمەۋشىلىك الىپ بەرەدى دەپكۇتىلدى. بىراق ءىس-جۇزىندە ەلباسىنىڭ بۇل جونىندەگى تاپسىرماسى تولىق ورىندالماي وتىر. قاۋىمداستىق باسقارماسى بۇل تاپسىرمانى تەك ءوزىنىڭ قىزمەتكەرلەرى مەن كونتسەرت قوياتىن جانە باسقا ۇلتتىق ونەر كورسەتەتىن قوناقتارىنىڭ كىشى قۇرىلتاي وتەتىن ەلگە جاسايتىن ساپارىنىڭ شىعىندارىن قارجىلاندىرۋ ءۇشىن قانا پايدالاندى. دەگەنمەن قاۋىمداستىقتىڭ بارعان ەلدەرىندەگى كىشى قۇرىلتايلاردى ۇيىمداستىرعان قوعامدارعا شىعىندارىنىڭ ءبىر بولەگىنە قولداۋ جاساپ،اقشالاي سىيلىق بەرىپ كەلگەنى دەشىندىق.
قاۋىمداستىقتىڭ كىشى قۇرىلتايلاردىڭ ۇيىمداستىرىلۋىنا وسىلايشا جارىم-جارتىلاي قول ۇشىن بەرۋى – شەتەلدەگى قازاق دياسپوراسىقوعامدارىنىڭ ءۇمىتىن اقتامادى. ماسەلەن، جىل سايىن كىشى قۇرىلتاي وتكىزۋدى داستۇرگە اينالدىرعان ەۋروپا قازاقتارى فەدەراتسياسى دا بۇل تۋرالى مازاسىزدىعىن وتكەن جىلى قازاق باسپاسوزىنە ەۋروپاداعى 10 قازاق قوعامى اتىنان جىبەرگەن اشىق حاتىندا تىلگە تيەك ەتكەن ەدى. سول حاتتا قاۋىمداستىق دەلەگاتسياسىنىن قۇرىلتايلارعا ۇيىمداستىرۋشى نەمەسە دەمەۋشى رەتىندە ەمەس، قوناق رەتىندە قانا قاتىسىپ قايتىپ جاتقانى باسا كورسەتىلدى. (http://i-news.kz/news/2013/08/02/7124987-aikyn_gazetine_ashyk_hat.html)
ەۋروپا قازاق قوعامدارى فەدەراتسياسى سونىمەن قاتار «سامۇرىق-قازىنا» ۇلتتىق ءال-اۋقات قورىنان ەلباسى تاپسىرعانداي بۇكىل شىعىندارىنا دەمەۋشىلىك الا الماعاندىقتارىن ايگىلەۋ ءۇشىن 2012 جىلدان بەرى قاراي كىشى قۇرىلتايلارعا قاۋىمداستىقتاڭ العان قارجىلاي كومەكتىڭ سوماسىن ناقتى كورسەتۋدى قاجەت دەپ تاپقان. فەدەراتسيانىڭ رەسمي سايتىندا اتالىپ وتىلۋىنشە، قاۋىمداستىق بيىلعى بەرلين كىشى قۇرىلتايىنا 8600 ەۋرو، 2013 پاريج قۇرىلتايىنا 7000 ەۋرو، 2012 دانيا قۇرىلتايىنا 7500 ەۋرو كومەك كورسەتكەن.
قاۋىمداستىق تۇركيادا وتەتىن كىشى قۇرىلتايعا 2500 دوللار، ياعني 1750 ەۋرو قارجىلاي كومەك كورسەتە الاتىنىن ايتقان. قور باسشىلىعى بۇل سومانىن از ەكەنىن، تىم بولماسا ەۋروپا ەلدەرىندەگى قۇرىلتايلارعا جاسالعان كولەمدە كومەك بەرىلۋىن، يا بولماسا «سامۇرىق-قازىنا» ۇلتتىق ءال-اۋقات قورىنىن ءتيىستى قىزمەتكەرلەردىڭ بايلانىس مالىمەتتەرىن بەرۋىن، ءسويتىپ «سامۇرىق-قازىنا» ۇلتتىق ءال-اۋقات قورىنان تىكەلەي دەمەۋشىلىك الۋلارىنا ۇلىقسات ەتىلۋىن سۇراعان.
قاۋىمداستىق باسقارماسى بۇعان كەلىسپەگەن جانە تۇركيا قازاقتارى قورىمەن قۇرىلتاي وتكىزۋدەن باس تارتقان. ونىڭ ورنىنا 4 شىلدە كۇنى جاڭا قۇرىلعان قوعامعا رەسمي حات جىبەرىپ 29-31 شىلدە كۇندەرى بىرىگىپ قۇرىلتاي وتكىزەتىنىن ايتقان. بۇل جاعدايعا تاڭ قالعان تۇركيا قازاقتارى قورى باسشلىعى دەمالىستا جۇرگەن دۇنيەجۇزى قازاقتارى قاۋىمداستىعى تورالقا توراعاسىنىڭ ءى ورىنباسارىتالعات ماماشەۆكە تەلەفون سوعىپ، قاۋىمداستىق حاتشىسى بوتاكوز ۋاتقانعا حات جىبەرىپ 10 مىڭ دوللار بەرمەۋ ءۇشىن جەكە قۇرىلتاي وتكىزۋ شەشىمىنىڭ كىشى قۇرىلتايلار تاريحىندا بۇرىن- سوڭدى بولماعان شۋعا ۇلاساتىنىن، سول سەبەپتى بۇل قادامنان باس تارتۋلارىن وتىنگەن. ايرىقشا قازاقستان ۇكىمەتى كوشى قوندى كۇشەيتىپ، ورالماندارعا ازاماتتىق الۋدى ءبىر جىلعا قىسقارتىپ دياسپورامەن بايلانىستاردى كۇشەيتۋدى قولعا الىپ جاتقان كەزدە قاۋىمداستىق پەن قۇرىلتايلاردىڭ بەدەلىن تۇسىرەتىن ءىس-ارەكەتتەرگە جول بەرمەۋدىڭ ماڭىزدىلىعىن دا اتاپ وتكەن.
ايتەگەندە تۇركيادا ەكى قۇرىلتايدىڭ ءبىر مەزگىلدە ءوتۋ سەبەبىن قازاقستان حالقىنا، تۇركيا مەن وزگە قازاق دياسپورالارىنا تۇسىندىرۋگە تۋرا كەلەتىنىن، مۇنان بولسا قاۋىمداستىقتىڭ بەدەلىنە نۇقسان كەلەتىنى ەسكەرتىلگەن. حاتتا سونىمەن قاتار، ەگەر «سامۇرىق-قازىنا» ۇلتتىق ءال-اۋقات قورى قاۋىمداستىقتىڭ تۇركياداعى كىشى قۇرىلتاي ءۇشىن سۇراعان اقشانى قىسقارتقان بولسا نەمەسە تۇركيا قازاقتارى قورىنىڭ شىعىندارى ءۇشىن دە دەمەۋشىلىك سۇراۋ ەسكەرىلمەگەن بولسا، تۇركيا قازاقتارى قورى قاۋىمداستىقتان ەشقانداي قارجىلاي كومەك الماستان كىشى قۇرىلتايدى وتكىزەتىنى دە ايتىلعان.
تۇركيا قازاقتارى قورى الىس شەتەل قازاقتارى ىشىندە ءبىرىنشى بولىپ كىشى قۇرىلتاي وتكىزگەن ەدى. قور دۇنيەجۇزى قازاقتارى قاۋىمداستىعىمەن 1997 ىستامبۇلدا وتكىزگەن سول قۇرىلتايدىڭ شىعىندارى ءۇشىن دەمەۋشىلەردى تۇركيادان تاپقان ەدى. ويتكەنى ول كەزدە قاۋىمداستىق توراعاسى بولعان قالداربەك نايمانباەۆتىڭ قۇرىلتايلاردىڭ بۇكىل شىعىندارىن كوتەرەتىن مۇمكىنشىلىگى جوق ەدى. ول تەك ءوزىنىڭ دەلەگاتسياسى ءۇشىن قازاقستاندىق ىسكەر ازاماتتاردىڭ قارجىلاي كومەك قامتاماسىز ەتەتىن.
1986 جىلى ىرگەسى قالانعان تۇركيا قازاقتارى قورى اتامەكەنمەن بايلانىستى نىعايتۋمەن قاتار جاس وسپىرىمدەردىڭ انا ءتىلىن، سالت ءداستۇرىن ساقتاپ قالۋى ءۇشىن دە قىزمەت اتقارۋدا. ماسەلەن بيىل اقپان ايىندا جاستار ءۇشىن دومبىرا جانە ۇلتتىق بي كۋرستارىن ۇيىمداستىردى. سول كۋرستاردى ءبىتىرىپ شىققان 60 جاسقا سەرتيفيكاتتارى ماۋسىم ايىندا تاپسىرىلدى. قور سونىمەن بىرگە قازاقتىڭ ۇلتتىق مەيرامدارىن دا اتاپ وتۋگە ەرەكشە ءمان بەرۋدە. ماسەلەن ناۋرىزبەن قاتار قازاقستان تاۋەلسىزدىك كۇنى، استانا كۇنى جانە پرەزيدەنت كۇنى سىندى مەرەكەلەر اتالىپ،تۇركيا قازاقتارىنىڭ اتامەكەنمەن بايلانىستارىنىڭ نىعايۋىنا كۇش جۇمساۋدا.
قور بيىلدان باستاپ تۇركيا قازاقتارىنىڭ كىشى قۇرىلتايىن جىل سايىن وتكىزۋ تۋرالى شەشىم قابىلداعان. ول ءۇشىن تامىز ايىنىڭ باس كەزى بەلگىلەنگەن. بىراق بيىل ورازا ايتقا ءدوپ كەلگەندىكتەن شىلدە ايىنىڭ سوڭعى كۇندەرى وتكىزۋ ىڭعايلى بولعان. ويتكەنى بۇل مەزگىل ەۋروپاداعى قازاقتاردىڭ كوپشىلىگىنىڭ دەمالىستارىن تۇركياداعى تۋىستارى اراسىندا وتكىزەتىن كەز. ءسويتىپ جىل سايىن وسى قۇرىلتايلاردا كوپتەگەن قازاقتىڭ باسى قوسىلماق. سونىمەن قاتار كىشى قۇرىلتايدا جاستار ءۇشىن فۋتبول ءتۋرنيرى دە ۇيىمداستىرىلۋدا. فۋتبول تۇركيا جانە ەۋروپا قازاق جاستارىنىڭ كوپشىلىگىنىڭ ەڭ جاقسى كورەتىن سپورتى. وسى سپورت ارقىلى جاستاردىڭ ءوزارا تانىسىپ بىتە قايناسۋلارى كوزدەلۋدە. سونىمەن بىرگە تۋرنيردە جەڭىسكە جەتەتىن كوماندالارعا بەرىلەتىن دوداعا دا جاستاردىڭ ۇلتتىق جانە تاريحي ساناسىن كۇشەيتۋ بارىسىندا جىل سايىن كەنەسارى قاسىمۇلى، ماحامبەت وتەمىسۇلى، وسپان باتىر، ءاليحان بوكەيحان، مۇستافا شوقاي سىندى قازاقتىڭ ءبىر باتىرىنىڭ نەمەسە مەملەكەت قايراتكەرىنىڭ اتىن بەرۋ جونىندە شەشىم قابىلدانعان. ماسەلەن بيىلعى دودانىڭ اتى قازاقستاندا 300 جىلدىعى تويلانعان “ەر جانىبەك باتىر:دوستىق جانە باۋىرلاستىق دوداسى” دەپ اتاۋ ۇيعارىلعان. بيىلعى جاستار فۋتبول تۋرنيرىنە تۇركيانىڭ ىستامبۇل، كونيا، نيگدە، ساليحلي قالالارىنان 8 فۋتبول كومانداسى قاتىسۋ ءۇشىن تىركەلىپ وتىر. تۇركيا قازاقتارىنىڭ كىشى قۇرىلتايىندا سونىمەن قاتار قازاق قوعامدارىنىڭ وكىلدەرى مەن عالىمدارىنىڭ قاتىسۋىمەن “60 جىلدىعىندا تۇركيا قازاقتارىنىڭ كەشەگىسى، بۇگىنگىسى، ەرتەڭگىسى جانە اتامەكەنمەن بايلانىستارى” تۋرالى قۇرىلتاي جينالىسى دا وتەتىن بولادى.
تۇركيا قازاقتارى قور باسشىلىعى قاۋىمداستىق وكىلدەرى قاتىسسا دا، قاتىسپاسادا تۇركيا قازاقتارى كىشى قۇرىلتايىن وتكىزەتىن بولىپ وتىر. قاۋىمداستىق حاتشىسى بوتاكوز ۋاتقان بولسا تۇركيا قازاقتارى ۇيىمداستىرعان كىشى قۇرىلتايعا قاتىسپايتىندىقتارىن، جاڭا قۇرىلعان تۇركيا قازاقتارى ءبىلىم جانە زەرتتەۋ قوعامىمەن ءوز الدارىنا ەكىنشى ءبىر قۇرىلتاي وتكىزەتىندىكتەرىن ايتۋدا. ول شىلدە ايىنىڭ 14-ءى كۇنى ءۇش كۇنگە ىستامبۇلعا ساپارلاپ كەلىپ جانا قوعام باسشىلىعىمەن تانىسۋ جينالىسىن وتكىزىپ قۇرىلتاي دايىندىقتارى تۋرالى مالىمەت العان.
ءسويتىپ 29-31 شىلدە كۇندەرى ىستامبۇلدا ءبىر مەزگىلدە ەكى قۇرىلتاي وتكىزىلەتىن بولىپ وتىر.
– شەتەلدەگى قازاق قوعامدار مەن قورلار مەن تەڭ دارەجەدە جۇمىس ىستەۋ – قاۋىمداستىق جارعىسىندا كورسەتىلگەن. سوندىقتان ءبىز سىرتتاعى اعايىنمەن بىردەي جۇمىس جاساپ كەلەمىز، بۇدان بىلاي دا سولاي جالعاسادى.
قازاق-تۇرىك قورىنىڭ باسشىسى فازىل توپلى باستاعان 4 كىسىلىك دەلەگاتسيا ءساۋىر ايىندا قاۋىمداستىققا كەلىپ، قۇرىلتاي باعدارلاماسىن بىرلەسكەن ءتارتىپ بويىنشا بەكىتكەن ەدىك.سول كەزدە دۇنيەجۇزى قازاقتارى قاۋىمداستىعى تورالقا توراعاسىنىڭ ءى ورىنباسارى تالعات اسىلۇلى ولاردان قانداي كومەك كەرەكتىگىن سۇراعان. ولار: «تامىزدا پارتيالاردىڭ سايلاۋى وتەدى، ولار بىزگە كومەكتەسەدى، بىزگە تەك سىي-سياپات، 6 شاپان، ونشاقتى دومبىرا، كىتاپ-جۋرنالدار مەن ءان-كۇي ديسكىلەرىن اكەلسەڭىزدەر جەتكىلىكتى» دەگەندى. وكىنىشكە قاراي، كوپ كەشىكپەي اتالعان قوردان 10 مىڭ اقش دوللارىن سۇراعان حات كەلىپ ءتۇستى. قاۋىمداستىق ونداي كولەمدە قارجىلاي كومەك كورسەتە المايتىندىعىن ءبىلدىردى. قور ءوز تاراپىنان اتالمىش قارجى بەرىلمەسە، قۇرىلتايدى قاۋىمداستىقپەن بىرگە وتكىزبەيمىز، توقتاتامىز دەپ مالىمدەدى.
تۇركيادا 20-عا جۋىق قازاق قوعامى مەن بىرقانشا قور بار. ف. توپلىعا ءبىز باسقا دا قازاق قورلارىمەن بىرلەسىپ قۇرىلتاي وتكىزەتىنىمىزدى جەتكىزدىك. مەن ىستامبۇلعا بارىپ، الماتىعا بۇگىن كەلدىم. ونداعى قوعام باسشىلارىمەن كەزدەسۋ وتكىزدىم. بىراق وعان قازاق-تۇرىك قورىنان وكىلدەر قاتىسپادى. قاتىسامىز دەسە، ەسىگىمىز ارقاشان اشىق، ەشكىمنىڭ جولىنا توسقاۋىل قويماق نيەتىمىزدە جوق.
بۇگىنگى كۇنى تۇركياداعى قر ەلشىلىگى مەن قازاق-تۇرىك ءبىلىم جانە زەرتتەۋ قوعامىمەن بىرلەسىپ اتالمىش قۇرىلتايدى شىلدەنىڭ 31-ىندە ىستامبۇلدا وتكىزەمىز دەپ شەشتىك. بۇعان اتالمىش قوردان باسقا قوعامداردىڭ بارلىعى ىقىلاسپەن قاتىستى. بۇل جىلدىق جوسپارىمىز بويىنشا جۇزەگە اسىپ جاتىر. قۇرىلتايعا قازاقستاننان باراتىن دەلەگاتسيا قۇرامى بەكىتىلىپ قويعان، سونداي-اق ول قوعامدارمەن جۇمىس جۇرگىزىپ جاتقانىمىزعا ەكى-ءۇش ايدىڭ ءجۇزى بولدى.
ەگەر قازاق-تۇرىك قورى وزدەرى دەربەس قۇرىلتاي وتكىزەمىز دەسە، ول ءوز ەرىكتەرىندەگى شارۋا. دەموكراتيالىق، جاريالىلىق زامانىندا ولارعا تىيىم سالۋ – ءبىزدىڭ ەركىمىزدەگى شارۋا ەمەس. ءبىزدىڭ ماقسات – تۇركياداعى قازاقتاردىڭ باسىن قوسۋ. ء بىر شاڭىراقتىڭ استىندا ءبىر فەدەراتسيا قۇرۋ دەگەندى بۇرىننان ايتىپ كەلەمىز. ەۋروپا مەن رەسەيدە ونداي قازاق فەدەراتسياسى جاقسى جۇمىس ىستەپ كەلەدى.
Abai.kz
