سۋرەتتە: «Global Ecological Group Almaty» جشس ازىق-تۇلىك لوگيستيكالىق ورتالىعىنىڭ باس عيماراتى جانە لوگيستيكالىق ورتالىقتىڭ ماكەتى

ۇكىمەت باسشىسى

كارىم ماسىموۆتىڭ

نازارىنا!

2013 جىلدىڭ جەلتوقسان ايىنىڭ سوڭىندا پرەزيدەنت ن.نازارباەۆ يندۋسترياليزاتسيا كۇنى اياسىندا 10 وندىرىستىك نىساندى تەلەكوپىر ارقىلى ىسكە قوسقان ەدى. سونىڭ ءبىرى – ءىرى وندىرىستىك كومپلەكس – «Global Ecological Group Almaty» جشس ازىق-تۇلىك لوگيستيكالىق ورتالىعى.

وسىلايشا، پرەزيدەنتتىڭ ءوزى تۇساۋىن كەسكەن كاسىپورىننىڭ جۇمىسىنا مەملەكەت ءوزى كەدەرگى جاساپ وتىر. قالاي دەيسىز عوي، ەندەشە، ماسەلەنىڭ ءمانىن باسىن باستاپ تۇسىندىرەيىك.

الماتىنىڭ شەتىندە ورنالاسقان ازىق-تۇلىك لوگيستيكالىق ورتالىقتارى بار. ءبىر سوزبەن ايتقاندا، وندىرىستىك اۋدان. قالا قوزعالىسىنا كەدەرگى بولماس ءۇشىن ازىق-تۇلىك لوگيستيكالىق ورتالىقتارىن ارنايى قالا شەتىنە سالۋدى ۇيعارعان ۇكىمەت ءوندىرىس قۇرلىسىن باستاپ كەپ جىبەرەدى. بۇل – 2007 جىل ەدى. ەكونوميكالىق ءوسىم ورلەپ، بيلىك ءىرى جوبالاردى قولعا الا باستاعان تۇس. ۇكىمەتتىڭ مۇنداي جوبالارىنا قىزىعۋشىلىق تانىتقان جەكە كومپانيالار دا قۇرىلىس جۇمىسىنا بەلسەنە كىرىسەدى. قۇرىلىس جۇمىستارى ەندى قارقىن الىپ كەلە جاتقان دا الەمدىك قارجى داعدارىسى كەلىپ، ءوندىرىس سالۋ بىلاي تۇرىپتى، اركىم ءوز باسىمەن قايعى بوپ كەتەدى. ءسويتىپ، 2010 جىلى ەسىن جيعان ۇكىمەت باياعى قۇرىلىسى توقتاپ قالعان وندىرىستەردى قايتا جانداندىرىپ، ىسكە قوسۋ ءۇشىن جەكە مەنشىك كومپانيالارعا كومەكتەسىپ، ەسەسىنە 49 پايىز اكتسياعا يەلىك ەتەدى. ءسويتىپ، «Global Ecological Group Almaty» ازىق-تۇلىك لوگيستيكالىق ورتالىعى جشس-ى 49 پايىز اكتسياسى الماتى قالاسى قارجى باسقارماسىنا تيەسىلى، قالعان 51 پايىزى جەكە كومپانيانىڭ يەلىگىندەگى وندىرىستىك نىسان بولىپ ءوز جۇمىسىن باستاپ كەتەدى.

سۋرەتتە: «GEGA» ازىق-تۇلىك لوگيستيكالىق ورتالىعىنىڭ قويمالارىنا سالىنعان تەمىرجول

تەمىرجولدان شىققان تۇيتكىل

الۋان ءتۇرلى ساقتاۋ جولدارىن قاجەت ەتەتىن 300 مىڭ توننا جۇك قابىلداپ ونى كەرەكتى تەمپۋراتۋرادا ساقتاي الاتىن قۋاتى مەن مۇمكىندىگى بار «GEGA» ازىق-تۇلىك لوگيستيكالىق ورتالىعىنىڭ تولىق جۇمىس ىستەۋى ءۇشىن اۆتوموبيل جانە تەمىرجول ماسەلەسى تۇبەگەيلى شەشىلۋى ءتيىس ەكەنى ايتپاسا دا تۇسىنىكتى. قويمالاردىڭ قاجەتتى تۇسىنا باراتىن اۆتوموبيل جانە تەمىرجول ماسەلەسىن «GEGA» ءوز قاراجاتىنا سالىپ شىققان. ونىڭ ىشىندە №684 تەمىرجولى دا بار. ءدال وسى №684-ءنشى تەمىرجولدىڭ ازعانا بولىگى «GEGA» ازىق-تۇلىك لوگيستيكالىق ورتالىعىنا ىرگەلەس جاتقان «اۆە ەنەرگەتيكا» لوگيستيكالىق كومپانياسىنىڭ جەرىمەن وتەدى. «GEGA» وزىنە تيەسىلى ءارى ءوز سالعان تەمىرجولدىڭ كورشى كومپانيانىڭ جەرىنەن وتەتىن بولىگى ءۇشىن «اۆە ەنەرگەتيكا» لوگيستيكالىق كومپانياسىنا كاسىپكەرلىك ۇسىنىسپەن شىعادى. ءبىرىنشى ۇسىنىس: تەمىرجولدىڭ «اۆە ەنەرگەتيكا»-نىڭ جەرىمەن وتەتىن بولىگىن سولاردىڭ يەلىگىنە بەرىپ، «GEGA»-نىڭ ءار تەمىرجول تاسىمالى ءۇشىن اقى تولەپ وتىرۋ; ەكىنشى ۇسىنىس: «GEGA» «اۆە ەنەرگەتيكا»-عا تەمىرجول وتەتىن جەردىڭ بولىگىندەي جەردى ءوز جەرىنەن بەرىپ، وعان قوسا كورشىلەس كومپانيانى ءوزىنىڭ بارلىق كوممۋنيكاتسياسىنا قوسۋ تۋرالى ۇسىنىس جاسايدى. قاراپايىم لوگيكاعا سالساق، شاقىرىمعا جەتەر-جەتپەس جەردەن ءبىر تيىن دا شىعىندالماي تەك پايدا عانا ءتۇسىرۋ كەز كەلگەن كاسىپكەرلىك كومپانياعا پايدالى. بىراق، نەگە ەكەنى بەلگىسىز «اۆە ەنەرگەتيكا» «GEGA»-نىڭ ۇسىنىستارىن قابىلدامايدى.

«اۆە ەنەرگەتيكا» شىعىنسىز تەك عانا پايدا اكەلەتىن ۇسىنىستاردى قابىلداماۋى بىلاي تۇرىپتى، ءوز جەرىنىڭ ازعانا بولىگىنەن ءوتىپ جاتقان «GEGA»-نىڭ تەمىرجولدارىن ەشبىر زاڭسىز، رۇقساتسىز بوگەپ، ءتىپتى سالىنعان تەمىرجولداردىڭ كەيبىر بولىگىن بۇزىپ، جيناپ تاستاعان. كەرەك دەسەڭىز، بارلىق زاڭدىق، قارجىلىق قۇجاتتارى نەگىزىندە «GEGA» ءوز قاراجاتىنا سالعان تەمىرجولدىڭ ءبىز ءسوز ەتىپ وتىرعان بولىگىندە كومپانيانىڭ تەمىرجول تەحنيكاسى دا قاڭتارۋلى تۇر.

سۋرەتتە: «بايتەرەك» ۇلتتىق باسقارۋشى حولدينگى» اكتسيونەرلىك قوعامىنىڭ لوگوتيپى

مەملەكتىك حولدينگ«بايتەرەتىڭ» بالەلى «بالاپانى»...

«باقسام، باقا ەكەن» دەمەكشى، «GEGA» تاراپىنان جاسالعان ۇسىنىستارعا «اۆە ەنەرگەتيكا»-نىڭ كەلىسپەۋىنىڭ «سىرى» بار ەكەن. ول نە «سىر» دەسەڭىز، «اۆە ەنەرگەتيكا»-نىڭ ارتىندا «AKTOBE LOGISTICS GROUP» (كەيىن «ALGcompany» بولىپ وزگەرگەن) جانە «قازاقستاننىڭ ينۆەتيتسيالىق قورى» اق تۇر ەكەن. «GEGA» جاساعان ۇسىنىستارعا كەلىسپەي، توڭمويىندىق تانىتىپ وتىرعان وسىلار. ەڭ قىزىعى، «قازاقستاننىڭ ينۆەتيتسيالىق قورى» اق-ى 100 پايىز مەملەكەتتىك يەلىگىندەگى «بايتەرەك» ۇلتتىق باسقارۋشى حولدينگى» اكتسيونەرلىك قوعامىنا قارايدى (تومەندەگى سۋرەتتە قىزىلبەن بەلگىلەنگەن تۇستى قاراڭىز). ياعني، «قازاقستاننىڭ ينۆەتيتسيالىق قورى» اق-ى – مەملەكەتتىك كومپانيا.

سۋرەت: «بايتەرەك» ۇلتتىق باسقارۋشى حولدينگى» اكتسيونەرلىك قوعامىنىڭ سايتىنان الىنعان سكرينشوت.

ءسويتىپ، «GEGA»-نىڭ تەمىرجول تاسىمالىن كورشىلەس كومپانيانىڭ ۇلتاراقتاي جەرىنەن وتەتىن تەمىرجول بولىگى تۇيىققا تىرەيدى. كورشى ۇسىنىستارعا كەلىسپەيدى. امالى تاۋسىلعان «GEGA» سوتقا شاعىم تۇسىرەدى. ياعني، ءوز قاراجاتىنا سالىنعان تەمىرجول ماسەلەسىن زاڭدى جولمەن شەشىپ بەرۋدى سۇرايدى.  وسى كەزدە ەشبىر ۇسىنىستى قابىلداماي، كورشىسىنە تەرىس قاراپ وتىرعان «اۆە ەنەرگەتيكا» «GEGA»-نىڭ ۇستىنەن №684-ءنشى تەمىرجول بولىگىن قايتا جوندەۋدەن وتكىزۋدى مىندەتتەۋ تۋرالى سوتقا قارسى ارىز جازادى. ال، سوت قانداي دالەل-ايعاقتارعا ءارى زاڭدى نەگىزگە سۇيەنگەنى بەلگىسىز، «اۆە ەنەرگەتيكا»-نىڭ شاعىمىن قاناعاتتاندىرادى. ءيا، مۇنداي «قىزىقتى» تەك قازاقستان سوتتارى عانا جاساي الادى.

سۋرەتتە: «GEGA» ءوز قاراجاتىنا سالعان №684-ءنشى تەمىرجولدىڭ «اۆە ەنەرگەتيكا»-نىڭ جەرىنەن وتەتىن بولىگى. «اۆە ەنەرگەتيكا» تەمىرجولدى قاق ورتادان كونتەينورمەن ءبولىپ، قورشاپ تاستاعان.

كەدەرگىنى جاساپ وتىرعان كىم؟

جوعارىدا تاپتىشتەپ جازعانىمىزداي، توتەنشە جاعداي تۋا قالسا حالىقتى ازىق-تۇلىكپەن قامتاماسىز ەتۋگە قاۋقارلى، ياعني، ازىق-تۇلىك قاۋىپسىزدىگىنىڭ قورعانى بولىپ وتىرعانى ءارى پرەزيدەنتتىڭ ءوزى ىسكە قوسقان ءىرى لوگيستيكالىق ورتالىق - «GEGA» - «Global Ecological Group Almaty» جشس-نىڭ جۇمىسىن تۇساۋلاپ وتىرعان – مەملەكەتتىك كومپانيا «قازاقستاننىڭ ينۆەتيتسيالىق قورى» اق، «اۆە ەنەرگەتيكا» مەن «AKTOBE LOGISTICS GROUP» -«ALGcompany» كومپانيالارى.

سۋرەتتە: «GEGA» ءوز قاراجاتىنا سالعان №684-ءنشى تەمىرجولدىڭ «اۆە ەنەرگەتيكا»-نىڭ جەرىنەن وتەتىن بولىگى.

«GEGA»-نىڭ كۇرەتامىرى ىسپەتتەس تەمىرجولدىڭ داۋلى بولىگىن كوزبەن كورىپ، قولمەن ۇستاۋعا بارعانىمىزدا كورشىلەس كومپانيانىڭ قارسىلىعىنا تاپ بولدىق: ادەتتەگى، قاراپايىم ماسكا تاعىپ العان، كىم جانە قانداي قىزمەتكەر ەكەنىن ايعاقتايتىن ەشبىر قۇجاتى، فورماسى جوق ءبىر جىگىت كەلىپ، «كىمسىزدەر؟ مۇندا نەعىپ جۇرسىزدەر؟» دەپ ساۋال قويدى. ء«بىز جۋرناليستتەرمىز. ءسىز كىمسىز؟» دەگەن سۇراققا ول: «جۋرناليستتەر ەكەندىكتەرىڭدى قايدان بىلەمىن، مۇمكىن ۇيىمداسقان قىلمىستىق توپ شىعارسىڭدار» دەپ قاتتى «شوشىتتى».

سۋرەتتە: «GEGA» ءوز قاراجاتىنا سالعان №684-ءنشى تەمىرجولدىڭ «اۆە ەنەرگەتيكا»-نىڭ جەرىنەن وتەتىن بولىگى.

ءبىز №684-ءنشى تەمىرجول بولىگىن كورشى كومپانيا «اۆە ەنەرگەتيكا» قالاي بوگەپ، بولشەكتەپ، ءبولىپ تاستاعانىن كورىپ، سۋرەتكە ءتۇسىرىپ الدىق تا كەرى قايتتىق. جولدا ءبىزدى «اۆە ەنەرگەتيكا» كومپانياسىنىڭ زاڭسىز جۇمىستان قۋىلعان جۇمىسشىلارى كۇتىپ تۇر ەكەن.

سۋرەتتە: «اۆە ەنەرگەتيكا» جشس-نىڭ زاڭسىز جۇمىستان شىعارعا جۇمىسشىلارى

ء«بىزدى بالاعاتتاپ، جۇمىستان قۋىپ جىبەردى»

جۇمىسشىلارعا ءسوز بەرمەس بۇرىن، ءسال شەگىنىس جاسايىق.

«GEGA» - «Global Ecological Group Almaty» جشس لوگيستيكالىق كومپانياسىنا ىرگەلەس ورىن تەپكەن لوگيستيكالىق ءوندىرىس ورنى «تامىز ي كا» جشس-نان 2013 جىلدىڭ 28 تامىزىندا «اۆە ەنەرگەتيكا» جشس-نىڭ يەلىگىنە وتكەن. «اۆە ەنەرگەتيكا» ەڭ اۋەلگى جۇمىسىن جۇمىسشىلاردى زاڭسىز جۇمىستان شىعارۋدان باستاپتى. مۇنى بىزبەن جولىققان جۇمىسشىلاردىڭ ءوز اۋزىنان ەستىپ، بىلدىك.

جۇمىسشىلاردىڭ ايتۋىنشا، ولارعا ءوز ەركىمەن جۇمىستان شىعۋ تۋرالى قاعازدى بەرىپ، «مىنا قاعازعا قول قوي دا، جۇمىستان كەت!» دەپ تالاپ قويعان. كونبەگەندەردى بالاعاتتاپ جۇمىس ورنىنان قۋىپ شىعىپ، كەلەسى كۇنى كىرگىزبەي قويعان. بۇل جەردە «اۆە ەنەرگەتيكا» جشس-نىڭ قر ەڭبەك كودەكسىن اياققا تاپتاعانى سوقىرعا تاياق ۇستاتقانداي انىق كورىنىپ تۇر. ءدال وسى زاڭسىز جۇمىستان شىعارۋ ماسەلەسىمەن جۇمىسشىلاردىڭ قۇقىعىن قورعاپ جۇرگەن ادۆوكاتتىڭ سوزىنشە، «اۆە ەنەرگەتيكا» جشس مەن جۇمىسشىلار اراسىنداعى سوت پروتسەسىنەن ءالى ەشقانداي ناتيجە شىقپاعان. ال، جۇمىسشىلار بولسا، سوتتان ادىلدىك تاپپاي، «اۆە ەنەرگەتيكا» جشس تاراپىنان قۇقىقتارى تاپتالىپ، زار يلەپ ءجۇر.

مىنە، «اۆە ەنەرگەتيكا»، «AKTOBE LOGISTICS GROUP» - «ALGcompany» جانە «قازاقستاننىڭ ينۆەتيتسيالىق قورى» اق پرەزيدەنتتىڭ ءوزى ۇنەمى نازارىندا ۇستاپ وتىرعان يندۋستريالىق ماڭىزدى جوبالاردىڭ بىرەگەيى بولىپ تابىلاتىن ءارى جاقسى قارقىنمەن دامىپ كەلە جاتقان GEGA» - «Global Ecological Group Almaty» جشس لوگيستيكالىق كومپانياسىنىڭ اياعىنا تۇساۋ، جۇمىسىنا كەدەرگى بولىپ وتىر. مۇنداي ماسەلەگە پرەزيدەنتتىڭ ءوزى نازار اۋدارماسا، تومەندەگى شىرماۋىقتار ەكونوميكا مەن ازىق-تۇلىك قاۋىپسىزدىگى سالاسىنداعى ءىرى لوگيستيكالىق كومپانيانى جەرلەپ تىنۋى عاجاپ ەمەس...

Abai.kz